Icaya 33

Lega pi kony

1Ibineno can, in ngat ma ineko dano, ma kun in kikomi pe kineki, in ngat ma doto dano, kun ngat mo pud peya oketo lok roro ikomi. Ka dong iweko neko dano woko, in bene dong kibijweri woko; ki ka dong iweko tim me doto dano woko, in bene dong kibiketo lok roro ikomi. 2Ai Rwot, timwa kica, pien genwa tye ikomi. Gwokwa nino ki nino, ci ilarwa ikare ma watye i can. 3Rok mukene giringo woko ka guwinyo bwaroni; ka in ia malo ka lweny pirwa, lurok giket woko atata. 4Ci kiyako jamigi woko calo okwil ma camo cam ma i poto; ma gipye apyeya iye, gilaro jamigi calo bonyo. 5Rwot dit adada, en bedo malo, dok loyo jami ducu; en bimiyo jo Cion ducu ngolo kop atir, kun kitgi bene bedo atir. 6Ikarewu en bimiyo wucung matek, dok bilarowu, ci miyo ki wun ryeko ki ngec madit; dong lonyowu madit en aye me lworo Rwot.

7Kong wuwiny kit ma jo ma gitek i lweny gikok kwede pi kony i gudu! Dok lukwena me kuc bene gikok ki cwercwiny ma pe wace! 8Yoo gudu ducu dong gudong nongo, dano mo ma wote iye dong peke. Nen, gicike dong kituru woko, caden ducu dong kicayogi acaya, pe dong gitye ki woro pi dano. 9Lobo dong obale woko; alee bene otwodo Lebanon, tekone bene tye karwenyo woko. Caron dong odoko calo tim aroo; Bacan ki Karmel pot yadigi dong tye ka o woko aoya piny. 10Rwot owaco ni, “Kombedi dong abia woko, abitinge malo; dong abinyutu dit me twerona. 11Wuyubu yub ma konygi peke ki jami ducu ma wutimo konygi peke. Aluu yweyowu aye bidoko mac ma biwangowu. 12Rok ducu bidoko calo buru mac ma odong ka mac oto, macalo okutu ma kitongo ka dong kiwango i mac.” 13Wun jo ma wutye kamabor wuwiny gin ma dong atimo, ki wun jo ma wutye cok, myero wunge twero ma atye kwede.

14Lubalo matye i Cion dong lworo omakogi woko, jo ma kwero Lubanga komgi dong myel amyela. Gin giwaco ni, “Ngolo kop pa Lubanga obedo calo mac matye kawang ma pe gik. Anga ikinwa matwero bedo inget mac ma lyel nakanaka ma pe to?” 15Ngat ma twero bwot aye ngat ma kite atir inyim Lubanga ma loko lok ada, ma cwinye tye atir, ma cwinye dag lonyo ma kinongo pi unu dano, ma bene pe ye gamo lim me camcana, ma kwero tim me neko dano, dok ma kwero tim maracu ducu. 16En bibedo i kabedo ma malo kamabor; ka gwokene bibedo i cel gogo ma iwi got; kibimiye came, wa ki pii amatane bene pe bijwik.

Deyo ma bibino anyim

17Wubineno rwot ki wangwu i deyone; wubineno lobo ma oyare malac wa kamabor. 18Wubibedo ki lwod ikom gin ma okato angec ki lworo madit tutwal kun wuwaco ni, “Lakwan wel kono tye kwene? Dano ma kiculu mucoro bote kono tye kwene? Lakwan lubele ma gucudu malo likungi kono tye kwene?” 19Pe dok wubineno rok ma lungala, rok maloko leb mapat atika, ma pe wuniang i gin ma giloko, ma gidumu leb ma niang iye tek. 20Kong wunen Cion, taun madit ma wukwero iye ninowu madito ma kiciko! Wubineno Jerucalem ki wangwu, ma en taun madit ma oling mot calo kema ma pe kikobo ki kakare, ma teke ma kiguro kwede pe kiputu, dok tole bene pe cot. 21Ento Rwot binyutu deyone kunu, kama kulu madongo ki matinone tye iye, kama mel ma kikwango ki pol pe twero oo iye, ki yeya me deyo mo bene pe oo iye. 22Pien Rwot aye langolkopwa, en lalocwa, ki Rwot aye lakerwa, en bilarowa.

23Tol yeyawu ogony woko; pe mako te yat cung matek i kabedone, pe bene kitwero yaro bongo iye wek yamo okol. Ikare meno jami ayaka bibedo ma obake ata lipim ma dano bipoko ikin gi; kadi wa lungolo bene gibinongo jami mogo olo twal. 24Pe tye dano mo ma bedo i lobowa ma biwaco ni, “An koma lit.” Jo ma bedo iye ducu kibitimo botgi kica pi balgi.