Jeremia 2

Gwok pa Lubanga pi jo Icrael

1Rwot dok oloko kweda. En waca ni, 2“Cit ituc lok man bot jo Jerucalem, wek guwiny. Rwot owaco kuman ni,

‘Pud apo pi gen ma ibedo kwede ikoma nia wa i ka tinoni,

mar ma ibedo kwede ikoma macalo i nyako ger,

kit ma ibedo kaluba kwede wa i dye tim,

i lobo mayam pe kicoyo iye kodi mo.

3Icrael onongo yam obedo rok ma kikwero wek obed maleng pira kena,

macalo cam ma okwongo cek ma en okayo.

Jo ducu ma gucamo cam meno guloke gudoko lubal;

dok gin maracu obino opoto ikomgi, man an Rwot ma awaco.’”

Bal pa kwari pa jo Icrael

4Wuwiny lok pa Rwot, wun jo me ot pa Yakobo, ki wun jo me dogola ducu me ot pa Icrael. 5Rwot dok owaco kuman ni,

“Kit gin ango marac ma kwariwu gunongo ni atimo

ma omiyo gua woko ki bota gucito woko kamabor kwedani?

Gin gubedo kalubu gin ma konye peke,

omiyo gin bene gudoko jo ma konygi pekeni.

6Gin pe gupenyo ni, ‘Rwot ma okwanyowa woko ki i lobo Ejiptni mono tye kwene?’

En ngat ma yam otelo wiwa i dye tim,

i lobo tim aroo matye iye lwak bur mapol,

i lobo ma otwo dok tye ki mutu me colpiny ma ocido licuc,

ki lobo mayam dano mo pe kato ki iye,

kama dano mo bene pe bedo iye.

7Ci akelowu i lobo ma ceko cam mabup adada

wek wuyom cwinywu kun wucamo cam ma ocek iye ki gin mabeco ducu matye iye.

Ento ikare ma wubinoni wubalo lobona woko,

wuloko gipiny ma mera odoko gin me kwer.

8Ajwaki bene pe gupenyo ni, ‘Rwot mono tye kwene?’

Jo ma gitye ludiro i cik bene onongo pe gingeya;

luloc gutimo roc ikoma;

lunebi bene gubedo katyeto lok i nying jok Baal,

gubedo kalubu kor cal jogi ma pe konyo.”

Kop ma Lubanga tye kwede ikom jone

9Ci an Rwot awaco ni,

“Pud dok abipenyo dogwu aye kun abidotowu.

Dok bene abidoto wa likwayowu.

10Pimeno kong ingol nam ikat loka Caiprac wek inen,

nyo kong icwal dano ocit i Kedar wek ocit ongii maber adada;

wek onen kace gin ma kitmeno yam con obedo tye.

11Tye rok mo ma oloko lubangane pi lubanga mo mukene,

kadi bed onongo gin jogi mamwa?

Ento jona dong guloko deyogi woko pi gin ma pe konyogi kadi wa ki acel.

12In polo, bed ki ur pi lok man,

bed ma inen ma lworo obwoyo komi woko adada,

man an Rwot ma awaco.

13Pien jona dong gutyeko timo bal aryo maracu;

gin dong gubwota woko,

kun an aye abedo wang it me pii me kwo,

ci dong gukwinyo bur ikom pata got me lagwok piigi pirgi ken gi,

bur ma okak ma pe twero gwoko pii kadi matidi mo.

Adwogi bal pa jo Icrael

14Icrael mono obedo opii?

Kece en latic ma kinywale anywala i paco?

Ci pingo en dong odoko macalo ginayaka i cing lumeroke?

15Gin ducu dong gukok woko ikome matek calo labwor,

gubworo kun gikok ki dwon gi malongo adada,

gin gubalo lobone woko odong nono;

taune madito ducu dong gudoko wi obur,

labongo dano mo ma bedo i igi.

16Medo ikom meno, jo Mempic ki jo Tapanec dong guketo ret i wiye woko.

17Pe wun giwu aye ma wukelo can man ikomwu kekenwu pi bwoto Rwot Lubangawu,

ikare mayam en obedo katelo yo botwuni?

18Dong kit kony ango ma wunongo pi keto genwu ikom Ejipt pi ribe kwede?

Kony ango maber ma wunongo ma wucito kamato pii ma i kulu Nail.?

Nyo pi keto gicike ki Aciria?

Nyo wunongo kit kony ango ma wucito kamato pii ma i kulu Euprate?

19Balwu aye bikelo pwod ikomwu,

ki bwoto Lubangawu woko aye bikelo can ikomwu me jukuwu.

Wunge dok wunen ni man gin marac dok me cwercwiny

pi wun me bwoto Rwot Lubangawu woko;

kit lworo mo ma wulwora kwede pe i iwu wa ki acel,

man an Rwot Lubanga me mony aye ma awaco.”

Jo Icrael gukwero woro Rwot

20Rwot me mony owaco kuman ni,

“Yam con aturu okolwu woko dok acodo ogwil ma kitweyowu kwede i opii; ento wun owaco bota ni, ‘Pe wabibedo lutici.’

Ci omiyo pe wulubu cika dok wukwero wora;

iwi cere mamalo ducu

kadi wa ite yadi ducu ma potgi olukgu wubedo ka woro lubanga mukenegu kun wuryebe piny i nyimgi me worogi.

21Ento an aye yam apitowu kun wua ki ikom olok mamit,

akwanyowu ki ikom olok ma nyige ducu beco adada.

Wun dok wucako loke ningning me doko calo olok me tim ma otop ma konye dong pekeni?

22Kadi bed wulwok komwu ki cabun ma bwoyone dwong mapol marom mene,

lwit bal aliiwu nongo nen pud odong tye inyima

Man an Rwot Lubanga aye awaco.

23Dong wutwero waco ningning ni,

‘Wan girwa pe wanyobe ki bal,

dok pe bene wabedo ka woro jogi Baal?’

Kong wunen ojwe tyenwu ma wuwoto kwede ilung;

dok myero wunge gin ma dong wutimo.

Wubedo calo roya kinaga ma ngweco cabe atata kayenyo twon ikare me ito.

24Wubedo calo kana me tim ma dong ongiyo woko ki bedo i tim,

ma ywayo yamo ki ume kun mito twon!

Anga matwero juke ki i gin ma cwinye pyete iye?”

Twoni ducu ma gimite pe myero guol komgi;

gibinonge i dwene kikome.

25In Icrael, pe iwek tyeni oloc woko kun nongo war tyeni oket woko,

ki dwoni bene pe iwek otwo woko ki orwo pii pi ringo ka woro lubanga pa lurok.

Ento in iwaco ni, “Pe atwero wekone, nen dong amaro lubanga pa lurok, dok bene dong abiwot alubu korgi wek abimede ki worogi.”

Rwot biketo can ikom jo Icrael

26An Rwot awaco ni, “Kit macalo lewic mako lakwo kace kimako ka kwalo gin mo, kitmeno jo Icrael lewic bene bimakogi: gin kikomgi, lukergi, rwodigi, ajwakigi, kadi wa lunebigi, 27ma giwaco ki yat moni ni, ‘In i wora,’ dok giwaco ki got moni ni, ‘In aye ma inywala.’ Pien onongo guloko ngegi woko bota, pe nongo dong ginena ki wanggi, Ento ikare ma nongo gitye i can giwaco ni, ‘A malo ilarwa do!’ 28Ento lwak lubangagu, ma wutiyo pirwu kenwuni dong gitye kwene? Wek dong gua malo kace gitwero larowu, ikare ma nongo wutye i can; pien lwak lubangawu gipol ma girom aroma ki wel taunwu, wun jo Juda. 29Pingo wukelo nguruwu ikoma? Pe wun ducu dong onongo wujemo woko ikoma? 30Yam apwodowu kwe, ento pe kitwu oyube kadi ki acel; dok pala lucwanwu kekenwu aye ma oneko lunebiwu otyekogi woko, calo labwor ma owor ma tyeko dano woko. 31Dong wun jo Icrael me kare man, wuwiny lok pa Rwot. Wun mono wutamoni an abedo macalo tim bo ki botwu, nyo macalo lobo me mutu? Pingo kono wun wuwaco ni, wubitiyo kit macalo wumito, pe dong wubidok bota matwal? 32Wutamo ni nyako mo wiye twero wil ikom ginaruka me deyone, nyo nyako ger wiye twero wil ikom bongo me nyome? Ento jona dong wigi owil woko ikoma pi lwak nino ma wele pe kwane. 33Kit ma dok ingeyo yo maber me mar ikit me tarwang! Kadi wa mon ma kitgi racu in aye ma ipwonyogi ki tim me tarwang. 34Dok bene ikom bongo ma i pyeri kityeko nongo iye remo pa lucan ma pe gitye ki bal alii mo; kadi yam bene obed ni pe inongogi ka turu ot pi kwalo kwo.

Ento dong ikom lok magi ducu, 35pud dok iwaco ni, ‘An gira apeke ki bal mo; adada kiniga pa Rwot dong otyeko a woko ki ikoma.’ Nen, abipwodo in, pi waco ni, ‘Pe onongo abalo.’ 36Pingo ibedo kawire ki wot kun iloko yoni atata! Jo Ejipt gibimiyo lewic maki kit macalo yam jo Aciria bene guketo lewic ikomini. 37Ibia ki kunu idwogo woko cen ki lewic , pien Rwot dong otyeko kwero jo ma itye kagenogini woko, dok gin bene pe gibikonyi miyo pe ibedo maber wa ki acel.”