Icaya 7

Lok mukwongo ma Icaya otito bot rwot Akaj

11

Ikare ma Akaj wod pa Yocam, wod pa Ujia, onongo obedo rwot me Juda, Rejin rwot me Ciria, ki Peka wod pa Remalia rwot me Icrael, gin aryo ducu yam gubino i Jerucalem pi lweny ikom Akaj, ento pe gutwero loyone.

2Ikare ma kitito loke bot Akaj rwot me Juda ni jo Epraim dong guribe woko ki jo Ciria, cwiny Akaj ki cwiny lwake omyel tutwal kit macalo yamo yengo kwede yat ka tye kakodo.

3Rwot owaco bot Icaya ni, “Cit irwate ki Akaj, in kacel ki wodi Cear-yacub. Cit irwate kwede i agiki me yoo pii ma mol a ki i joro mamalo, i yoo gudu ma cito i poto pa lalwok bongo. 4Wac bote wek en obed ma ogwoke, dok obed mot labongo lworo mo, cwinye bene pe opoti pi kiniga malyet ma omako Rejin ki jo Ciria ki wod pa Remalia, pi ajut aryo ma guwang wokoni ma yito tye kaduny ki iigi. 5Pien jo Ciria ki jo Epraim ki wod pa Remalia guporo lok marac ma myero kitim ikomi. 6Gin gimito lweny ikom Juda, wek gimaa Juda woko obed meggi, wek giket wod pa Tabcel me bedo rwot iye.

7Pimeno an Rwot Lubanga awaco ni lokgi meno pe gibicobone i ada. 8Pien Damaciko aye taun madit me Ciria, ki Rejin aye rwot me Damaciko. (Ikine me mwaka pyere abicel wiye abic, nongo jo Epraim pe dok gimede me bedo rok.) 9Camaria aye taun madit me Epraim, ki wod pa Remalia aye rwot me Camaria. Kace pe wubicung matek i niye, ci adada pe dong wubicung matwal.”

Lanyut ikom Immanuel

10Rwot dok owaco ki Akaj ni, 11“Peny pi lanyut mo ki bot Rwot Lubangani; kadi lanyut matye piny kama tut i lyel nyo kadi matye malo i polo.” 12Ento Akaj ogamo kun waco ni. “Pe abipenyo lanyut mo, dok pe abitemo Rwot.” 13Icaya dok owaco ni, “Kong wuwiny wun likwayo pa Daudi! Yelo dano ma wuolo komgini pe romowu, ma omiyo dok wutye ka olo kom Lubangani? 142Pimeno, Rwot kikome aye ma bimiyo botwu lanyut. Nen, nyako mo ma peya ongeyo laco biyac, ci binywalo latin laco, kibicako nying latin meno ni Immanuel.3 15Ikare ma latin meno bingeyo kwero gin marac kiyero gin maber, dano bibedo kamato cak lukulu ki moo kic. 16Pien ma pud peya latin meno ngeyo kwero gin marac kiyero gin maber, lobo ma in itye iye ki lworo maditi kom lukere aryonu kibiweko dong nono. 17Rwot bimiyo kare mo bino ikomi ki ikom lwaki, ki ikom jo me dogola me ot pa kwaru, can marac mayam peya onen cake ma jo Epraim gupoke woko ki jo Juda; en bikelo rwot me Aciria.

18Ikare meno, Rwot bilwongo mony pa jo Ejipt ki lwiyo, ci gibibino macalo lwangi ki mony pa jo Aciria gibibino calo kic. 19Gin ducu gibibino ci gio woko lirut i lung matut, ki ikin got ma obar, ki iwi okutugu ducu, ki i olet ducu.

20Ikare meno Rwot bikelo dano mo ki loka kulu Euprate, ma en rwot me Aciria. En bitimowu malit mada kun lyelo yer wiwu ki yer komwu woko ducu, dok bilyelo yer tikwu woko bene.

21Ikare meno dano bigwoko roya ki megi romi aryo, 22ci gibimiyo cak madwong tutwal bot dano meno, ma weko dano meno bimato cak lukulu ki moo kic.

23Ikare meno poti ducu mayam kinongo iye tyen olok alip acel, ma poto acel acel kicato i wel me cekel me ryal alip acel, bipong ki okutu ki ocok keken. 24Dano bicito kadwar kunu ki atum ki atero, pien okutu ki ocok biromo lobo ducu. 25Kabedo ducu ma obedo cerecere mayam onongo kipuru ki kweri, pe dok wubicito iye pi lworo okutu ki ocok. Kabedo meno bidoko kama dyangi camo iye ken gi; dok romi ki dyegi gibibedo kanyono piny iye atata.”