Icaya 35

Dwogo pa jo pa Lubanga i Cion

1Lobo mutwo kacel ki tim bibedo ki yomcwiny,

ature bituru iye calo lenga.

2Ature bituru iye ki yomcwiny,

kun giwero wer ki yomcwiny madwong tutwal;

deyone bene bibedo dit mada calo got me Lebanon,

bibedo ma mwonya tutwal calo poti me Karmel ki Caron.

Gibineno deyo pa Rwot,

ki twero ma Lubangawa tye kwede. 31

Wujing cing jo ma badgi okwe,

wumii jo ma conggi goro odok matek.

4Wuwac bot jo matye ki lworo i cwinygi ni,

“Pe wubed lwor, wubed tek!

Nen, Lubangawa bikokowu,

en biculu kwor ikom lukworwu.

En bibino ci larowu.” 52

Ikare meno lutowang wanggi biyabe,

jo ma itgi oding bene itgi biyabe.

6Ikare meno lungolo bipye malo calo til,

ki jo ma te lebgi oto gibicako wero wer ki yomcwiny.

Pien pii bimwoco piny woko idye tim,

ki kulu bene piine bibedo ka mol i lobo mutwo;

7kweyo ma otwo bidoko kut ma pong ki pii,

pii bibedo ka gunye atata i lobo mutwo likang.

Lum ki lagada bidongo madwong tutwal,

i kabedo mayam too aye bedo iye.

8Yoo gudu madit bibedo kunu,

yoo ma kibicako nyinge ni, “Yoo Maleng.”

Jo ma gin lubalo pe gibilubu yoo meno,

jo ducu ma bilubu yoo meno, kadi wa jo maming bene pe birwenyo.

9Labwor mo pe bibedo kunu,

lee mo mager bene pe bicito kunu,

pe tye lee mo ma ger ma kibinongo kunu;

ento jo ma dong kikokogi aye bilubu yoo meno.

10Jo ma Rwot okokogi bidwogo cen i Cion,

gibibino ma nongo giwero wer licur.

Yomcwiny ma rii nakanaka pe birwenyo ki iwigi,

gibibedo maber ki yomcwiny madwong,

ci cwercwiny ki cur mayam gubedo kwede dong bia woko ki i cwinygi.