Icaya 34

Rwot bipwodo lukwore

1Wubin wunyik cok, wun rok ducu wek wucik itwu wuwiny! Jo ducu ma bedo i lobo myero gubin guwiny. 2Pien akemo dong omako Rwot ikom rok ducu, kiniga okete woko adada ikom monygi, en dong otenyogi wek kijwergi woko. 3Kom danogi ma dong kineko kibibolo woko ata, ngwec komgi biduny mangwe, remogi bene bimol iwi godi. 41 Jami ducu ma i polo bitop woko, polo bidole woko calo buk adola. Monygi ducu bipoto woko piny, kit ma pot olok o kwede piny, kit ma pot oduru poto kwede piny ki iwi jange. 52

Pien Rwot dong oyubu pala lucwane woko ki i polo, me bino ka lweny kwede ikom jo Edom, ikom jo ma dong en omiyogi me aneka. 6Pala lucwane bipuune ki remo i lake, moo dwolo bene dong bidyako kome woko liweng, calo remo romi ki remo dyegi, ki moo dwolo olang pa nyogi romi ma kityero. Pien Rwot bityero gitum i Bojra, dok bineko dano matek i lobo Edom. 7Dano bitinge poto piny libut calo twoni jubi. Lobogi bipong ki remo ma mol liyakyak, dok moo dwolo bimiyo lobogi bedo ma miu adada. 8Pien Rwot tye ki nino me culu kwor, tye bene ki mwaka me koko Cion ki bot lukwore.

9Kulu ducu me Edom biloke doko calo odok lam, lobone bene bidoko calo gweng calfa, dong lobo maca ducu bidoko calo odok lam matye kawang. 103Mac bilyel dyeceng ki dyewor benebene ma pe to, yitone biduny ma ocido cito malo litu nakanaka. Ikare pa yalwak ducu lobo bidong nono, dano mo peke ma biwok ki iye matwal. 11Olwit ki coo aye bileyo ci doko meggi, dok tula ki agak bene gibibedo iye. Rwot bityeko lobone woko ci bidong obur. 12Kibilwongo nyinge ni, “Ker peke kunu,” ki luloc ki luker madito bibedo peke iye. 13Okutu bidongo iwi odine madito, ayila ki ocok bidongo i gang gogone, too ki udu gibibedo iye. 14Lee me tim birwate ki lalur, jogi ma obedo calo nyogi oyima bikok bot luwotgi, jok ma dako ma woto dyewor keken bicito kayenyo kayweyo kunu. 15Tula bigero ode kunu, ci bibolo iye tonge, dok bitoko lutinone bene ki kunu, ka coko lutinone woko ite bwome. Okwateng bene bicoke kunu, kun acel acel ki ikin gi tye ki cware.

16Kong wuyeny ci wukwan ki i buk pa Rwot. Pe tye mo acel ki ikin gi ma birwenyo, pe tye mo ma bibedo kene labongo cware. Pien Rwot dong ociko ni obed kitmeno, en kikome aye bicokogi kacel. 17En obolo kwir pirgi, en kikome aye ma opoko botgi lobo kun pimo ki tol. Dong bibedo meggi matwal, gibibedo iye ikare pa yalwak ducu.