Icaya 16

Piny obwoyo Moab

1Gucwalo lutino romi me pwoc bot laloc me Jerucalem, gucwalo ki i Cela, obino owok ki i tim aroo, ci guterogi iwi got Cion. 2Mon me Moab kitenyogi woko ata iwang wat me kulu Arnon ci gibibedo kawire atata calo lutino winyo ma kikeyogi woko atata ki i odigi. 3Gin giwaco bot jo Juda ni, “Wutit ki wan gin ma myero watim. Wugwokwa wunu calo tipu yat; macwalo tipune icwiny dyeceng amac wek waywe iye. Wan oring ayela wugwokwa wunu kama pe kiromo nongowa. 4Wuwek jo Moab ma kiryemogi wokoni gubed ikinwu; dong wubed macalo kalaregi ki i cing jo ma dong otimogi maliti.”

Ikare ma nongo jo mayam unugi dong gipeke, ki nek ki unu dano bene nongo dong ogik woko, ki ngat ma nyonogi diyogi piny bene dong orwenyo woko ki i lobo, 5ci ikare meno aye lakwar Daudi kibicibo iwi komker me mar ma pe loke, en dano ma gene, ngat ma ngolo kop, dok ma mito ni kingol kop kakare, ngat ma kome mit katiyo gin matye atir. 6Jo Juda owaco ni, “Wan wawinyo pi wake pa Moab, kit ma onongo giwake kwede; wakegi, lyeregi ki ngalagi, wa nyateginu ducu obedo goba keken.” 7Pimeno wek jo Moab gukoki, dano ducu myero gukok pi lobo Moab, Myero gukok matek pi pok olok mutwo me Kir-karecet mayam gubedo kacamoneni. 8Poti ma i Kecbon ducu dong gubale woko, ki olok me Cibma; olok mayam kongo bwinone mero rwodi me rok dong kiretogi woko piny. Jange onongo yam ojany oo wa i Jajer, olak oo wa i tim; jange matocone yam ojany matek, okade ongolo dye nam woko arii. 9Meno aye gin ma omiyo atye ka kok pi olok me Cibma, kit macalo akok kwede pi taun madit me Jajer; pig wanga cwer pi, Kecbon ki Eleale; pien kac dong peke mamiyo dano bedo ki yomcwiny. 10Yomic ki yomcwiny madwong dong kikwanyo woko ki i poti mayam olok nyak iye matek ca, dok bene pe dong kiwero wer i poti olok, woo mo bene pe dok winye iye, nyono olok i bur me biyo kongo bwino bene dong ogik woko; ki woo mayam dano giwoo kwede ka gipwono oloki dong peke. 11Meno omiyo cwinya tuge tutwal me loko lok ikom Moab calo nanga ma kok, cwinya tuge bene me loko lok ikom Kir-kerec.

12Jo me Moab mine ken gi me cito i abilagi matye malo iwi godi kaworo lubangagi ento pe bikonyogi wa ki acel.

13Man aye lok mayam Rwot oloko con ikom Moab. 14Ento kombedi Rwot owaco ni, “I mwaka me adeke ma obedo kit ma calo lapakaca kwano ki mwaka me ticeni, deyo pa Moab bidoko ginacaya kadi bed en tye ki lwak jo mapol ata. Jo mo ma bibwot gibibedo nok tutwal, dok bene nongo dong gin jo ma goro keken.”