Icaya 38

Two pa rwot Kejekia ki cange

(2 Luk 20:1-11; 2 Tek 32:24-26)

1Ikare meno two omako Kejekia ma onongo cok to woko. Lanebi Icaya wod pa Amoj ocito bote ci owace ni, “Rwot owaco kuman ni, ‘Yub odi obed maber pien ibito woko, twoni pe bicang.’” 2Kejekia oloko wange ikom kicika ot olego Rwot 3kun waco ni, “Tim ber, ai Rwot, kong ipo, inen kit kwo ma abedo kwede inyimi, kun abedo ngat ma geni, alubu loki ki cwinya ducu, kun abedo katiyo gin manen maber i wangi.” Ci Kejekia ocako koko matek tutwal kun cwinye cwer. 4Cutcut lok pa Rwot dok obino bot Icaya kun wace ni 5owac bot Kejekia ni, “Rwot Lubanga pa kwarowu Daudi owaco kuman ni, ‘Atyeko winyo legani, dok bene aneno pig wangi; nen, abimiyo dok pud ibedo i lobo pi mwaka apar wiye abic. 6Abilari kacel ki taun madit man ki i cing rwot me Aciria, dok bene abigwoko taun madit man.”

7Man aye lanyut ma binyuti ni Rwot bitiyo gin ma otyeko ciko pire: 8Rwot bicoro tipu ceng dok cen tyen apar ki ikom gin me poro ceng pa Akaj. Tipu ceng bene odok cen tyen apar kulu ma onongo okato ikom giporone.

9Ikare ma dong Kejekia ocang ki itwone, ocako coyo wer man me pako Lubanga ni,

10“Yam onongo atamo ni abito ma nongo pud atektek,

atamo ni onongo dong icwala woko i lobo pa jo ma oto,

kacito kabedo kunu dong matwal pi kare me kwona ducu.

11Onongo yam atamo ni pe dong abineno Rwot

i lobo pa jo makwo;

pe dok abineno dano mo,

ki ikin jo ducu ma gibedo iwi lobo.

12Onongo dong kiputu kwona woko, kitero kamabor,

calo kema pa lakwat ma kiputu woko,

adolo kwona woko calo lacwe bongo ma odolo bongo,

ma ongolo woko ki ikom yat lacwe bongo.

Rwot, onongo dong imiyo kwona ni ogik woko,

ma ocake odiko o kwede wa i dyewor.

13Akok dyewor benebene pi kony kun atye ki arem madit tutwal;

Rwot oturu cogona woko ducu calo labwor.

Rwot, onongo dong imiyo kwona ni ogik woko,

cake odiko o kwede wa i dyewor.

14Dwona onongo dong winye calo lakalagwec ma kok, nyo owalu,

onongo dong akok calo akuri.

Wanga onongo dong ojony woko ki neno malo,

kiuna dong marac; ai Rwot, lara do!

15An kono dok atwero loko gin ango?

Pien oloko kweda, dok en kikome aye ma omiyo man otime,

i dyewor pe anino wa ki acel,

pi cwercwiny ma onongo atye kwede.

16Ai Rwot; dano bedo kwo pi gin magi,

an gira kwona ocung ikomi keken;

canga woko wek abed kwo.

17Nen cwercwiny madit ma onongo

atye kwede, oloke odoko me kela kuc;

in aye ilaro kwona ki i dog bur me to,

pien ibolo bala woko ducu tung ngeyi.

18Pien pe tye ngat mo i lobo pa jo ma oto,

matwero paki kun pwoyi bene; jo ma donyo piny i lyel

pe dok gitye ki gen ikom geneni.

19Dano makwo aye twero pako in,

kit macalo an tin apaki kwedeni;

won lutino tito ki lutinone,

kit ma in igene kwede.

20Rwot dong cok lara,

wabigoyo nanga ki opuk kun wapaki kwede,

wabiwero wer me paki i odi kama kiwori iye,

pi kare me kwowa ducu.”

21Icaya onongo owaco bot rwot ni kiod nyig oduru ci kimwon iwang odeke pa rwot, wek bure ocang woko. 22Rwot Kejekia onongo openyo ni, “Gin ango ma binyutu ni abicito i Ot pa Rwot?”