Icaya 39

Lukwena ma gua ki i Babilon

(2 Luk 20:12-19)

1Ikare meno rwot me Babilon, Merodak-baladan wod pa Baladan, owinyo ni rwot Kejekia kome lit; ci ocwalo lukwena gutero waraga kacel ki mot bote, pien onongo dong bene owinyo ni twone ocang woko. 2Kejekia ojologi maber, ocako nyutu botgi ot kano lime ducu; guneno ryal ki jabu, angwece, moo me wel, ki ot kano jami lwenye ducu. En onyutu botgi gin ducu ma onongo tye i ot kano jamine. Pe tye gin mo ma odong ma en pe onyutu botgi ma onongo tye i ode ki i lobo ducu ma onongo tye ite loce. 3Lacen lanebi Icaya obino bot rwot Kejekia, ci openyo ni, “Jo meno guwaco lok ango? Gin kono gua ki kwene?” Kejekia ogamo ni, “Gua ki i lobo mabor, wa i lobo Babilon.” 4Icaya dok openye ni, “Guneno gin ango ki i odi?” Kejekia ogamo ni, “Gutyeko neno jami ducu matye i oda; pe tye gin mo ma odong matye i odi kano lima ma pe anyutu botgi.”

5Ci Icaya owaco bot rwot Kejekia ni, “Kong dong iwiny lok ma Rwot me mony owaco. 6En owaco kuman ni, ‘Kare dong cok romo, ma jami ducu ma i odi, ki mayam kwarini gukano nio wa onyo, kibiterogi woko wa i Babilon; pe tye gin mo ma bidong kadi ki acel, man Rwot aye ma owaco. 71Ki awobeni mogo bene, ma in inywalogi, kibiterogi woko bene, kibikolo man gi woko, ci gidoko lutic i gangkal me Babilon.’”

8Rwot Kejekia onongo oniang ni kuc bibedo tye ikare me loce labongo alokaloka mo, omiyo en owaco bot Icaya ni, “Lok pa Rwot ma iwaco botani tye mere maber.”