Icaya 64

1Ai kono onongo ibaro polo woko likwak ilor piny, kono ber! Kono onongo imiyo godi guyenge inyimi. 2Kono onongo komgi omyel calo pii ma yenyo iwi keno ma mace lyet. Bin dong wek inyut tweroni bot lukwori, wek rok ducu komgi omyel inyimi! 3Yam itiyo gin mogo makelo lworo madwong ma wan ki komwa pe waromo tamo pire, yam ilor piny, ci godi guyenge inyimi. 4Cake con ki con ngat mo gire pe owinyo, ngat mo pe ma owinyo ki ite, ngat mo bene pe oneno Lubanga mapat kono in keken, Lubanga ma tiyo tic pi jo ducu ma giketo gen gi ikome. 5In i jolo ngat ma tiyo tic ma atir ki yomcwiny, irwate ki jo ma wigi po pi yoni ma imito ni gulubi. Nen, kiniga ceng omaki, pien onongo wabalo; wabedo katimo bal pi kare malac tutwal. Tika wan wabilare ada? 6Wan ducu dong wadoko calo ngat ma kome ki keni, gin ma atir ducu ma watimo dong nen calo bongo ma onyobe woko ki gin me kwer. Wan ducu waner woko calo pot yat, balwa bene terowa woko cen calo yamo ma kodo. 7Pe tye dano mo ma loke boti kalega, ma cuke ka maki liking; pien in ikano wangi woko ki botwa, dong ibwotowa i balwa.

8Ento kadi bed kumeno, ai Rwot, in pud i Wonwa; wan lobo agulu, in aye lacwecwa. Wan ducu wabedo gin ma in aye itiyo ki cingi. 9Ai Rwot, pe myero kiniga dok omaki matek, pe bene ibed ka po ikom balwa nakanaka. Kong inen, dok ipar, wan ducu wabedo joni. 10Taun madito maleng ma meri ducu dong gudoko tim. Cion dong odoko tim, ki Jerucalem dong odoko obur. 11Otwa maleng ma obedo Ot pa Lubanga, ma munya tutwali, kama yam kwariwa gipaki ki iye, dong kityeko wangone woko ki mac; kabedo ducu mayam yomo cwinywa dong odoko obur. 12Ka ineno magi ducu ka time ci pe itwero timo iye gin mo, ai Rwot? Ibiling kun nongo iunuwa matek kuman?