Jeremia 3

Jo Icrael pe gin jo ma gene

1Rwot owaco ni, “Ka laco mo oryemo dakone woko, ce dakone oa ki bote ocito woko, ka dong odoko dako pa laco mukene, ci cware mukwongoni pud dok bidok bot dakonu aye? Ci meno pe bimiyo lobo nyobe woko ki bal tutwal? Ento in Icrael, ibedo katimo tim kwele ki jo mapol; ci dok pud itamo ni itwero dwogo cen bota adada? 2Lok wangi inen malo wek inen cere mutinge malo. Wi cere mene ma odong ma pe co obutu kwedi iye? Inget yoo ducu ibedo ka kuru co ducu ma gimarini calo Laarab ma bedo i dye tim ka kuru dano ma owec bote. Dong ibalo lobo woko ki tim kwelekwele me malayani. 3Ma omiyo kadi kot bene dong ojuke woko, ki kot ma onongo myero ocwer ikare me potokot bene dong peke; ento tarwang pud omoro wangi i tim me kwele, ikwero lewic woko ni pe omaki. 4Pud pe ilwonga kombedi ni, ‘Wora, in ibedo larema nia wa ka tinona’? 5Kun itamo ni, ‘En pe bibedo ki kiniga ikoma nakanaka, pe bibedo ki akeca nio wa i agiki.’ Nen, in dong iloko, ento kono dong ityeko timo kit bal ducu macalo itwero.”

Icrael gin ki Juda myero gungut pi balgi

61

Ikare pa rwot Yocia, Rwot owaco bota ni, “Dong ineno gin ma Icrael ma pe geneni otiyo? En obedo kacito iwi godi maboco ki ite yadi ma oluk kunu pi timo iye tim kwelekwelene. 7An abedo ka tamone ni ka dong en otyeko timo time ducu ci en bidwogo bota; ento en pe omedo ki dwogo cen, kadi lamine Juda ma jone lugobani bene oneno. 8Kadi bed Juda oneno ni lamine Icrael obedo katimo abor tutwal inyima, ma en aye gin ma omiyo yam aryeme woko kun amiyo bote waraga ma nyutuni dong apoke woko kwede, ento Juda lacarcari pe obedo iye ki lworo mo wa ki acel. En bene ocito obedo katimo tim me kwelekwele. 9Pien onongo tim me kwele obedo gin mayot ki tung bote, omiyo obalo lobo woko ki bedo ka woro got wa ki yadigu. 10Ento pi lok man ducu Juda ma lamine ma lacarcari bene pe oloke odwogo bota ki cwinye ducu, ento odwogo inyima ki kome keken, man an Rwot ma awaco.”

11Ci dok Rwot owaco bota ni, “Icrael ma pe geneni bale nen nok i wanga kato pa Juda ma jone lugobani. 12En owaco bota ni acit atuc lok magi ibut piny tung kumalo, kun awaco ni,

‘Dwog cen, in Icrael ma pe geneni.

Pe abineni ki kiniga, pien an lakica mada.

Kiniga pe bimaka nakanaka.

13Ye bali keken,

ni ityeko jemo woko ikom Rwot Lubangani,

ci imiyo mari woko ki lubanga pa lurok,

kun ibedo kaworogi ite yadi ducu ma olukgu,

dok bene pe ibedo kawinyo loka”

Man an Rwot kikome ma awaco.

14Wudwog cen, wun lutino ma pe gene,

pien an laditwu;

abikwanyowu, kun akwanyo dano acel ki i gang acel acel,

ki jo aryo ki i kaka acel acel, ci abikelowu i Cion.

15Abimiyo botwu bene lukwat ma bilubu loka, wek gukwawu, ma gipitowu kun gitye ki ngec wa ki niang maber. 16Kace dong wunya i lobo ma welwu omede ikare meno, ci pe dok gibibedo kalwongo nying canduk me gicike pa Rwot. Pe dok wubitamo pire, pe wubipo pire, dok bene pe gibiyubu mukene. 17Ikare meno dong kibilwongo Jerucalem ni “Komker pa Rwot”, ci rok ducu gibicoke iye inyim Rwot, kun pe dok gilubu kit tam maracu ma i cwinygi matwal, ki bene pe dong gibibedo lujemo. 18Ikare meno jo me ot pa Juda gibiribe woko kacel ki jo me ot pa Icrael, ci gibia kacel ki i lobo matye yo tung kumalo gibino i lobo mayam amiyo bot kwarigi me bedo gipinygi en aye ngom ma meggi matwal.

Jo pa Lubanga gubedo ka woro jogi

19Rwot owaco kuman ni, “Icrael, abedo ka tamo kit macalo abiketowu kwede ikin lutinona,

kun amiyowu bene lobo ma yomo cwinywu,

gipiny maber makato lobo pa rok mukene ducu.

Dok abedo ka tamoni gwok wubilwonga ni an a Wonwu,

dok ni pe wubiloke wuweko luba.

20Adada, kit macalo dako ma pe lagen weko kwede cware,

wun bene wubedo kitmeno labongo gen mo ikoma,

wun jo me ot pa Icrael.

Man an Rwot ma awaco.”

21Dwon dano ma kok tye ka winye

ki iwi cere ma obedo barbar,

kun pido kwed lutino ma i Icrael,

pien dong gungak woko ki i yogi,

ki wigi bene dong otyeko wil woko ikom Rwot Lubangagi.

22Wudwog cen bota, wun lutino ma wupe ki gen,

an aye ma abicango cwinywu ma pe ki geni woko.

Wun wuwaco ni, “Nen, wabino boti; pien in aye i Rwot Lubangawa. 23Adada kony mo pe ma wanongo ki ikom woro jogi ma iwi got kama wo pa lwak dano winye a ki iyeni. Adada lare pa Icrael tye bot Rwot Lubangawa.

24Ento cake wa ka tinowa woro jok Baal, ma en jok me lewic, otyeko camo gin ducu mayam kwariwa gulimo ma gin aye; dyegi, romi, dyangi, awobe wa ki anyira. 25Weku dong wabutu piny ingom ki lewicwani, wek tim maracu me lewic ma watimo aye oum komwa woko dong; pien watyeko timo bal ikom Rwot Lubangawa, wan kacel ki kwariwa, cake wa ka tinowa o kwede wa onyo. Dok bene pe wabedo kalubu lok dog Rwot Lubangawa.”