Icaya 57

Kikwero woro cal jogi apaya pa jo Icrael

1Dano ma kite atir to, ngat mo peke ma keto iye cwinye. Jo ma maro Lubanga kikwanyogi woko; ngat mo peke ma paro pirgi. Pien dano ma kite atir nongo kikwanyo woko ki i can, 2en cako donyo i kuc; jo ma bedo kun cwinygi atir giywe mot i kabutugi. 3Ento wun wubin wunyik cok bota kany, wun lutal, wun lutim abor, ki wun malaya. 4Meno wutye kanywaro anga ce? Wungamo dogwu malac kumeno ikom anga ma lebwu okati woko kumenoni? Wun lutim bal, ki wun lugoba. 5Wun aye jo ma woro jogi me nywal ite yat kworo, ite yadi ducu ma potgi oluk liyuk; dok wutyero lutinowu macalo gitum, i boro got? 6Wun wucoko got mapwot matye i lung piny ci wuworo gi macalo lubanga, gin jami meno ducu mewu; pien dong wutyeko tyero gityer amata woko botgi, wukelo bene gityerwu me moko kwon, ci wutyero. Cwinya bibedo yom pi kodi tim macalo meno? 7Dong wuketo kabutuwu iwi got ma wiye bor, wun dong wutyeko cito kunu ka tyero gitumwu bot jok. 8Wuketo bene cal jok inge kika ki inge yat me dogola. Pi weka woko, omiyo wulunyo bongiwu iwi kabutuwu, ci wulwongogi botwu, kun wucike kwedgi pi culugi, dok bene wumaro butu kwedgi pi cobo miti wu, kun wuneno tim munero me lewic. 9Wucito bot jok Molek ki moo, wumedo moowu ma ngwece kur onya odoko mabup; wuoro lukwenawu gucito kamabor, wucwalogi bene gucito wa piny i lyel pi yenyo lubanga mukene me awora. 10Wuolo komwu woko pi yenyo lubangagu, ento pe wuwaco ni, “Konye peke”; pien wutamo ni wunongo kwo manyen ma medo tekowu, omiyo pe wudoko goro giwu i wangayo.

11Rwot openyo ni, “Kit lubanga mene ma onongo wulworo tutwal, ma omiyo komwu myel, ma oweko wuwaco lok goba, ma omiyo wiwu dong owil woko pe wupo ikoma bo, ma pe dong wutwero tamo pira? Pe atemo diyo cwinya pi kare malac, ma oweko pe wubedo ki lworo mo ikoma? 12En kitwu ma wutamo ni tye atiri, ki gin ducu ma wutimo abitucu woko kamaleng, ento magi ducu pe bikonyowu. 13Kace wukok matek pi kony, gin cal jogiwuni myero gularwu do! Yamo bitingogi terogi woko, aluu dog bicwalogi woko wa cen. Ento ngat ma ringo laro bota bileyo lobo, dok bene bibedo ikom got mera maleng.”

Lubanga ocike me konyo ki cango jone

14Rwot biwaco ni, “Wutor yoo, wutor yoo, wuyub yoo, wuput ajut woko liweng ki i yoo pa jona.”

15Lubanga ma en Ngat Mamalo Twal, ma bedo nakanaka i kabedo ma otinge malo, ma bedo matwal, ma nyinge lengi, owaco ni, “An abedo i kabedo maleng ma otinge malo, dok bene abedo kacel ki dano mamwol, ma cwinygi cwer, dok ma gingut, pi miyo kwo manyen bot jo ma cwinygi cwer dok ma gingut. 16Pien pe abibedo ka pyem nakanaka, dok bene kiniga pe bimaka kare ducu, pien cwiny dano oa ki bota, an aye ma amiyogi yweyo me kwo. 17Bal pa jona ki paro lim aye oweko akeco; omiyo apwodogi, akane woko, kun kiniga maka, ento gumede ameda ki jemo kun gitiyo gin ma cwinygi mito. 18Dong atyeko neno kitgi, ento pud abicangogi; abitelogi, abiculugi bene ki gin ma kweyo cwinygi, kun amiyo jo ma kumu pirgi giloko lok me pwoc. 191Abimiyo kuc bot jo matye kamabor ki jo matye kamacok, dok bene abicango jona. 20Ento jo maracu gubedo calo nam ma twage, ma pe kong twero pye mot, kun piine kelo yugi ki coto keken. 212Kuc mo peke pi jo ma gin lutim maracu.” Man lok ma Lubanga owaco.