Icaya 18

Lubanga bipwodo Etiopia

11

In lobo matye loka kulu Etiopia, kama bwom ngur winye iye2 calo yamo lapiru. 2Ma ioro lukwenani ma cung pi loboni giwok ki i kulu Nail, kun giwoto ki yeya ma kitiyo ki togo ma kwang iwi pii! Wudok cen, wun lukwena madwir, wudok bot rok ma jone gudongo maboco dok ma komgi pwot, bot rok ma jone kilworogi i kabedo ducu, rok matek, ma jone aye loyo i lweny, ma kulu mapol opoko lobogi woko idyere.

3Wuwiny, wun jo ducu ma wubedo iwi lobo, wun jo ma wubedo i lobo, kace kitingo bendera malo iwi got, myero wunen! Ka kikutu buriji, myero wuwiny! 4Pien Rwot owaca ni, “Abineno lalingling ki i kabedona, calo lyeto me ceng maryeny dyeceng, calo pol mamiyo toyo luk ikare me kac. 5Pien ma pud peya kare me pwono olok oromo, ma ture dong ocako o woko, kun ture dong oluru odoko nyig olok ma dong ocako cek, ci merok bityeko jo Etiopia woko calo pala ma ngolo jang olok. 6Kibiweko kom jo ducu ma kinekogi ata bot acut matye iwi got malo, ki bot lee me tim. Acut bicamogi woko i oro, ki lee me tim bicamogi woko i cwir.”

7Ikare meno rok ma jone odongo maboco ma komgi pwot, gibikelo mot bot Rwot me mony. Gin rok ma jone kilworogi i kabedo ducu, rok matek, ma jone aye loyo i lweny, ma kulu mapol opoko lobogi woko idyere. Gibikelo motgi iwi got Cion, kama kiworo iye Rwot me mony.