Icaya 15

Lubanga bityeko Moab

11

Man aye lok ma pire tek ma kitito ikom Moab. Taun madito me Ar ki Kir dong kijwerogi woko i dyewor acel keken, omiyo Moab dong ogik woko.

2Jo Dibon dong gucito malo i abilagi kakoko kunu; jo Moab tye kakok pi Nebo ki pi Medeba. Wi dano ducu dong kilyelo woko pi kumu, yer tikgu ducu bene dong kilyelo woko. 3Dano giruku bongo cola idye gudu; ki iwi odigi kadi wa idye taun madito dano ducu kok ma pig wangi mol amola i korgi. 4Jo Kecbon kacel ki jo Eleale bene gitye kakoko, dwongi winye kamabor wa i Jakaj. Pimeno lulweny me Moab gudoko lwor mada; cwinygi dong ongabe angaba ma kerugi dong otum woko. 5Cwinya ton tutwal pi Moab; jo ducu mayam gibedo iye, dong guringo woko i Joar, guringo bene wa i Eglat-celiciya. Guito cere me Lukit, gucito malo kun gikok ki pig wanggi; ki i yoo ma cito piny i Koronaim gikok ka gineno kit macalo lobo dong kibalo kwede. 6Pii ma i Nimrim dong otwo woko liweng; lum oner woko pe dong twero lot, gin mo ma twi bene dong peke matwal. 7Pimeno jami mabup mayam onongo kinongo, kacel ki jami mayam kikano, gin ducu dong kiyakogi gitero woko loka ora Kulu Caka. 8Koko madwong tutwal tye kawinye, ma oromo i lobo Moab woko ducu; koko tye kawinye wa i Elam, dok bene dong owinye wa i Beer-elim. 9Pii me Dibon dong odoko remo keken; kadi bed kumeno pud dok abimedo can mukene ikom Dibon, abikelo labwor kikome dong ikom jo Moab ma gubwot ma guringo woko, wa ikom jo ma gudong i lobo meno.