Icaya 36

Jo Aciria guywayo mony ikom Jerucalem

(2 Luk 18:13-27; 2 Tek 32:1-19)

1I mwaka me apar wiye angwen me loc pa rwot Kejekia, en aye Cenakerib rwot me Aciria obino kwede ka lweny ikom taun madito ducu me Juda ma kirumugi ki cel gogo, ci omayogi ducu. 2Rwot me Aciria ocwalo Larabcake bot rwot Kejekia i Jerucalem, kun Larabcake a ki i Lakic ki dul mony madit tutwal. Ci ocito ocung inget yoo pii ma mol ki i joro mamalo, i yoo gudu ma cito i poto pa Lalwok bongo.

3Jo adek me Juda cutcut gubino me rwate kwede: Eliakim wod pa Ilkia, ma en aye ladit maloyo jami ma i ot pa rwot, kacel ki Cebna ma karan, ki Joa wod pa Acap, laco lok ma time.

4Larabcake owaco botgi ni, “Wuwac bot Kejekia ni: rwot madit, rwot me Aciria, owaco kuman ni in igeno gin ango? 5In itamo ni lok me dog nono bedo rom ki ryeko me lweny ki mony madit me loyo lwenye. In kombedi ijenge ikom anga ka, ma omiyo ijemo woko ikomani? 61 Nen, kombedi iloko Ejipt odoko odoo ma ijenge ikome, kun en lagada ma otur dok otyer woko, ma bitucu cing dano mo ma ojenge ikome. Meno kit ma Parao rwot me Ejipt bedo katimo kwede jo ducu ma gijenge ikome. 7Ento ka wuwaca ni, ‘Wan wajenge giwa ikom Rwot ma Lubangawa,’ pe en aye wang jogine ma iwi godi, ki keno tyere ma yam Kejekia omukugi wokoni, kun waco bot jo Jerucalem ki Juda ni, ‘Wubiworo Lubanga inyim keno tyer man ma i Jerucalem keken.?’ 8Kong ijeng gin mo me lacama ki ladita rwot me Aciria! An abimiyi aguragura alip aryo, kace in ki tung boti bene itwero nongo jo ma ngweco kwedgi. 9In itamo ni itwero tayo ladit lweny acel mo ki ikin lutic pa ladita matinone, kace ijenge ikom Ejipt pi gadigadi lweny ki wegi aguragura ma gibicwali? 10Dok bene in itamo ni abino ka lweny ikom kabedo man wek atyek woko labongo twero pa Rwot? Wai Rwot aye ma owaca ni, ‘Cit wek ilweny ikom lobo man ityek woko liweng!’”

11Cutcut Eliakim ki Cebna, ka Joa guwaco bot Larabcake ni, “Walegi ilok ki wan lutici i leb Aram, pien wawinyo. Pe ibed kalok kwedwa i leb Juda ma lwak ma gitye iwi cel bene giwinyo.”

12Ento Larabcake ogamo doggi ni, “Itamo ni rwoda ocwala ka loko lok magi bot laditwu ki botwu keken bo, pe bot lwak ma gubedo iwi cel bene, ma gin kacel ki wun gukeme ki can me camo cetgi ki mato lacgi ken gi?”

13Larabcake ocung ocako dange ki dwon malongo i leb Juda ni, “Wuwiny lok pa rwot madit, rwot me Aciria! 14Rwot me Aciria owaco ni pe wuwek Kejekia obed kabwolowu, pien en pe bitwero larowu. 15Pe bene wuwek Kejekia omiwu wujenge ikom Rwot Lubanga kun wuwaco ni, ‘Rwot Lubanga aye bilarowa, dok ni taun madit man pe kibimiyo i cing rwot me Aciria.’ 16Pe wubed kawinyo lok pa Kejekia; pien man aye lok ma rwot me Aciria owaco ni, ‘Wuyub lok me kuc kweda, ci wukati woko bota; kitmeno ngat acel acel bicamo nyig olok ma i potone, ngat acel acel bicamo nyig odurune, ki ngat acel acel bimato pii ma i wang ite kikome; 17nio ka abiterowu wa i lobo marom ki mewuni, lobo ma ceko kal ki kongo bwino, lobo ma miyowu kwon, matye iye poto olokgu. 18Wugwoke, pe wubed kawinyo lok pa Kejekia matye kabwolowu marac kun waco ni Rwot Lubanga bilarowu. Tye lubanga pa lurok mo mayam olaro lobone ki i cing rwot me Aciria? 19Lubanga pa jo Kamat ki Arpad gitye kwene ka? Lubanga pa jo Ceparvaim gitye kwene? Gin yam gularo Camaria ki i cinga bo? 20Lubanga me lobo mene ki ikin lubanga ducu ma gitye ki lobogi, mayam kong olaro lobone ki i cinga mono, ma omiyo wutamo ni Rwot Lubangawu bilaro Jerucalem ki i cingani?’”

21Ento lwak ducu guling alinga, pe gudoke iye lok mo kadi ki acel, pien onongo rwot ociko ni, “Pe wubigamo doge.” 22Lacen Eliakim wod pa Ilkia ma en aye ladit maloyo jami ma i ot pa rwot, kacel ki Cebna ma karan, ki Joa wod pa Acap ma laco lok ma time guyeco bongigi gucito kwede wa bot Kejekia, ci gutite lok ducu ma Larabcake owaco.