Icaya 37

Rwot Kejekia openyo tam ki bot Icaya

(2 Luk 19:1-7)

1Ka rwot Kejekia owinyo, ci oyeco bongine woko, ocako ume ki bongo cola, ci ocito kwede wa i Ot pa Rwot. 2En ooro Eliakim ma lalo jami ma i ode, kacel ki Cebna ma karan, ki ajwaki pa Lubanga ma gutegi ma guumu komgi woko ki bongo cola. En ocwalogi gucito bot Icaya wod pa Amoj, ma lanebi. 3Gin guwaco bote ni, “Kejekia owaco kuman ni, ‘Tin piny dong oloyowa woko, kiburuwa, lewic omakowa mada. Warom ki dako ma mito nywalo latin, ento tek me nywalone aye peke. 4Rwot me Aciria otyeko cwalo ladit monye me yeto ki cayo Lubanga ma kwo. Myero Rwot Lubangani owiny lok me cac man ci omii pwod ki ngat ma owaco. Piman leg Lubangani tin pi jo ma gubwot, ma gudongi.’”

5Ka lutic pa rwot Kejekia guo bot Icaya, 6ci Icaya owaco botgi ni, “Wuwac bot laditwu ni, ‘Rwot owaco kuman ni: pe ibed ki lworo mo pi lok ma iwinyoni ma lutic pa rwot me Aciria gubedo ka yeta kwede. 7Nen, abiketo cwiny mo i iye, ci biwinyo lok mo ma kiyweko pire, ci dok woko wa i lobo tugi; ci abimiyo kineko en woko ki pala lucwan ki i lobo tugi kunu.’”

Jo Aciria dok gucwalo lok me bura mukene

(2 Luk 19:8-19)

8Ka Larabcake odok, ci onongo rwot me Aciria tye ka lweny ikom Libna; pien onongo owinyo ni rwot otyeko a woko ki i Lakic. 9Lacen ingeye, rwot owinyo lok ikom Tiraka rwot me Etiopia, ni otingo yoo me bino ka lweny ikome, en dok ocwalo lukwena bot Kejekia kun waco ni, 10“Wubiwaco bot Kejekia rwot me Juda kit man ni, ‘Pe iwek Lubangani ma igenoni obwoli ni pe ebimiyo Jerucalem i cing rwot me Aciria. 11Nen, dong ityeko winyo gin ma rwot me Aciria otimo ikom lobo ducu. Tika dong iwinyo kit ma en otyekogi kwede woko, ci in kono itamo ni ibibwot ningning? 12Kwariwa yam gujwero taun madito me Gojan, Karan ki Recep, ci guneko jo Eden ma onongo yam gibedo i Telacar, ento jogigi mo pe olarogi. 13Luker ma giloyo taun madito magi kono gitye kwene? Rwot me Kamat, ki me Arpad, rwot me Ceparvaim, ki me Ena kacel ki me Iya, gin ducu kombedi gitye kwene?’”

14Ci Kejekia ogamo waraga ki i cing lukwena meno ci okwano. Ka oa ocito i Ot pa Rwot, ci oyaro waraga meno woko inyim Rwot, 15ci olego Rwot ni, 161“Ai Rwot Lubanga me mony, Lubanga pa Icrael, ma ibedo iwi komkeri ka wi lukerubi; in keni giri aye ibedo Lubanga ma iloyo dul lobo ducu ma iwi lobo. In aye ma icweyo polo ki lobo. 17Tim ber icik iti iwinywa, ai Rwot, yab wangi inenwa, dok bene iwiny lok ducu ma Cenakerib ocwalo kun cayo kwede in Lubanga makwo. 18Ada, ai Rwot, wangeyo ni luker me Aciria guneko rok ducu ma omiyo lobogi odong nono, 19dok bene guwango lwak jogigi woko ki mac; pien onongo gin pe Lubanga kikome, gin tic me cing dano, yen ki got keken, ma omiyo kityekogi woko. 20Piman kombedi dong, ai Rwot Lubangawa, larwa ki icinge, wek ker ma iwi lobo ducu gunge ni in giri aye ibedo Lubanga keni.”

Lok ma Icaya owaco bot rwot Kejekia

(2 Luk 19:20-37)

21Icaya wod pa Amoj odwoko lok bot rwot Kejekia kun wace ni, “Rwot Lubanga pa Icrael owaco kuman ni: atyeko winyo legani ma icwalo bota pi Cenakerib rwot me Aciria. 22Man aye dong lok ma Rwot owaco ikom Cenakerib: jo Cion gicayi in Cenakerib; anyaka Jerucalem ma pud rini bene cayi, kun yengo wiye ki ingeyi. 23In icayo anga, anga mono ma iyetoni? Imoro dwoni ikom anga, ma itingo wangi ki awakani? In icayo Ngat Maleng me Icrael kulu! 24In aye ma imiyo lukwenani gucayo Rwot, dok iwaco ni in i ito malo iwi godi kun itye ki lwak gadigadi lwenyi, nio wa malo iwi got Lebanon. Iwake bene ni itongo yadi cedar maboco ki kunu woko ki yadi ciprec mabecone madani; ki ni adonyo bene i bungana kamabor, kama yadi ocule iye liking. 25In iwake bene ni in aye ikwinyo wang it mapol, dok ni imato pii pa lurok; inyono lobo Ejipt, itwoyo pii ma i jang kulu Nail ducu. 26In peya iwinyo bo ni atyeko yubu wacon ca? Gin ma atye katimo kombedi yam ayubu wa ikare macon ca, ni in myero itur taun madito ducu ma kicelo ki cel gogo, ilokgi odok obur ma odure lipim. 27Jo ma gibedo iye onongo dong gudoko goro; kun cwinygi obale, lewic omakogi, gudoko macalo ginapita ma i poto gicalo lum alita, gicalo lum ma otwi iwi ot ma obware woko ma pud otwi atwiya. 28Ento angeyo bedoni piny, ki citoni woko ki donyoni i ot ki jenyeni ikoma. 29Pien ibedo ka jenye ikoma ki akemo, lok me nyateni bene otyeko donyo i ita, ma omiyo abirwako golina i umi, abiketo tola i dogi, abidwoki cen i yoo kama yam iwok ki iye.”

30Lacen Icaya owaco bot rwot Kejekia ni, “Man aye gin ma binyutu gin ma bitime. I mwaka man ki i mwaka ma lubu wubicamo cam ma otwi kene, ento i mwaka me adeke wubicoyo kodi, dok wubikayo kac, wubipito olok, dok bene wubicamo nyige. 31Jo ma bibwot, ma gibidong ki i ot pa Juda gibibedo macalo yat ma oguru lwite odonyo piny i ngom, dok ma nyako nyige lamalo. 32Pieno jo ma gudong gibikato woko ki i Jerucalem, lwak jo ma obwot gibikato woko ki iwi got Cion. Man bitime pi arima ma Rwot me mony tye kwede pirwu.

33Pimeno Rwot owaco lok kuman ikom rwot me Aciria ni, ‘En pe bidonyo i taun madit man, pe bene bibayo atero mo iye, pe gibidore ki kwotgi me nyiko cok kwede, pe bene gibitoro cel lobo me rumune woko. 34En bidok cen ki ngeye kun lubu yoo mayam en obino kwede, pe bidonyo i taun madit man. Man an Rwot kikome aye aloko. 35An abilweny pi taun madit man me larone pira kena ki pi latica Daudi.’”

36I dyewor meno lamalaika pa Rwot ocito, oneko jo Aciria alip miya acel ki pyere aboro wiye abic ki i gonygi. Ka dano gua malo odiko con, ci nen, gunongo kom jo Aciria ma oto orade lirat. 37Cenakerib rwot me Aciria ocako a ocito, odok wa i gange ci obedo i Nineve. 38Ikare ma Cenakerib tye kamiyo woro i ot pa lubangane Nicirok, ki awobene, Adramelek ki Carejer guneke woko ki pala lucwan, ci guringo woko gularo komgi wa i Ararat. Ci wode, Ecar-kadon aye oleyo katyene.