Icaya 29

Gin ma bitime ikom Jerucalem

1Rwot owaco kuman ni, “Jerucalem, Jerucalem, can madit tye kabino ikomi! Jerucalem aye taun madit ma onongo Daudi oguru kemane iyeni. Kong wumede ki kwero karamawu pi mwaka aryo nyo adek mo. 2Ento abimiyo Jerucalem neno can; koko ki kumu madwong bibedo tye iye, ikare ma abiloko en doko calo keno me wango gitum awanga. 3Abiguru kemana ingeti kun arumi woko dyere, abirumi woko ki lubele ma gucudu malo likung, abitoro lobo abako inyimi calo cel. 4Abidwoki piny ite lobo, ibilok ki piny i apwa, dwoni bikati ki ite lobo calo dwon jok, ki loki biwinye liwewe kun kati ki i apwa.

5Jerucalem, lukwori bibedo mapol calo apwa, gin jo ma kica pe i cwinygi, ento gibedo calo cung kal ma yamo tero. Ikare meno cutcut, 6aye Rwot me mony bilari, kun miyo kot mor mwoc atata, oyengyeng bedo tye ki woo bene bedo dit, ki yamo lapiru, yamo kot, kacel ki mac mager tutwal. 7Lwak mony me rok mapatpat ma obake lipim ma lwenyo ikom jo Ariel, ki jo ducu ma gilwenyo ikomgi ki ikom kabedo maleng pa Lubanga, gin ducu gibidoko calo lek, onyo gin ma kineno i dyewor. 8Kit macalo dano ma kec neko leko ni etye ka cam, ci cutcut coo woko ma nongo iye nono, nyo macalo dano ma orwo pii oketo woko leko ni etye kamato pii, cutcut coo woko ma nongo orwo pii tye ka neke matek, kun mito mato pii; lwak rok ducu ma lwenyo ikom got Cion bene gibibedo kitmeno.”

Jo Icrael gukwero winyo juk

9Wubange giwu kekenwu wek wubed luming, wubo wangwu woko kekenwu wek wubed lutowang! Wumer, labongo mato kongo bwino mo; wupange apanga ki wot labongo kongo mo ma wumato! 101Pien Rwot dong oonyo ikomwu cwiny me nino matek; omiyo wangwu woko. Lunebi aye myero obed wangwu, ento Lubanga ocido wanggi woko.

11Gin ma Lubanga nyutu bot lunebi ducu dong odoko calo buk ma kimwono doge woko ki tung botwu, ma ka kimiyo bot dano mo ma ngeyo kwan kun kiwace ni, “Bin ikwan man,” ci en bigamo ni, “Pe atwero kwanone pien kimwono doge woko.” 12Dok bene ka kimiyo bot ngat ma kwiya kwan, kun kiwace ni, “Bin ikwan man,” en gamo ni, “Pe angeyo kwan.” 132

Rwot owaco ni, “Rok man giwaco ni giwora, kara giwora ki doggi nono, giketo deyo ikoma bene ki doggi nono, cwinygi pe tye ikoma wa ki acel, lworo ma gilwora kwedeni meno cik pa dano ma kipwonyogi kwede. 143Pimeno, dok abitimo gin me aura ikom rok man, gin me aura dok me tango tutwal; mamiyo ryeko rwenyo woko ki bot jo maryek, ki ngecgi ma gitye kwede bidoko gin ma konye peke.”

Gen matye pi kwo me anyim

15Jo ma kano tamgi woko ki bot Rwot kamatut, ki jo ma tiyo ticgi ka macol, gibineno can, ki jo ma giwaco ni, “Anga kono ma nenowa? Anga kono ma ngeyowa?” 164Kong wunen kit ma wun wuloko kwede kilong! Itamo ni kitwero poro lacwe agulu ki lobo agulu ma en cweyo? Itamo ni gin ma kicweyo acweya twero waco ki ngat ma ocweye ni, “In aye pe icweya?” Nyo gin ma kicweyo twero waco ki ngat ma ocweye ni, “In pe ingeyo gin mo?”

17Odong kare manok tutwal Lebanon bidoko poto ma ceko cam mabup mada, kun poto mayam ceko cam mabup tutwali dong oloke odoko bunga.

18Inino meno jo ma itgi oding gibiwinyo lok ma kikwano ki i buk, lutowang bene wanggi biyabe, kun gia woko ki i mutu ki i colpiny. 19Jo mamwol dok gibinongo yomcwiny i Rwot, lucan bene gibibedo ki yomcwiny i Ngat Maleng me Icrael. 20Pien jo ma pe ki kica dong bibedo peke, jo ma gin lungala bene gibitum woko, lulib dano dyewor me timo tim maracu kibityekogi woko liweng. 21Lubanga bityeko jo mamiyo kop loyo dano pi lokgi, ma giciko owic pi ngat ma jukugi ki i kabedo me ngolo kop, ma giwaco goba wek lok oloo ngat ma kite atir.

22Ma omiyo Rwot, mayam olaro Abraim, oloko lok ikom ot pa Yakobo ni, “Lewic pe dok bimako Yakobo, wange bene pe dok bibale. 23Pien ka wubineno lutino, ma an abimiyowu gitye botwu, ci wubimiyo nyinga bedo me awora; kibingeyo atir ni Ngat Maleng pa Yakobo gire leng, ci gibibedo ki lworo ikom Lubanga me Icrael. 24Jo ma ngak woko ki i cwinygi biniang, ki jo ma bedo ka ngur angura bene biye ni kipwonygi.”