Icaya 10

1Wun jo ma wuketo cik ma pe atir wubineno can, wun lucoc ma wucoyo lok me unu dano; 2ma wugengo jo ma piny obwoyogi woko me nongo ngolo kop atir, ma wumayo jami pa lucan ma gibedo ikin lwaka; wuyako jami pa mon ma coggi oto, ki jami pa lutino kic bene wumayo woko. 3Wubitimo gin ango inino ma kibiketo iye can ikomwu, idye yamo kot ma bia ki kamabor? Wubiringo wucito bot anga wek okonywu? Lonyowu kono wubiweko kwene? 4Pe wubibwot kadi ki acel, ento wubiwot wudonyo ikin mabuc aye, onyo wubito atoya aye ikin jo ma kibinekogi i lweny. Man ducu pe bikweyo kiniga pa Rwot, en pud bimede ameda ki pwodogi.

Rwot otiyo rwot me Aciria me pwodo jone

51

Rwot owaco ni, “Jo Aciria gubedo odoo me nyutu kinigana, ki odoo me nyutu akemona mager. 6Abicwalo Aciria ka lweny ikom rok ma gukwero wora woko, abicikogi gicito ikom jo ma akemo omaka ikomgi, pi yako jamigi ki coko jamigi ma guyako ki nyonogi woko piny idye gudu calo coto. 7Ento rwot me Aciria onongo pe oyube me timo kumeno, dok bene onongo pe otamo tam macalo meno i cwinye; ento tame onongo tye pi nek ki pi jwero jo me rok mapol woko liweng.” 8Rwot me Aciria owaco ni, “Ludito wi monya ducu gin luker! 9Dong atyeko loyo taun madito me Kalno ki Karkemic, Kamat ki Arpad, Camaria ki Damaciko. 10Kit macalo cinga dong ogudu kwede ker ducu ma giworo cal jogi, ma cal jogi ma gupayo onongo kato pa jo Jerucalem ki pa jo Camaria woko, 11itamo ni an pe abitimo bene ikom Jerucalem ki cal jogine, kit mayam atimo ikom Camaria ki cal jogine?”

12Ka Rwot dong otyeko tice ducu ki iwi Got Cion, ki ikom Jerucalem, ci biketo can ikom rwot me Aciria pi wakene ki nyatene ki pi kete kekene ni etek. 13Pien rwot me Aciria owaco ni, “Atimo man pi tek cinga, ki pi ryekona, pien atye ki ngec ma oromo. Atyeko dong kobo wang coo me lobo pa lurok woko, ayako bene lwak lonyogi woko ducu, areto jo ma gubedo iwi komker macalo twon ma coro jami. 14Onongo cinga coko lonyo pa rok mapol, ma cokone obedo yot calo kwanyo ot winyo; kit ma dano gicoko kwede tong winyo ma min gi dong oweko woko, an bene dong acoko lonyo me rok ducu woko kitmeno; pe tye ngat mo ma otingo cinge, dano mo bene obedo peke ma ongamo doge kacoka.”

15Ento Rwot owaco ni, “Itamo ni latong twero wake ikom ngat ma tiyo kwede? Nyo cumeno twero pake kene inyim ngat ma tiyo kwede? Odoo pe twero tingo dano, dano aye tingo odoo, tal bene pe twero tingo dano malo, ento dano aye ma tinge malo.” 16Pimeno, Rwot ma en Rwot me mony bicwalo two ma jonyo kom dano woko ikom jo Aciria ma gin lulweny, dok bicwinyo mac ite deyogi ci wang woko, dok bilyel calo mac. 17Lubanga ma en dero pa jo Icrael bidoko mac, Lubanga maleng pa jo Icrael bidoko calo leb mac; biwango okutu ki ocok tyekogi woko inino acel. 18Deyo me bungane ki lobo ma ceko cam matek, Rwot bityeko woko ducu; kit macalo two matek jonyo kom latwo woko lingok. 19Yadi ma bidong i potone bibedo manok tutwal ma latin bene twero kwano welgi.

Jo Icrael manok ma gudonge bidwogo

20Inino meno jo Icrael ma gudonge, ki jo me ot pa Yakobo ma dong gubwot, pe dok gibijenge ikom ngat ma opwodogi, ento dong gibijenge ikom Rwot, ma en Ngat Maleng me Icrael. 21Jo ma gudong gibidwogo cen bot Lubanga Won Twer, ma gin aye jo me ot pa Yakobo ma gudonge. 222Kadi lwakwu jo Icrael gubed macalo kweyo me dog nam, jo manok keken ki ikin gi ma odong aye gibidwogo cen. Lubanga dong omoko tame me tyekogi woko, pien en gire kite atir. 23Pien Rwot, ma en Rwot me mony, bityekogi woko ducu ki lobogi kit ma en dong omoko.

Rwot bipwodo jo Aciria

24Meno aye gin ma omiyo Rwot, ma en Rwot me mony owaco ni, “Wun lwaka ma wubedo i Cion, pe wulwor jo Aciria kace gigoyowu ki odoo, ma gitingo odoogi i komwu kit macalo jo Ejipt yam gutimo. 25Pien dong odong kare manoknok mo ma akemona bigik woko, ci kinigana biloke ikomgi, ci atyekogi woko. 26Rwot me mony bityengo odoo ikomgi, kit macalo yam otyengo kwede jo Midian inget got Oreb; en biriyo odoone iwi nam, kit macalo yam otimo ki i Ejipt. 27Inino meno abigonyowu woko ki ite loc pa Aciria ki abituru okole woko ki ingutwu.”

Jo Aciria guoto mony

28Lukwor dong gua woko ki i Rimon, dong guo i Ayat kun giwok ki i Migron, gukano tergi i Mikmac. 29Gungolo ki ikin godi kama ding, ci gucito gubutu i Geba. Jo Rama komgi myel, jo Gibea pa Caulo dong guringo woko. 30Wudong oduru matek, wun jo Gallim! Wuwiny, wun jo Laica! Wugam doggi ba, wun jo Anatot! 31Jo Madmena tye karingo woko, ki jo ma bedo i Gebim guringo pi laro kwogi. 32Lumerok onongo dong gitye i Nob inino meno, onongo dong gitye ma giyengo tonggi ayenga ikom got Cion, ma en aye got me Jerucalem. 33Nen, Rwot ma en Rwot me mony, bimiyo gipoto piny lirum calo jang yat ma kitongo; jo madongone kibiretogi woko piny, ngat mo peke ma bidong ma nongo ocung malo. 34Rwot bitongo mony pa jo Aciria calo ngat ma tongo yen kama ocule ducu ma i bunga ki latong, kadi yadi ma pirgi tego matye i Lebanon, gin ducu kibiretogi woko piny.