Icaya 32

Rwot ma kite atir

1Nen, kare bibino ma rwot biloyo loc ki kit ma atir, rwodine bene gibibedo i loc kun gingolo kop atir. 2Ngat acel acel bibedo macalo kagwoke ka yamo tye, dok macalo kagwoke ka kot ocore piny. Gin bibedo macalo kulu mapol ma piigi mol i kabedo mutwo, dok macalo tipu got mo madit matye i tim aroo. 3Wanggi ki itgi bibedo twolo me neno ki me winyo gin ma dano mito. 4Gin pe gibitimo jami pi aruya, ento gibitic kiniang ki ngec maber, dok gibiloko lok atir labongo peko mo. 5Ngat maming pe kibilwonge ni dano me awora, ngat ma kite rac bene pe kibilwongo ni twon oteka. 6Pien laming mere loko lok me mingo, tame tye me timo bal keken; gin ma en timo ducu pe yomo cwiny Lubanga, loko lok marac ikom Rwot; en dok medo kec ameda bot jo ma kec dong nekogi, dok twono jo ma orwo pii nekogi pii me amata. 7Dano ma kite rac, nongo time bene rac; en miyo tam me timo gin maracu, me balo lucan woko ki loko lok goba kadi bed lok pa ngat ma can odiyoni tye kakare. 8Ento dano me awora kelo tam ma jo mukene woro bene, en cung mere ikit me woro keken.

Ngolo kop ki roco Jerucalem

9Wua malo, wun mon ma wutye ki kuc, wuwiny loka; wuter itwu, wuwiny lok ma awaco, wun anyira ma pe wuparo gin moni. 10Odong kare matidi mo pe dong romo mwaka acel, komwu bibedo ka po apoya, wun mon ma pe wuparo gin moni; pien nyig olok bibedo peke, dok bene pe kibipwono nyig yadi. 11Wubed ki myelkom wun mon ma wutye ki kuc, komwu bene myero obed ka po apoya, wun ma pe wuparo gin moni; wugony bongi woko ki ikomwu, wutwe bongo cola i pyerwu. 12Wudong korwu pi potiwu ma yomo cwinywu, ki pi olok ma nyak matek tutwali, 13pi lobo pa jona, ma okutu ki ocok bidongo iye; ki pi odi ducu ma gitye i taun madit ma dano tye iye ki yomcwiny madwong. 14Pien rwot bia woko ki i ode, taun madit ma dano pol iye bene bidong nongo; got Opel1 ki lubele ma ocudu malo likung me ngiyo piny bidoko boro matwal; kana me tim cwinygi bibedo yom pirgi, bidoko kama kikwayo iye romi ki dyegi.

15Man bitime nio wang ma Lubanga oonyo Cwiny ma mere ikomwa kun a ki malo, ma nongo tim bene dong odoko poto ma ceko cam mabup tutwal, kun poto mayam ceko cam dong oloke odoko bunga. 16Ikare meno ngolo kop atir bibedo i tim, kit ma atir bibedo mere i poto ma ceko cam. 17Kit ma atir bikelo kuc, dok bikelo bene bedo mot ki gen ma bedo nakanaka. 18Jona bibedo i kabedo me kuc, kama ayelayela mo peke iye, kabedo maber me yweyo mot. 19Pee bicore, miyo bunga ducu lwer o woko piny, ki taun madit bene kibicoro woko piny lirumrum. 20Wubibedo ki yomcwiny, wun jo ma coyo kodi i dog kulu ducu, wun ma miyo twoni ki kana giwoto ata.