Icaya 31

Lubanga bigwoko Jerucalem

1Can iwi jo ma gicito i Ejipt kayenyo kony, ma giketo gen gi ikom aguragura, ki ikom gadigadi me lweny, ni pien gipol, ki ikom wegi aguragura, pien gitek tutwal, ento pe gitingo wanggi malo gineno Ngat Maleng me Icrael, kadi ki penyo tam ki bot Rwot. 2Ento kono en ryek, dok kelo can marac tutwal ikom dano, pe dok dwoko lok ma en oloko cen. En bia malo ikom jo me odi pa lutim tim maracu, ki ikom jo ma gikonyo lutim bal. 3Jo Ejipt mere gin dano adana, pe gubedo Lubanga; aguraguragi bene gubedo kom mamwa, pe gin cwiny. Ka Rwot oryeyo bade me pwodogi, ci ngat mamiyo kony bipange litamtam, ki ngat ma kikonyo bipoto woko piny, gin ducu gibito kacel ci gitum woko. 4Pien Rwot owaco bota kit man ni, “Kit ma labwor nyo latin labwor mor kwede ikom lee ma en omako, ma kadi ilwong lwak lukwat mapol ka lweny ikome, kome pe myel ka owinyo dwongi dok bene lworo pe mako kadi giwoo matek tutwal, meno aye kit ma Rwot me mony bibino kwede piny ka lweny ikom got Cion ki ikom cerene ducu. 5Rwot me mony bigwoko Jerucalem, kit macalo winyo lwore kwede me gwoko lutinone, en bigwoko dok bene bilaro Jerucalem, miyo en bwot.

6Wun jo Icrael myero wuloke wudok cen bot ngat ma wujemo ikome magwa tutwali. 7Pien inino meno dano acel acel bibolo cal jogine me ryal woko kacel ki cal jogine me jabu ma onongo wutimo bal pi tiyogi ki cingwuni. 8Kibineko jo Aciria woko ki i lweny ento pe ki kero pa dano; pala lucwan ma pe pala pa dano bijwerogi woko lirwatrwat; gibiringo woko pi lworo pala lucwan, gibidiyo awobegi tektek me tiyo tic muroni mapek. 9Lworo bimiyo oteka lwenygi mateki1 ringo woko, myelkom bene biweko luditogi bolo bendera me lwenygi woko.” Rwot ma kiworo i Cion, ki ma keno tyere otwak ki mac i Jerucalem aye ma owaco.