Jeremia 1

Jeremia

1I buk man kicoyo iye lok pa Jeremia wod pa Kilkia, ma en ngat acel ikin ajwaki mayam onongo gibedo i Anatot i lobo pa Benjamin. 21 Rwot oloko ki Jeremia i mwaka me apar wiye adek me loc pa Yocia wod pa Amon, rwot me Juda. 32 Lacen Rwot dok omede ki loko loke bot Jeremia ikare me loc pa Yekoyakim wod pa Yocia rwot me Juda, oo kwede wa i agiki mwaka me apar wiye acel me loc pa Jedekia, wod pa Yocia, rwot me Juda, oo kwede wa ikare ma dong kitero jo Jerucalem woko i opii i dwe me abic.

Lubanga olwongo Jeremia

4Ikare meno Rwot oloko kweda kun waca ni, 5“Ikare ma onongo peya acweyo in ii meni, onongo dong angeyi, dok ikare ma peya kinywali onongo dong atyeko yero in woko me bedo lanebi bot rok ducu.”

6Ka dong agamo loke kun awaco ni, “Aya, Rwot Lubanga! Nen, an pe angeyo lok, pien an pud latin mamwa.”

7Ento Rwot odok iye bota kun waca ni, “Pe iwac ni, ‘An latin mamwa’; pien ibicito bot jo ducu ma abicwalo in ni icit botgi, dok bene lok ducu ma an abiciki kwede en aye in ibiloko. 8Pe ibed ki lworo mo ikomgi, pien atye kwede, abilari, man an Rwot aye ma awaco.”

9Cutcut Rwot ocwalo cinge ogudu doga, ci Rwot owaca ni, “Nen, dong atyeko keto loka idogi. 10Nen, dong atyeko keti inino man, me loyo rok mapol ki ker mapol, pi putu gi ki pi mukugi woko bene, ki pi balogi ki turugi woko bene, ka gerogi odoco ki ka pitogi bene.”

11Rwot dok oloko kweda kun penya ni, “Jeremia, itye kaneno ango?” Ci agamo ni, “Atye kaneno jang yat yaa.”

12Ci Rwot owaco ni, “Ineno kara maber, pien atiti ni atye kaneno loka, amito ni otii tice ocob kakare.”

13Rwot dok oloko kweda tyen me aryone, kun penya ni, “Itye kaneno gin ango?”

Ci an dok adok iye ni, “Aneno agulu ma pii tye kawalo ki iye ki yo tung kumalo, ma doge oloke okemo yo tung bota.”

14Ci Rwot owaco bota ni, “Gin marac matye kawalo bia ki yo tung kumalo bibino poto ikom jo ducu ma gibedo i lobo man. 15Pien nen, atye kalwongo rok ducu ma gitye ite ker ducu ma yo tung kumalo. Rwodigi gibibino ci ngat acel acel bicibo komkere i dog taun me Jerucalem, ma gibirumu cele woko litit pi lweny ikome, ki pi lweny ikom taun madito ducu me Juda. Man an Rwot ma awaco. 16Dok abipwodo jona pi timgi maracu ducu ki pi bwota woko; kun gubedo kawango odok eceta bot lubanga mogo mukenegu, kun gin bene gibedo ka woro gin ma gutiyo atiya ki cinggi. 17Ento in, bed ma itere, wek icitit botgi kit lok ducu ma aciki kwede. Pe ilworgi, wek an bene pe aryang cwinyi ki inyimgi. 18Dong inen, ki tung bota dong atye ka miyo in me bedo matek macalo taun madit ma kicelo woko matek liking ki cel gogo ma pe kitwero loyone, macalo wir nyonyo, ki cel mola, pi gwoki ki ikom jo me lobo man ducu, pi gwoki ki ikom luker me Juda, rwodine, ajwakine, ki ikom lwak ducu me lobo man. 19Gibilweny ikomi, ento pe gibitwero loyo in, pien an atye kwedi pi lari.” Man lok pa an Rwot kikome.