Icaya 13

Lubanga bipwodo Babilon

11

Man lok ma pire tek ma Lubanga owaco bot Icaya wod pa Amoj ikom Babilon. 2Wuting bendera malo ki iwi got, wulwongi ki dwon malongo, wugwelgi wek gudony, i dog cel pa ludito me awora. 3An Rwot ki koma dong aciko lwaka ma dong awiro, dong alwongo oteka lwenya, wek kinigana ocobe kakare. 4Kong wuwiny woo matye malo iwi godi calo woo pa lwak dano ma gucoke lipim! Kong wuwiny kit ma jo me ker ducu, ki jo me rok gitye kakok kun gicoke kacel! Rwot me mony tye kaywayo monye pi lweny. 5Gia ki i lobo matye kamabor tutwal, gibino kun gia ki i agiki me te polo; Rwot tye ki akemo, obibino ki jami lwenye me tyeko lobo woko ducu. 62Wukok, pien nino pa Rwot dong tye cok; bibino calo topiny ma oa ki bot Won Twer Ducu! 7Meno bimiyo cing jo mapol doko goro, dok dano acel acel cwinye bitur woko lirut, 8cwinygi ducu bipong ki lworo. Arem madit me lworo ki me kumu me can bimakogi matek; gibitwenye calo dako matye ki arem me nywal. Gibinene keken gi kun komgi myel; wanggi biboke woko calo mac. 9Wunen, nino pa Rwot tye kabino. Nino mager, dok akemo ki kiniga ma mager dong omake, ma bimiyo lobo dong obur, tyeko lubalo woko ducu ki iye. 103Pien lakalatwe me polo ki dulgi pe gibiryeny; ceng bicido woko macol licuc ma pud nongo tuc atuca ki tung kunyango, dwe bene pe biryeny. 11Abiketo can ikom lobo pi time marac, ki ikom jo maracu pi balgi; abigiko wake pa jo ma ginyate, abimiyo jo ma lyere ma pe gin lukica kwe woko. 12Abimiyo dano bibedo nok tutwal makato jabu ma kiliyo mabere; wel dano bene bibedo nok tutwal makato jabu me Opir woko. 13Pimeno abimiyo polo yenge, lobo bene biyenge ki i kabedone pi akemo pa Rwot me mony, inino me kinigane mager tutwali. 14Macalo ruda ma kitye kadwaro, nyo romi ma ngat mo peke ma cokogi kacel, ci dano acel acel bidok bot lutugi, ngat acel acel biringo dok i lobo tugi kikome. 15Ngat ma kibinongo, kibicobo iye kitucu woko pil, ngat ma kibimako, kibineko woko ki pala lucwan. 16Kibinyoto lutino lukeregi woko ma nongo gin bene gineno ki wanggi; kibiyako odigi woko bene, dok kibimako mon gi kibutu kwedgi tektek. 17Nen, atye kapiyo jo Medi woko me bino ka lweny ikom Babilon; gin jo ma pe paro pi lim, dok bene pe gibedo ki yomcwiny pi lonyo jabu. 18Kibicelo awobe ki aterogi ginekogi woko; kica pe bimakogi ikom lutino awobe; wanggi bene pe bibedo ki kica ikom lutino lukere. 194Dong Babilon ma deyone dit kato deyo pa luker mukene ducu, en taun madit maber ma jo Kaldaya giwake kwede tutwali, bibedo calo Codom ki Gomora mayam Lubanga oretogi woko. 20Dano pe dok bibedo iye, dano mo me Arab pe biguru kemane kunu, lukwat bene pe gibimiyo romigi butu piny kunu. 215Ento lee me tim aye bibutu kunu, gin makwo ma kok bipong woko i odigi; udu bene bibedo kunu, kun jogi nongo myelo amyela macalo nyogi oyima. 22Lalur bikok i odigi ma ocudu malo likung, ki too bene bikok i odigi mabeco me ker; Babilon dong pe birii, karene me gik dong cok tutwal.