Icaya 66

Rwot ngolo kop ikom rok ducu

112

Rwot owaco kuman ni, “Polo aye komkera, lobo obedo kom me teno tyena. Kit ot ango ma wutwero gero pira? Ka yweyona kono binen ningning? 2Jami magi ducu an aye atiyogi ki cinga, pimeno jami magi ducu gubedo mega. Man Rwot aye ma owaco. Dong man aye dano ma abiciko wanga ikome, dano mamwol, ma ngut bene ki icwinye, dok ma kome myel ilok ma an awaco.

3Dano gitimo kit ma gimito, dok dano ma neko twon dyang pi tyer rom ki ngat ma neko dano; ngat ma tyero latin romo macalo gitum, rom ki ngat ma turu ngut gwok me atyera; ki ngat makelo gityer me moko kwon tyero bota, rom ki ngat ma tyero remo opego; ngat ma wango odok luban macalo gityer me nipo rom ki ngat ma lego gum ikom cal jok. Jo magi guyero yogi pirgi ken gi, cwinygi yom mere ayoma i timgi me kipyeda. 4An bene abimiyo botgi pwod ma myero omakgi, abiyero can mamiyo lworo makogi marac tutwal; pien ikare mayam alwongogi, ngat ma ogamo doga obedo peke, ikare ma aloko kwedgi, ngat mo pe ma owinyo loka; ento gutimo gin manen marac inyima, ci guyero gigi gin ma pe yomo cwinya.”

5Wuwiny lok pa Rwot, wun jo ma komwu myel iloke, “Utmegiwu ma gidagwu, ma guryemowu wucito woko cen pi nyinga, dong guwaco ni, ‘Kong Rwot onyut deyone botwu wek kong wanen yomcwinywu.’ Ento gin aye gigi ma gibiweko lewic makogi keken gi. 6Kong wuwiny woo madit matye i taun madit! Dwon mo ma a ki i Ot pa Lubanga! Meno dwon Rwot, matye kaculu kwor ikom lukwore. 73

Tauna madit rom ki dako ma nywal cutcut ma peya mwoc ogoyo. En onywalo latin laco ma peya arem ocake ikome. 8Tye ngat mo tika mayam kong oneno nyo owinyo kit gin macalo meno? Rok mono kitwero nywalone inino acel keken? Cion pe bibedo ki arem matek pi kare ma lac ma pud peya en onywalo roke cut. 9Itamo ni an amiyo kare me nywalo jona romo ci pe aweko kinywalogi? An aye ma amiyo dano nywal, itamo ni an dok atwero cego ot nyodo pa Cion woko wek pe onong lutino?” Man an Rwot ma owaco.

10Cwinywu obed yom kacel ki Jerucalem,

cwinywu bene obed yom pire,

wun jo ducu ma wumare;

wubed ki yomcwiny madwong kacel kwede,

wun jo ducu mayam kumu pire;

11wek wudot cak ki itunune okwe cwinywu,

calo latin ma doto tunu pa mine,

wek bene wumwony cake ki yomcwiny,

pien cak dwong tutwal i kore.

12Pien Rwot owaco kuman ni,

“Nen, abinyayo kuc bedo dit bote calo kulu,

ki lonyo pa lurok calo kulu ma opong ma mol ma pe two;

wubidoto cak ki itunune, en bitingowu woko i lakngete,

dok bene wubibedo ka tuku i eme.

13Abikweyo cwinywu, calo latin ma mine kweyo cwinye; cwinywu bikwe i Jerucalem. 14Wubineno, ci cwinywu cako bedo yom, komwu bibedo yot calo lum ma pud lot alota; meno bimiyo wungeyo ni, Rwot konyo jo ma tiyo pire ento akemone tye ikom lukwore.”

15Pien nen, Rwot bibino ki mac, kun gadigadine ducu bedo madwir calo yamo lapiru, me coro akemone ikomgi ki kiniga malyet adada, kun jukugi ki leb mac. 16Pien Rwot bingolokop ikom dano ki mac, dok bene en bineko jo mapol woko ki pala lucwan; jo ma en Rwot bineko bibedo pol mada.

17Rwot waco ni, “Jo ma gilonye keken gi me bedo leng pi woro jogi, ma gicito i poti me woro jogi, kun giwoto i tyeng, ma gicamo ringo opego ki gin mogo me kwer ki oyo adeng, gin ducu gibitum woko lawangacel.

18Pien angeyo ticgi ki tamgi, abibino me coko rok ducu ma loko leb mapatpat kacel; gin gibibino ci gineno deyona, 19abiketo lanyut ikin gi. Abikwanyo jo mubwot ki ikin gi kenyo, abicwalogi bot lurok, bot jo Tarcic, Put ki Lud, ma gin jo ma gitelo atum, bot jo Tubal ki Javan, ki i lobo matye i dog nam kamabor, ma pud peya guwinyo kit ma nyinga oywek kwede, kadi neno deyona ikin rok. 20Gibikelo utmegigi ki i rok ducu macalo gityer me atyera bot Rwot, kun gikelogi ki aguragura, gadigadi, kitara, kana ki kinagagu wa iwi got mera maleng matye i Jerucalem, kit macalo jo Icrael kelo kwede gityergi me moko kwon i atabo maleng i Ot pa Rwot. 21Abikwanyo jo mukene ikin gi bene me bedo ajwaki ki Lulevi. 224

Kit macalo polo manyen ki lobo manyen ma abitiyo, birii inyima, kitmeno likwayowu kadiwa nyingwu bene birii inyima. 23Cake i Karama me Por Dwe o kwede i Karama me Por Dwe, cake Cabit o kwede i Cabit mukene jo ducu gibibino inyima ka wora. 245

Gibikato woko ci gicito kaneno kom dano ma oto mayam onongo gujemo woko ikoma, pien kwidi ma camo komgini pe to, mac ma iye bene pe kiromo nekone, gin gudoko gin ma i dano ducu okwero.”