Icaya 14

Rwot bidwoko jo Icrael i lobogi

1Rwot bitimo kica ki Yakobo, biyero jo Icrael doki, ci dwokogi i lobogi kikome, rok mukene biribe kwedgi, ci dong gimoko matwal ikom ot pa Yakobo. 2Rok mapol bilwoko jo Icrael terogi i kabedogi, ka dong jo Icrael lokogi woko gidoko opiigi ki angecagi i lobo pa Rwot; gibimako jo mayam omakogi giloko gidoko opiigi, dok gibiloyo jo mayam ounugi.

Rwot me Babilon i lobo pa jo ma oto

3Kare ma Rwot bimiyowu iye yweyo ikom can mewu, ki ikom myelcwiny ma wubedo kwede ki tic mapek ma wubedo katiyone, 4wubicako nywaro rwot me Babilon ki wer kuman ni, “Kong inen kit ma ngat mayam unu danoni dong kwone otum kwede , kit ma kolo mager pa won pala dong okwe kwede mot! 5Rwot dong oturu teko pa jo maracu woko, kacel ki twero me ker pa luloc, 6jo ma gubedo ka goyo lurok kun gitye ki akemo madit adada, ma pe gijuku cinggi ikomgi; jo ma gubedo kaloyo lobo ki kiniga, ma pe guweko keto ayela ikomgi. 7Lobo dong oywe, tye ma okwe mot, jo ma bedo iye dong gimoro wer keken. 8Yadi ciprec cwinygi yom piri, ki yadi cedar me Lebanon giwaco ni, ‘Cake ma dong kituru keri woko, ngat mo ma bino ka tongowa dong peke.’ 9Lyel tye ka yube me jolo rwot me Babilon, me rwate kwede kabino, tye kacoyo tipu pa jo ma oto me bino ka mote, jo ducu mayam gubedo lutel iwi lobo; luker ducu mayam guloyo rok omiyogi ducu gua woko ki iwi komkergi. 10Gin ducu gibilok, kun giwaco boti ni, ‘In bene dong idoko goro calo wan! Dong idoko calo wan! 11Deyoni dong kiketo woko piny i lyel, kacel ki koko nangani; kwidi dong gudoko kitanda ma ibutu iwiye, ki kwidi ma camo kom danoni dong gudoko giumi.’ 121

In rwot me Babilon, in lakalatwe me rupiny! Kit ma imwome ki i polo i poto kwede piny! Kit ma kiboli kwede woko piny, in ma ireto rok mapatpati! 132Iwaco ki i cwinyi ni, ‘Abiito acito malo i polo; abicibo komkera malo iwi lakalatwe pa Lubanga; abibedo iwi got me coke kamabor tung kumalo. 14Abiito malo tutwal iwi pol, dong abikete kena me bedo macalo Ngat Mamalo Twal.’ 15Ento in dong kikeli kiketi woko piny i lyel, ite bur kama tut adada. 16Jo ma oto ma bineni gibiciko wanggi ikomi kun gipenye ni, ‘Man pe en ngat ma nene omiyo kom lobo ducu myel tutwali, ma bene omiyo ker mapol oyenge?’ 17Pe en aye mayam omiyo lobo odoko calo tim aroo, ma obedo ka reto gangi ma iye woko liweng, ma pe oye ni lumabuce gudok cen paco?

18Luker me rok gibutu gigi piny i lyelgi ki deyo, ngat acel acel butu i lyele ma kiyike iye; 19ento in dong kiboli woko cen kamabor mada ki lyeli, calo jang yat ma konye peke, kiumu komi ki kom dano ma kineko, jo ma kicobogi ki pala lucwan, jo ma donyo piny i gweng matye ite bur matut piny, macalo kom dano ma oto ma kinyono piny. 20In pe ibiribe kwedgi ka kiyiki, pien in dong ibalo loboni woko, dok ineko lutuwu woko. Likwayo pa lutim maracu pe myero dong kicak nyinggi matwal! 21Wuyub ka neko lutinone pi bal alii pa kwarogi, wek pe dok gua gulo lobo, guger taun madito obed mapol ata iwi lobo.”

Lubanga bityeko jo Babilon woko

22Rwot me mony owaco ni, “Abia ka lweny ikom jo Babilon, abimiyo nying dano rwenyo woko ki i Babilon, dano mo pe bidong iye, kadi lutino matino nyo likwayo. 23Abimiyo okodo3 leyo lobogi, dok bene kama pii pong gure iye bibedo pol ata; abiyweyo Babilon woko maleng ki oywec matyeko dano woko liweng, an Rwot me mony dong awaco.”

Lubanga bityeko jo Aciria woko

244

Rwot me mony dong okwongo kwong ni, “Kit ma dong atyeko yubune kwede con, bitime bene kitmeno, kit macalo atamo kwede bitime bene dong kumeno. 25Abityeko jo Aciria woko ki i lobona, abinyonogi woko piny iwi got ma mera; ayokone biluny woko bene ki ingut jona, ki terne bene ki bilunyu woko ki iwi gwokgi. 26Man aye dong gin ma ayubu ma okemo lobo ducu; dok man cinga ma dong atyeko ryeyone me pwodo rok ducu.” 27Rwot me mony dong otyeko yubu yube woko, anga mono ma dok bibalone? Dok bene oryeyo cinge woko, anga kono ma dok bidolone?

Lubanga bityeko jo Piliciti woko

285

Lok man yam obino oa ki bot Lubanga i mwaka ma rwot Akaj oto iye, kun waco ni, 296

“Wun jo Piliciti ducu, cwinywu pe obed yom ni pien odoo mayam gibedo kagoyowu kwedeni dong otur woko, pien ororo bia ki ikin likwayo twol, tonge bitoko doko twol ma tuk cito malo. 30Rwot bikwayo jo ma lucan ki ikin lwake, bimiyo jo ma piny obwoyogi butu piny ki kuc; ento in, abimiyo kec neko likwayi woko, joni mogo ma gudonge bene abinekogi woko.

31Dong oduru, in dog cel, in taun madit bene ikok ba; wun jo Piliciti ducu, wumii lworo ocak onyo koyo ikomwu! Pien lukwor tye kabino ki tung kumalo, pe tye dano mo ma ikin gi ma opoke kene.

32Wubiwaco gin ango, bot lukwena pa rok meno? Wubiwaco ni, ‘Rwot omiyo Cion ocung matek, jone ma kiunu dong gunongo kalare kunu.’”