Icaya 19

Lubanga bipwodo Ejipt

11

Man aye lok ma pire tek ma kitito ikom Ejipt.

Nen, Rwot tye kawot madwir tutwal i pol, kun woto bino kwede i Ejipt. Cal jogi me Ejipt komgi bimyel inyime, cwiny jo Ejipt bibedo karyange aryanga.

2Rwot owaco kuman ni, “Abitugu jo Ejipt me lweny ikom wadigi keken gi, dano acel acel bilweny gin ki omine, ngat acel acel bene bilwenyo gin ki lawote, taun madit acel bilweny ikom taun madit mukene, ki ker bene bilweny ikom ker wadigi. 3Cwiny jo Ejipt dong bibale woko matwal, tamgi mayam gumoko ducu bitur woko, gibicito ka penyo tam ki bot cal jogi apaya ki bot lutyet, ki bot lukor tipu ki ajwaki. 4Dok abimiyo jo Ejipt i cing rwot ma loce gwa atika, rwot mager tutwal aye ma biloyogi. Man lok ma an Rwot Matwero ducu aye awaco.”

5Pii me kulu Nail bene bidwon woko, pii ma icwiny kulu kikome bitwo woko. 6Yoo pii ma kikwinyo akwinya bidoko ngwe, jang kulu Nail me Ejipt bidwon ci two woko ducu, lagada kacel ki togo ducu matye iye gibitop woko. 7Lobo matye inget kulu Nail ducu bital woko doko bar, i dog kulu Nail kikome, ginapita ducu ma kicoyogi inget Nail bitwo woko, ci yamo bikologi wacen ma pe dok binen. 8Lumakrec gibikumu dok gibikok, jo ducu ma yutu rec ki goli i kulu Nail; jo ducu ma giciko obwogi idye pii gin ducu cwinygi bibale woko. 9Jo ma cwero tol tworo ki jo ma cweyo bongo matar cwinygi bia woko ki ikom ticgi. 10Jo ma kigenogi tutwal ki i lobo meno, kibinginyogi woko, dok jo ducu ma camo mucara cwinygi bibale woko.

11Luloc me Joan giming mada; luryeko ducu mamiyo tam bot Parao, gin ducu gimiye tam me mingo keken. Itwero waco bot Parao ningning ni, “Kwariwa ducu yam gubedo jo maryek?” Dok ni, “Kwariwa ducu yam gubedo luker?” 12Joni ma ryeki dong gitye kwene? Kong gutiti lok wek inge gin ma Rwot me mony oyube me timo ikom Ejipt. 13Rwodi me Joan dong guloke gudoko luming, ki me Mempic kibwologi woko; jo ma gubedo lutel wigi i kakagi ducu aye ma omiyo jo Ejipt ongak. 14Rwot dong oketo cwiny me adwala i igi; omiyo jo Ejipt dong gicato acata i gin ducu ma gitiyo, kit macalo lamero cato kwede ingoke. 15Dano mo pe bidong i Ejipt pe tye gin mo ma dano mo bitiyo, kadi latel wic nyo kadi dano mo ata, pe bibedo ki kony kadi lalonyo nyo lacan.

16Ikare meno jo Ejipt bibedo calo mon, kun komgi myel amyela kilworo pi cing Rwot me mony ma en biyengo ikomgi me pwodogi. 17Lobo Juda bimiyo lworo bot jo Ejipt; jo ducu ma gibiwinyo nyinge gibibedo ki lworo pi lok ma Rwot me mony dong otyeko yubu con me timo ikomgi.

18Ikare meno leb jo Kanaan kibilokone i taun madito abic matye i lobo Ejipt, dok bene gibikwongo kwong i nying Rwot me mony. Dong taun madit acel ki ikin gi kibilwongo ni, “Taun madit me Ceng.”

19Ikare meno keno tyer pa Rwot bibedo idye lobo Ejipt, ki got ma kicibo ocung atir pi po pi Rwot bicung iwang lobone kikome. 20Got man bibedo macalo lanen ma nyutu ni Rwot me mony tye i Ejipt. Kace jo ma kunu bikok bot Rwot pi jo ma unugi, ci en bicwalo botgi ngat ma bilarogi, ngat ma bilok kun cung pirgi ka dok bilarogi. 21Rwot binyute kene bot jo Ejipt. Ikare meno jo Ejipt bingeyo Rwot, gibiwore kun gityero bote mot ki gitum awanga, dok bene gibikwongo kwongi inyim Rwot ci gibicobo cikegi. 22Rwot bipwodo jo Ejipt kun goyogi ka dok cangogi woko. Gibidwogo cen bot Rwot, ci en biwinyo legagi dok bene bicangogi.

23Ikare meno yoo gudu bia ki i Ejipt cito wa i Aciria. Jo Aciria bicito i Ejipt, jo Ejipt bene bicito i Aciria, dong jo Ejipt kacel ki jo Aciria, gin ducu biworo Lubanga kacel.

24Ikare meno jo Icrael bibedo me adek me bedo kacel ki jo Ejipt ki jo Aciria, ci gibimiyo lobo ducu bedo ki gum. 25Rwot me mony bimiyo botgi gum, kun waco ni, “Gum obed ikom jona jo Ejipt, ki ikom jo Aciria, ma gin aye jo ma an acweyogi ki cinga, ki ikom jo Icrael ma gin dong gudoko jona kikome.”