Icaya 30

Ribe ki jo Ejipt konye peke

1Rwot owaco ni, “Lutino ma lujemo gibineno can, jo ma tiyo ki tamgi, ma pe mera; dok ma giribe ki rok mukene ento pe i mitina, me medo bal ikom bal, 2ma gicako wotgi me cito i Ejipt labongo penyo kong tam ki bota, pi laro bot Parao ni ogwokgi, dok pi yenyo ka kane ite tipu pa jo Ejipt! 3Pimeno kagwokewu ki bot Parao bimiyowu lewic, dok tipu me kakanewu i Ejipt bimiyo alee twodowu1 woko. 4Pien kadi bed luditone tye i Joan, dok lukwenane o wa i Kanec, 5ngat acel acel lewic bimako, pi rok ma pe twero konyogi, ma pe gunongo iye kit kony mo kadi gin mo maber, ento gunongo lewic ki cac keken.”

6Man lok ma Lubanga oloko ikom lee me Negeb. En owaco ni, “I dye lobo matye iye ayelayela madit ki can mapek, kama min labwor ki twon labwor gia iye, twol ororo ki twol lacocodo tye iye, gin gutingo lwak lonyogi madwong adada inge lwak kana, ki lim akanagi ikom aruk pa kinaga, kun gitero bot rok ma pe twero konyogi. 7Pien kony ma Ejipt miyo konye peke, dok gin mo maber peke iye; ma omiyo acako nyinge ni, ‘Rakab ma bedo abeda labongo timo gin mo.’

8Kombedi dong icit; igor coc inyimgi ikom got ma apada, ka dok bene ico i buk, wek kigwok obed tye pi kare me anyim, macalo caden ma bedo nakanaka. 9Pien gin gubedo lujemo ma lugoba, lutino ma kwero winyo lok pa Rwot; 10ma giwaco bot lunenpiny ni, ‘Pe wunen piny.’ Ki bot lunebi giwaco ni, ‘Pe wutit botwa lok matye atir; ento wutit botwa lok ma wamito winyone keken, wutit lok me goba keken. 11Wungak woko, wuwek gengo yowa, wek pe wamede ki winyo lok mo pi Ngat Maleng me Icrael.’ 12Meno omiyo Ngat Maleng me Icrael owaco ni, ‘Pien wun dong wucayo lok man, ento wuketo genwu i unu dano ki bwologi, kun wujenge ikom timwu meno ma wutimo; 13meno bimiyo balwu man bedo i komwu, macalo cel ma ocudu malo likung ma obar woko dok cok muk me poto woko piny, ma muk woko lipuny oyotoyot. 14Muke bedo rom ki muk pa agulu ma kicweyo, ma kingido woko labongo kica mo, kun otakone mo peke ma dong ma kitwero tic kwede me karo mac ki i keno, onyo maromo twomo pii ki i joro.’”

15Man aye lok ma Rwot Lubanga owaco, ma en aye Ngat Maleng me Icrael. “Wudwog cen, wubed mot, wek wulare; ka wubedo mot ki gen, wubinongo teko.” Ento wun ceng wukwero woko, 16kun wuwaco ni, “Pe, wan giwa wabiringo woko ki aguragura, wa biringo oyotoyot adada.” Dok ni, “Wabiringo madwir tutwal.” Pimeno jo ma ryemo korwu bibedo jo madwir adada. 17Jo alip kulu biringo pi lworo dano acel keken, wun wubiringo pi lworo lukwor abic keken, nio wang ma wudong calo yat bendera matye iwi got, calo bendera matye iwi cere malo. 18Kadi bed kumeno, Rwot tye ka kuruwu me nyutu bere botwu; en oyube pi timowu kica. Pien Rwot aye Lubanga ma ngolo kop atir, jo ducu ma gibedo kun gigeno en gitye ki gum.

Rwot ocike me miyo gum bot jone

19Adada wun jo Cion, wun jo ma wubedo i Jerucalem, pe dong wubikok matwal. Rwot bitimowu kica kace wukok bote; ka owinyo kokowu, ci en bigamo dogwu. 20Rwot bimiyo wuwok ikare marac me aroma, ento en kikome bibedo tye ikinwu kapwonyowu, pe dok wubiyenye ento wubibedo kanene ki wangwu. 21Kace onongo wungak woko ki i yo wudok tung acuc onyo tung acam, ci wubiwinyo dwon ki tung ngewu, ma waco ni, “Yo ene, wulubi.” 22Ka dok wubicako balo cal jogiwu ma kipayo apaya ma wudeyo komgi ki ryal, kacel ki calwu ma kiliyo aliya, ma wudeyo komgi ki jabu, wubibologi woko calo gubedo gin me kwer, kun wuwaco ni, “Wudire cen!”

23Ci Rwot bimiyo kot cwer botwu pi kodi ma dong wucoyo i poti ki pi cam matye kacek i poti, bimiyo camwu cek maber dok mabup tutwal. Ikare meno dyangiwu bibedo kacam i bar olet malac; 24ci bimiyo twoniwu ki kanawu ma gipuru bicamo cam ma kirubu ki kado, ma kipyeto woko ki odero. 25Inino meno ma kibimuku gogo pa merokwu woko ki neko danogi matek, pii ma mol bibedo tye iwi godi ducu ki iwi cere ducu. 26Dok bene dwe biryeny maleng tutwal kun caro piny calo ceng maryeny, kun nongo ceng biryeny maleng tyen abiro kulu. Meno aye nino ma Rwot bitweyo iye wang ret pa jone, ki cango wang bur ma en kikome aye oketo rete ikom jone.

Rwot bipwodo jo Aciria

27Nen, twero ki deyo pa Rwot bino kun a ki kamabor, kun kinigane tye kawang calo mac, ma yitone ocido licuc duny cito malo ma ocule woko liking; kun kiniga opongo doge woko, ki lebe bene calo mac matye kawango piny, kun wango jami woko ducu liweng. 28Aluu doge calo kulu ma piine opong libyeny ma mol atata liyakyak, ma mwonyo dano o wa ingute. Rwot yeko rok ki odero me to, dok keto gin mabitogi i doggi wek otergi ito.

29Ento wun jo pa Rwot, wubibedo kawero wer macalo wuwero i dyewor me kwero nino madit pa Rwot; cwinywu bene bibedo yom, calo ngat ma woto lubu dwon nyamulere ma ki tye kakutu, kun woto cito iwi got pa Rwot, bot ngat ma obedo got pa jo Icrael. 30Rwot bilok ci miyo dwone me deyo winye, dok bene bimiyo bade nen ma en oryeyo okemo piny me pwodogi, kun tye ki akemo mo madit ma pe wace, ki leb mac ma wango piny woko ducu, kacel ki kot ma mwoc kun cwer core piny ki pee. 31Lworo madit mada bimako jo Aciria, kace guwinyo dwon Rwot, kun en goyogi ki odoone. 32Ka Rwot goyogi teretere, nongo jone tye ka wer kun gigoyo ajaa ki opuk. Rwot kikome aye bilwenyo ki jo Aciria. 33Pien dong kityeko yubune woko wacon; kama mac biwango rwot me Aciria iye. Kityeko yubune woko matut dok malac tutwal, ma mac ki yen bene tye madwong ata iye. Aluu dog Rwot bikati calo mac gweng calfa ma kiliyo, en aye bimoko mace.