Icaya 58

Rii kec me ada

1Rwot waco ni, “Dange matek, pe iling, yab dwoni owinye malongo calo koko tum, tit bot jona bal ma gin gutimo, tuc bot jo me ot pa Yakobo balgi. 2Nen kono giyenya nino ducu ba, cwinygi bene yom me ngeyo gin ma an amito ni guti, ginyute macalo jo me rok ma kitgi atir, ma pe giweko lubu cik pa Lubangagi, gipenya bene pi ngolo kop atir, cwinygi yom pi bedo cok ki Lubanga.”

3Dano gipenyo ni, “Pingo wabedo ka rii kec, kun in pe ineno? Pingo kono wabedo ka mwole kenwa inyimi, kun in pe iparo lok mo iye wa ki acel?”

Ci Lubanga gamo ni, “Kong wunen, inino me rii kecwu, wuketo mere tamwu itimo gin ma yomo cwinywu keken, kun bene wunu jo ma tiyo tic botwu. 4Kong wunen, wun wurii kec ki daa dok ki lweny, wudongo dano bene ki cingwu ma wungino woko ki kolo pi lweny. Kit rii kecwu ma wutye ka rii ikare man pe bimiyo dwonwu winye malo i polo. 5Wutamo ni kit rii kecwuni en aye gin ma an amito dok apwoyo, ma miyo dano bedo ka deno can, en rii kec ma dano kulu iye wiye piny calo lagada ma okule, peto bongo cola, pworo buru iye, ka dong cako butu iye, wulwongo man ni rii kec? Wutamoni man gin ma cwinya pwoyo?

6Kit rii kec ma an amito ene: gonyo tol me tim maracu woko, ki gonyo okol woko ki i tyen opii, weko jo ma kiunugi guwot ki kuc, ki turu okol woko ki i tyen dano. 71Wupok cam bot jo ma kec nekogi, wukel lucan ma pacogi peke i gangwu; ka wuneno dano matye munero myero wuruk bongo ikome, pe myero wukane woko ki inyim joni.

8Ci bera bituc boti macalo ceng me rupiny, ci wang buri matye ikomi bicang woko oyotoyot. Kit ma atir ma itye kwede bitelo nyimi, deyo pa Rwot aye ma bigengo ngeyi.

9Dok bene ka wulega, ci an Rwot abigamo legawu, wubikok bota, ci abigamo ni; ‘An ene.’ Kace, wubikwanyo okol woko ki ikinwu, ki cimo dano ki lwet cingwu, ki loko lok maracu, 10kace wubimiyo cam bot jo ma kec nekogi, dok bene wucobo miti pa jo ma kiunugi, man bimiyo ceng tuc pirwu ki i piny macol, piny macol licuc botwu biloke doko dyeceng. 11An Rwot abitelowu ikare ducu, dok abicobo mitiwu ki jami mabeco, abimiyo cogowu bedo matek; wubibedo calo poto ma kionyo pii iye ci pii oromo iye maber tutwal, wubibedo macalo pii ma gunye agunya kare ducu, ma piine pe two kadi ki acel. 12Wun wubigero gangwu iwi oburri macon doki, wun wubigero ikom acaki teguti mayam kwarowu gugero; kibilwongowu ni wun layub cel ma otur, jo ma yabo yoo mayam obale ducu doko maber.”

Mot pi gwoko ceng Cabit

13Rwot owaco ni, “Kace wuworo ceng Cabit macalo ceng maleng, dok wuweko timo gin ma yomo cwinywu inino maleng, kace wugwoko ceng Cabit macalo nino me yomcwiny, dok macalo nino ma Rwot olonyo ma obedo maleng me deyo; kace wuworo ceng Cabit kun pe wulubu yowu kenwu, kadi ki yenyo gin ma yomo cwinywu, nyo loko lok atata; 14ci dong wubinongo yomcwiny pi tic bota an Rwot, ci abimiyo kibiworo wun iwi lobo ducu; doki wubibedo ki yomcwiny i lobo mayam kwarowu Yakobo oleyo, pien an Rwot kikome aye ma dong awaco lok man.”