Jeremia 5

Bal pa jo Jerucalem

1Rwot dok owaca kuman ni,

“Wun jo me Jerucalem, wuring kun wugwenye agwenya i dye yoowu me Jerucalem;

wek wunen ci myero wuniang iye maber!

Wungi gang catwu maber!

Wuyeny piny i dyekale ducu wek wunen

ka wutwero nongo dano mo iye matye ki kit ma atir,

dok bene ma tiyo ki ada;

ka wek dong atim kica ki Jerucalem.

2Kadi bed gikwongo kwong i nying Rwot kun giwaco ni,

‘Kit macalo Rwot tye makwoni,’

ento nongo pud dok gikwongo kwong me gobagoba.

3Ai Rwot, in giri iyenyo jo ma gitye ki ada ma gigene.

In ipwodo joni,

ento gin pe guwinyo kit arem mo;

ci pe gurwoo, dok pe guniang gin mo gukwero winyo pwonyi woko.

Tokgi odoko tek makato got;

kun gukwero ngut woko.

4Ci awaco ni, ‘Magigu lucan keken,

pe gitye ki kit ngec mo;

pien pe gingeyo yo pa Rwot,

ma en aye cik pa Lubangagi.’

5Abicito bot jo madito ma gin wegi twero,

ci abiloko kwedgi;

pien gingeyo yo pa Rwot,

ma en aye cik pa Lubangagi.

Ento gin bene onongo dong gukwero okol pa Rwot woko,

dok bene onongo gucodo ogwile woko omiyo pe gulubu cike.

6Pimeno, labwor mo bia ki i bunga ci binekogi woko,

ki orudi ma bedo i tim aroo bibino bityekogi woko,

ki kwac aye ma dong tye kakurugi ikin taun gi,

ma ka ngat mo ki ikin gi ka oa okato woko ci kibingidone woko matinotino;

pien balgi dong odoko dwong,

dok tim me bwoto Lubanga bene dong omede woko matek ikin gi adada.”

7Rwot openyo ni, “Atwero timowu kica pi balwu ningning wun jo Jerucalem?

Lutinowu dong gubwota woko,

kun gubedo ka kwongo kwong ki nying lubanga mogo ma pe obedo Lubanga kikome.

Ikare ma amiyo gucamo cam guyeng adada,

ci gutimo abor,

dok guwoto kacel gucito ka woro lubanga mukenegu calo ngat ma bedo ki malaya.

8Onongo gubedo macalo twoni aguragura ma kipitogi maber ma guyeng ma gimito tigo,

kun cwiny ngat acel acel pyete kok pi dako pa lawote.

9Ci pe abiketo can ikomgi ningning pi lok magi?

Man an Rwot ma apenyo;

dok bene pe abiculu kwor

ikom rok macalo man pingo?

10Wek acwal lumeroke gucit i potone kun giwoto ki ikin olok ci ilwer jone woko calo ilwero olok,

ento pe gilwer gityekgi woko liweng.

Abiwaco botgi wek gujwer jange woko,

pien gin pe gubedo pa Rwot.

11Pien jo me ot pa Icrael ki jo me ot pa Juda

pe gubedo ki gen mo wa ki acel ikoma, man an Rwot aye ma awaco.”

Rwot okwero Icrael woko

12Gubedo kaloko lok gobagoba ikom Rwot, kun giwaco ni, “En pe bitimo gin mo; dok gin marac mo bene pe bipoto ikomwa; pe bene kibilweny ikomwa ki pala lucwan, kadi kec bene pe bipoto i lobowa. 13Gin giwaco ni lok pa lunebi bedo calo yamo; ni gin pe gitye ki lok mo ma oa ki bot Lubanga. Meno gin ma bitime ikomgi.”

14Pimeno an Rwot Lubanga me mony awaco kuman ni, “Pien dong guloko lok man, nen, atye ka loko loka matye i dogini wek odok mac, ki lwak man dong aloko gidoko yen, ci mac biwangogi woko.”

15Wun jo me ot pa Icrael, Rwot owaco kuman ni, “Nen, abikelo rok mo ma bia ki kamabor ikomwu. Roke rok matek, dok roke rok macon, rok ma wun pe wungeyo loko lebgi, dok bene pe wuromo niang gin ma giwaco. 16Aterogi ducu neko dano woko, gin ducu cogi oteka keken. 17Gibicamo cam ducu ma wukayo woko liweng; dok gibineko awobewu ki anyirawu woko; gibicamo dyegiwu ki romiwu kadi wa dyangiwu woko; gibicamo olokwu ki oduruwu. Taunwu madito ducu ma kirumugi ki cel gogo ma wugenoni kibijwero woko ki pala lucwan.”

18Rwot owaco ni “Ento kadi wa ikare meno pe abityekowu woko liweng. 19Kace lutuwu gibipenyo ni, ‘Pingo Rwot Lubangawa otimo gin magi ikomwa?’ In ibiwaco botgi ni, kit macalo wubwoto an wokoni kun wubedo katiyo bot lubanga pa lurok i lobowu, kitmeno wubitiyo bene bot lurok i lobo ma pe mewu.”

Lubanga ociko jone

20Rwot owaco kuman ni, “Tuc lok man i ot pa Yakobo, tit pire i lobo Juda ni: 211wuwiny lok man, wun luming ki jo ma wiwu oding, ma wangwu tye, ento pe wuneno, ma itwu tye, ento pe wuwinyo. 222 An a Rwot; pingo pe wulwora? Pingo komwu pe myel inyima? Aketo kweyo obedo wang apoki nam, apoki ma rii nakanaka ma en pe twero katone; kadi bed biamwonyi me nam twage, ento pe bibalo woko, kadi piine mor, pe biromo kato ki i wiye. 23Ento wun lwak man wun jo ma ngutwu tek dok wun lujemo ki i cwinywu; wun wuloke dok wungak, wucito giwu, ci wuweka woko. 24Pe bene wuparo ki i cwinywu, ni omyero wulwor Rwot Lubangawu, ma en aye ngat miyowu kot i karene, kot ikare me coyo kodi ki kot ikare me kac, dok miyo wubedo ki gen ka kare me kac oromo. 25Balwu ma wutimo dong oryemo jami magi woko ki botwu, balwu ogengowu nongo jami magi mabeconi woko.

26Pien jo maracu gitye ikin jona; gibedo ka kiyo piny calo ludwar winyo. Giciko owicgi; ci gimako dano. 27Odigi opong ki jami ma kinongo i yo me buma, calo aduku ma opong ki winyo; pimeno dong gudoko jo madito dok bene gulony, 28gucwe dok komgi nen liyu mada, gitimo bal lataya ma ka gike pe; pe gingolokop atir, pe gikonyo lutino kic wek gubed maber, dok bene pe gipido lok pa jo ma piny obwoyogi kakare. 29Ci an pe abiketo can ikomgi pi lok magi ningning? Dok bene pe abiculu kwor ikom rok macalo man pingo? 30Ginaura mamiyo lworo dong otime woko i lobo kuman: 31lunebi gitito lok gobagoba, ki ajwaki bene gitye katiyo gin ma igi mito; jona gimaro kit tim macalo meno. Ento gibitime ningning ka agikine dong oo?”