Icaya 20

Lanyut me wot munero pa Lanebi

1Ite twero pa Cargon rwot me Aciria, lawimony madit me Aciria olwenyo ikom taun madit me Acidod, ci omayo woko. 2Ikare meno kikome aye Rwot omiyo lok bot Icaya wod pa Amoj ni, “Cit igony bongo cola woko ki i pyeri, ka igony war woko bene ki i tyeni.” Ci Icaya ocito otimo kitmeno, odong munero ma wa war bene peke i tyene. 3Ikare ma kimayo Acidod, Rwot owaco ni, “Kit macalo latica Icaya owoto munero, kun tyene bene tye nono, pi mwaka adek kulu pi nyutu gin ma bitime ikom jo Ejipt ki jo Etiopia, 4kitmeno bene rwot me Aciria bitero jo Ejipt woko i opii, ki jo Etiopia bene. Kibitero jo matino ki jo madito kun giwoto munero, ma tyen gi bene tye nono, ki dudgi bene tye nono, ci man bikelo lewic ikom Ejipt. 5Man bibalo cwinygi woko, ki lewic bene bimakogi pi Etiopia mayam onongo gigeno, ki pi Ejipt ma onongo yam ginyate kwedeni. 6Inino meno jo ma bedo i dog nam gibiwaco ni, ‘Kong dong wunen gin ma otime ikom jo mayam wageno, mayam waringo walaro botgi wek gukonywa, wek bene gularwa ki i cing rwot me Aciria. Ci man dong wabibwot ningning?’”