Icaya 9

Nywalo laker ma bikelo kuc ki loc maber

11

Dano yam gicayo lobo Jabulon ki lobo Naputali, ento en bimiyo piny ma tung Mediterranean, nio loka Jordan, oo kwede wa Galilaya kama lurok bedo iye, bibedo kideyo. 22

Jo mayam giwoto i piny macol

dong guneno dero ceng madit;

ki jo mayam bedo i lobo me mutu me piny macol licuc,

ceng dong oryeny omenyogi.

3In dong imiyo jo me rokwa onya,

imedo bene yomcwiny botgi;

gibedo ki yomcwiny inyimi,

kit ma dano bedo kwede ikare me kac,

kit ma dano bedo kwede ki yomcwiny ka gipoko jami ma guyako.

4Pien okolgi mapek,

ki odoo ma goyo gwokgi,

ki odoo mayam kiburugi kwede tektek me tiyo tic,

in dong iturugi woko ducu macalo inino pa jo Midian.

5Pien war pa oteka lweny ducu ma ginyono ki piny idye lweny,

ki bongi ducu ma kinywano woko ki remo,

kibimokogi woko ki mac maka yen.

6Pien dong kinywalo botwa latin, kimiyo botwa latin laco;

kibimiyo en tingo twero me loc iwi gwoke,

nyinge kibicako ni,

“Lamitam ma kiuru, Lubanga Won Twer,

Won ma bedo nakanaka, Laloc makelo kuc.” 73

Twero me loce bimede ameda,

kere kare ducu bibedo ki kuc, dok ka gike bibedo peke.

En bibedo iwi komker pa Daudi,

biweko kere cung matek dok bigwokone wek pe opoti,

ki ngolo kop ma atir ki bedo ki kit ma atir,

cake kombedi ci bedo dong matwal.

Arima pa Rwot me mony bimiyo man cobe.

Rwot bimiyo pwod ki jo Icrael

8Rwot ocwalo lok ikom Yakobo,

ci lok meno bipoto ikom Icrael.

9Lwak ducu bingeyo,

Epraim ki jo ma bedo i Camaria,

ma gin jo ma luwake ma gicayo dano ki i cwinygi kun giwaco ni,

10“Matapwali dong opoto woko piny,

dong wabigero gedo ki got ma kipayo apaya;

olam dong kitongo woko, ento wan wabileyo kakargi ki yat cedar.”

11Rwot tye kakelo lumerok ikomgi, dok tye katugu lukworgi. 12Jo Ciria tung kunyango ki jo Piliciti tung kupotoceng gungamo doggi, gitye kamwodo jo Icrael woko. Man ducu pe okweyo kiniga pa Rwot, en pud tye kapwodogi apwoda. 13Ento dano pe guloke gudwogo cen bot ngat ma opwodogi, pe bene guyenyo Rwot me mony. 14Pimeno omiyo Rwot bipwodo lutela me Icrael woko kacel ki jone, dok bingolo bene wi Icrael woko kacel ki yibe inino acel. 15Ludito kacel ki jo ma kiworogi gubedo wi Icrael, ki lunebi ma pwonyo lok me goba en aye yib Icrael. 16Jo ma telo rok man gurwenyo lwak me rok man woko, oweko jo ma kitelogi tamgi obale woko. 17Meno omiyo Rwot pe obedo ki yomcwiny ikom awobegi, kica bene pe omake ikom lutino ma won gi peke, ki mon ma coggi oto; pien ngat acel acel ikin gi pe woro Lubanga, dok gin ducu gudoko lutim tim maracu, lok ducu ma giloko obedo lok me mingo keken. Man ducu pe okweyo kiniga pa Rwot, en pud tye kamede ameda ki pwodogi. 18Pien tim maracu wang woko calo mac, wang calo okutu ki ocok ma wang imac; gamo agaba ma i bunga, kun gin ducu gidoko yito ma duny cito malo. 19Pien akemo pa Rwot me mony omiyo lobo tye kawang ki mac, jo ma gibedo iye ducu dong gudoko calo yen ma wang i mac; pe tye ngat mo iye ma timo kica ki omine. 20Gimayo ki tung lacuc, ento nongo kec pud tye kanekogi, gicamo ki tung lacam, ento nongo pud pe romogi; dano acel acel camo ringo kom lawote. 21Manace camo Epraim, ki Epraim bene camo Manace, gin aryo ducu guribe kacel guero lweny ikom Juda. Man ducu pe okweyo kiniga pa Rwot en pud tye kamede ameda ki pwodogi.