Icaya 56

Jo pa Lubanga bikwako Rok ducu

1Rwot owaco bot jone kuman ni, “Myero wutim gin matye atir dok ma opore, pien dong acok larowu, lar ma alarowu kwede binen kamaleng. 2Abimiyo gum madwong ikom ngat ma timo kit man, ngat ma omako gin meno matek liking, ma gwoko ceng Cabit kun pe pyedo, dok gwoko cinge pe timo gin marac.”

3Larok mo ma obino oribe ki Rwot pe myero owac ni, “Rwot bikoya woko matwal ki ikom jone weko abedo kakena.” Dok dano ma kikolo bene pe myero owac ni, “Nen, dong atye macalo yat ma otal.” 4Pien Rwot dong owaco kuman ni, “Jo ma kikologi ma gigwoko ceng Cabita, dok giyero tiyo gin ma yomo cwinya, ma gumako gicikena liking, 5abimiyo botgi gin mo me po nyinggi ma bibedo i Ot pa Lubanga kama kiwora iye idye ganga, maber makato bedo ki lutino awobe nyo lutino anyira; abimiyo botgi nying ma bedo matwal, ma pe birwenyo kadi ki acel.”

6Dong Rwot waco bot lurok ma guribe ki en, me tic bote, kun gimaro nyinge, dok ma gumine me bedo lutice, ki dano ducu ma gwoko ceng Cabit, kun pe pyedo, ma omako gicikena woko liking ni, 71“Abikelowu i Cion i got mera maleng, dok abiyomo cwinywu i ot me lega kama kiwora iye. Abigamo gitum awangawu ki gityer ma kityero bota, magi ducu abigamo iwi keno tyera; pien oda kibilwongo ni, ‘Ot me lega pa jo me rok ducu.’”

8Rwot Lubanga ma ocoko jo Icrael ma onongo kiryemogi woko owaco kuman ni, “Dok abicoko jo mukene agurugi bota, amedo ikom jo ma dong atyeko cokogini.”

Kop oloyo lutel pa jo Icrael

9Rwot owaco bot rok me lobo ducu me bino calo lee tim kamwodo jone. 10En owaco ni, “Lukurpiny pa jo Icrael ducu wanggi oto, gin ducu gipe ki ngec kadi ki acel, gin ducu gicalo gwogi ma te lebgi oto, pe dok gitwero gweyo; gibutu piny gibedo ka lek aleka, gimaro nino matut keken. 11Gin gwogi ma giwor tutwal ma cam pe romogi. Gin lukwat ma pe giniang gin mo; ngat acel acel ikin gi kwanyo mere yone kene, ngat acel acel bene yenyo magobane kit ma cwinye mito. 12Gilwonge keken gi ni, ‘Wubin wacitu ka kelo kongo bwino, wubin wamatu kongo makec wek wamer woko, diki dok binonge, madit makato matin.’”