Jeremia 4

Lwongo dano wek gunguti

1Rwot owaco ni, “Wun jo Icrael, kace wumito dwogo cen bota, ci myero wudwog giwu, kace wukwanyo gin me kwerwu woko ducu ki inyima, ma pe dong wubingak woko aye, 2dok bene kace wukwongo kwong ki nyinga kun wuwaco ni, ‘Kit macalo Rwot tye kwoni,’ myero wukwong i ada, kun wulubu yo me kwo ma atir, ci lurok ducu bene gibilego Rwot wek oony gum mere ikomgi, dok gibibedo kamiye deyo.” 31

Rwot owaco kuman bot jo Juda ki bot jo ma gibedo i Jerucalem ni, “Wucer potiwu woko maber, pe wuco kit kodi mo ikin okutu. 4Wun dong myero wulire woko pira an Rwot, wulire icwinywu, wun jo Juda kacel ki wun jo ma wubedo i Jerucalem; wek akemona pe okati woko ma lyel calo mac, ma biwango piny woko ma ngat mo pe romo nekone, pi gin marac ma wutimo.”

Kibimonyo Juda

5“Wutit lok man i Juda, kun wutucu pire bene i Jerucalem!

Ma wuwaco botgi ni kikut tum wek kokone orom i lobo woko ducu;

wudange matek kun wuwaco botgi ni,

guring gucit wa i taun madito ma kicelogi ki cel gogo matek!

6Wuting benderawu malo wukem Cion,

wuring woko wular komwu, pe wubed mot,

pien atye kakelo gin marac ki tung kumalo,

topiny madit mada ma neko dano tyeko woko.

7Lanek rok ducu dong otyeko kati woko macalo labwor kati woko ki i bunga ma ocule liking.

En dong oa woko ki i kabedone

me bino kabalo lobowu woko wek odong obur;

ci taunwu madito ducu me Juda bidoko wi obur labongo dano mo ma bedo i igi.

8Pi man dong wutwe bongo cola i pyerwu,

wukok kun wukum bene;

pien kiniga mager pa Rwot

peya oloke oa woko ki ikom Juda.”

9Rwot owaco ni, “Inino meno tek cwiny pa luker ki pa rwodi bitum woko; ajwaki komgi bito woko lirut, ki lunebi bene gibiuru matek.” 10Cutcut agamo loke kun awace ni, “Aya, Rwot Lubanga, adada in dong ibwolo lwak man ki jo me Jerucalem marac mada, kun iwaco ni, ‘Wubibedo maber ki kuc’; ento i ada mere imiyo pala lucwan dong kiteno wa i ngutgi.”

11Ikare meno gibiwaco bot lwak man ki bot jo Jerucalem ni, “Yamo malyet oa ki iwi cere ma yadi pe iye matye wa i tim aroo, kun kodo dok kwede yo tung bot lwaka, pe pi pyetogi macalo kal wek gubed maleng; 12yamo ma acwaloni tye ma ger mada, ma pe dong romo pyetogi apyeta keken wek gubed maleng! An aye dong kombedi atye kaloko lok pi ngolo kop ikom jona.”

Lukwor pa Juda gurume woko dyere

13Nen, lamerok tye kabino calo pol, gadigadi lwenye ducu gibedo calo yamo lapiru; aguragurane gidwir giloyo ocur woko. Can i wiwa, dong watye i peko madit kuman! 14Wun jo Jerucalem, myero wulwok cwinywu woko ki i timo tim maracu, wek wulare. En tamwu maracugu bibedo mono i cwinywu pi kare marom mene ka? 15Dwon winye kun a ki i Dan ma tito ki iwi got Epraim pi gin marac ma bitime. 16Dwon meno tito lok man bot rok ducu, ki Jerucalem bene ni lukworgi tye kabino. Mony mogo ma birumu gang woko, gibibino kun gia ki i lobo matye kamabor; ma gibidange ki wo mapol ikom taun madito me Juda. 17Gin birumu Jerucalem woko dyere calo lukur poto ma gurumu poto woko litit, pien onongo Juda ojemo woko ikom Rwot. 18Kitwu ki gin ducu ma wutimo aye okelo can man ikomwu. Man aye kipwolawu, can makec atika; can man ton wa i cwinywu kikome.

Cwiny Jeremia cwer pi jone

19Arem dong omaka woko, omaka woko do!

Areme dong wango koma adada.

Oii, mil wa i pal cwinya kikome!

Adununa tye ka gone matek lirimrim;

pe atwero ling wa ki acel;

pien abedo kawinyo koko tum ma kikutu,

pi oduru me lweny.

20Can madit poto dode ikom can madit wadi,

lobo ducu dong kibalo woko, piny odong obur.

Kijwero kemana woko oyotoyot mada,

dok kimuku kicikana woko bene pi dakika manok keken.

21Abibedo ma aneno bendera me lweny pi kare marom mene,

kun abedo bene kawinyo koko tum?

22Rwot dok owaco kuman ni, “Jonagu gin luming, pe gingeya;

gin lutino ma wigi oding,

pe gitye ki kit niang mo.

Giryek meggi i tiyo gin marac keken,

ento pe gingeyo tiyo gin maber.”

Ginanyuta pa Jeremia pi topiny matye kabino

23Ka aneno lobo, ci nen obale woko odoko obur,

labongo gin mo ma odong iye;

ki malo i polo kuca,

lakalatwe ki dwe bene pe giryeny.

24Aneno wi godi, ci aneno gitye ka yenge ayenga ni yegeyege,

ceregu nongo tye kawire liwir ma gigwenye agwenya.

25Aneno ci pe anongo dano mo kunu,

winyo me polo ducu gutuk gucito woko.

26Aneno piny,

ci anongo ni lobo mayam ceko cam tutwali dong odoko tim aroo,

taun madito ma i iye ducu dong kibalogi woko gudoko obur

pi kiniga magwar ma onongo omako Rwot.

27(Rwot owaco kuman ni, “Lobo man ducu bidoko obur; ento en pe ebityekone woko liweng.)

28Lobo bikumu pi lok man,

ki polo bene bicido woko macol licuc.

Pien dong atyeko tito kamaleng gin ma onongo ayube me timone;

kica pe bimaka wa ki acel, dok bene pe abiloko tama.”

29Jo ma i gang ducu gibiringo woko

pi wo pa wegi aguragura ki wegi atero;

gibidonyo woko i bunga macol,

gibicito wa ikin gotgu;

gangi ducu dong kibibwoto woko,

dano mo pe ma bibedo i igi.

30In Jerucalem, in ma dong idoko wi oburri,

pingo iruku bongo makwar?

Pingo kono ideyo komi ki gin me deyo ma obedo jabujabu,

kun i wiro wangi woko ki rangi wek onen maber makato?

Iyele nono me deyo komi ni onen maber.

Pacogigu ducu gicayi acaya;

dok giyenyo yo me neki woko.

31Awinyo koko mo ma cal ki koko pa dako matye ka rem ki nywal,

matye ki arem madwong calo dako ma pud nywalo latin kayone anywala.

Cion tye kakoko kun kwite pi nongo yweyo,

kun ryeyo cinge woko ma waco ni,

“Can iwiya gira! Dong gitye kabino kaneka woko.”