Icaya 8

Nying wod pa Icaya tye lanyut bot dano

1Rwot dok owaca ni, “Kwany got malac ci ico iye coc ki nukuta ma lwak ducu gingeyo ma giromo kwano ni, ‘Maer-calal-kac-baj.’1 2Nong lucaden aryo ma gigene: ajwaka Uria ki Jakaria wod pa Yeberekia, me bedo lucadena.” 3Lacen abutu ki dakona ma lanebi, ci oyac, onywalo latin laco. Ci Rwot owaca ni, “Cak nyinge ni Maer-calal-kac-baj; 4pien ma pud peya latin meno ngeyo lwongo ni, ‘Aba,’ nyo ‘Mama,’ rwot me Aciria bigwaro lonyo pa jo Damaciko kacel ki jami ayaka pa jo Camaria woko liweng.”

Rwot me Aciria tye kabino

5Rwot dok oloko bota aye ni, 6“Pien jo man dong gukwero pii me Ciloa ma mol mot ci guloke gigi gubedo ki myelkom inyim Rejin ki inyim wod pa Remalia, 7pimeno, Rwot bimiyo pii me kulu Euprate ma mol matek dok bene madwong tutwal bicore ikomgi, ma en aye rwot me Aciria ki deyone ducu. Bipong iwang lalele ducu, kun nongo mol atata liyakyak. 8Bimol kato cito i Juda, ma nongo mol atata liyakyak, kato cito anyim, bipong nio wa malo ingut dano.” Pien Lubanga tye kwedwa. En biyaro bwome me gwoko lobo man. 9Wugure kacel wun rok ducu, cwinywu myero opoti; wuter itwu, wun lobo ducu ma wutye kamabor, wuyube bene ma cwinywu poto, wuyube pi lweny ma cwinywu poto. 10Wupor lok kacel! Ento gin mo peke ma bia ki iye. Wulok lok, ento gin ma wumito pe bicobe, pien Lubanga tye kwedwa.

Rwot ociko lanebi Icaya

11Rwot ocika kun loko bota ki twerone madit kit man ni, pe wulub kit pa jo me rok man, kun owaca ni, 122 “Pe wuribe kwedgi ka piro lok i mung dok pe wulwor gin ma gilworo, dok lworo mo ma onyo koyo ikomwu bene obed peke. 13Ento myero wunge ni Rwot me mony aye ngat maleng, en aye ngat ma myero wubed ka lworone, dok en aye ma myero omiwu lworo ma onyo koyo ikomwu. 143 Pien abedo ngat maleng, oweko abedo calo got mamiyo dano yoke ka giwoto, abedo calo ariya ki tung botgi, makatone ki tung dogola pa luker aryonu ducu, Juda ki Icrael, dok bibedo owic ki kunu me ciko jo ma gibedo i Jerucalem. 15Jo mapol gibiyoke iye; gibipoto gitur ginginye woko; ci kibicikogi ki kunu ci gimoko i owic.”

Kiciko dano ikom lok me koro tipu pa jo ma oto

16Jo ma winyo lok ma apwonyo myero gugwok maber wek pe orweny woko. 174Rwot okane woko ki bot jone, ento an abikure kun atye ki gen ikome. 185Nen an kacel ki lutino ma Rwot dong omiya, wabedo lanyut ki lanen bot jo Icrael ma oa ki bot Rwot me mony, ma komkere tye iwi got Cion. 19Ento dano biwaco botwu ni kong wucit wupeny lutyet ki ajwaki ma giloko weewee, calo ngat ma dumu aduma. Gin biwaco ni, “Ber ka rok moni gupenyo Lubangagi maka penyo tipu pa jo ma oto pi jo ma kwo.” 20Wun myero wudok iye botgi ni, “Kong wuwiny gin ma Rwot pwonyo ki wun! Pe wuwiny lok ma lutyet ki ajwaki giloko pien gitye i piny macol, piny peya oru botgi. 21Dano bingolo gikato ki idye lobo ma nongo gitye ki peko madwong tutwal, ma kun nongo kec nekogi matek. Gibitoke ki kiniga ma kun nongo kec tye kanekogi, ci gicako ceno rwotgi ki Lubangagi woko. Gibitingo wanggi gineno malo i polo, 22dok gibikulu wigi kun gineno piny i lobo, ento pe gibinongo gin mo, gibineno can ki colpiny keken, ki mutu ma ocido licuc me arem madwong, ci kibicwalogi i colpiny ma ocido licuc. Yo mo bibedo peke me bwot ki i arem meno madwong.”