Icaya 17

Lubanga bipwodo Ciria ki Icrael

11

Man aye lok ma pire tek ma Rwot otito bot Icaya ma kemo Damaciko. En owaco ni, “Nen, Damaciko dong pe bimede ki bedo taun madit, ento bidoko obur matwal. 2Taune ducu kibiweko doko tim matwal; bibedo kacam pa romi ki dyangi keken, ma gibibutu piny kunu ma ngat mo bibedo peke mamiyo lworo makogi. 3Cel matek birwenyo woko ki i Epraim, ker bene birwenyo woko ki Damaciko; ento jo ma gudong gibibedo macalo deyo pa jo Icrael. Man lok pa Rwot me mony kikome.”

4Inino meno deyo pa Yakobo bijwik woko, can bileyo ka lonyone. 5Icrael bibedo macalo poto ma kikayo bel ki iye, ma iye odong nono calo nota Repaim ma kibeko wit bel ducu ki iye. 6Jo ma manoknok aye bidong, kit macalo kipwono kwede nyig jeituni, ma nongo dong aryo nyo adek keken iwi jange mamalo; ki angwen nyo abic keken aye dong i jang ma piny. Man lok pa Rwot Lubanga me Icrael kikome.

7Ka nino meno oromo, dano gibiloke neno Lacwecgi pi kony, gibiciko wanggi kun gineno Lubanga Maleng pa jo Icrael. 8Dong pe gibiketo gen gi ikom keno tyer mayam gutiyo ki cinggi, pe gibigeno gin ma gin ki komgi yam gutiyo, kadi yadi ma kipito kama kiworo iye jok ma dako ma kilwongo ni Acera nyo keno tyer me wango odok eceta.

9Inino meno taun gi madito matego bibedo calo taun madito pa jo Kiv ki pa jo Amor mayam gua woko ki iye pi lworo jo Icrael. 10Pien wun jo Icrael wiwu dong owil woko ikom Lubanga ma olarowu dok ma gwokowu macalo got matek kama wuringo wularo iye. Pimeno kadi bed wupit gin mogo ma yomo cwiny, dok bene kadi bed wupit yadi mogo ma gin yadi pa lubanga pa lurok, 11kadi wumii gutwi inino meno ma wupitogi iyeni, dok kadi wumiyo gituru woko i odiko ma kipitogi iye, ento pe wubikayo iye gin mo, wubibedo ki can ki arem ma pe gik keken.

Kiloyo lumerok

12Kong wuwiny kit ma lwak me rok mapol dwongi mor kwede calo kot ma mor; gimwoc ki woo kit macalo pii nam twage kwede. Kong wuwiny woo pa lwak me rok mapol; giwoo calo mor pa pii biamwonyi matek matye ka twage. 13Lurok tye kabino ki woo calo twage pa pii madit tutwal, ento Lubanga bijukugi, miyo giringo woko kamabor; kibiryemogi woko calo cung kal ma yamo tingo tero iwi got malo, dok macalo apwa ma wire ikare ma yamo kot tye kakodo matek adada. 14Ki otyeno lurok gimiyo lworo madit mada, ento ma nongo piny peya oru gibibedo peke! Meno aye can ma bipoto ikom jo ma giyako jamiwa ki i lobowa, meno aye dul ma kipoko botgi gin jo ma yakowa.