Jeremia 6

Lumerok gurumu Jerucalem

1Wun jo pa Benjamin, wuring woko wular komwu! Wua woko ki i Jerucalem! Wukut tum okok i Tekoa, ci wuting bendera malo i Betakerem, pien gin marac tye kabino ma a ki yo tung kumalo, ma bityeko lobo woko liweng. 2In taun me Cion, in ibedo macalo olet maber pi ka cam pa dyangi, ento kibibalo ne woko. 3Dong rwodi kacel ki dul monygi bibino ka lweny ikomi; ci gibiguru kemagi gibirumi kwede woko dyere; gibikwayo limgi makwo kenyo, kun dano acel acel kwanyo kabedo ma en oyero. 4Gin gibiwaco ni, “Yub lweny dong ikome! Wuyube dong wacito walweny ikome i dyeceng amac!” Ento dok gibiwaco ni, “Cawa dong otum woko, pien ceng dong olenge woko cok poto, nen tipu ma umu piny otyenoni dong olyane woko mabor! 5Wuyube, wek wacitu walwenyu ikome idyewor, wek wabalu kabedone woko!”

6Pien Rwot me mony owaco kuman ni, “Wutong yadinegu woko ducu piny; wutor cel lobo wurum ki Jerucalem woko. Man en aye taun madit ma myero kiket can ikome; pien jo ma iye gibedo ka unu dano. 7Kit macalo wang it gwoko piine bedo malengi, Jerucalem bene tye ka gwoko tim maracu kit meno. Awinyo pi tim bwami ki nek matye i dye taun madit man; aneno two ki wang bur keken iye. 8Wun jo Jerucalem, wuwek lok man obed calo lok ma acikowu kwede, ka pe aa awekwu woko; weko aloko lobowu doko obur, kama dano mo pe bedo iye.” 9Rwot me mony owaco ni, “Kibikwanyo jo Icrael woko liweng calo kipwono nyig olok ki i jange, ngat mo pe bidong. Pimeno myero ilar jo ma itwero larogi, calo lapur ma beko nyig oloke.” 10Ci an agamo ni, “Abiloko bot anga wek acikgi, wek guwiny loka? Nen, gudingo itgi woko, pe gitwero winyo lok mo. Nen, gukwero winyo pwonyi woko, dok gicayo loki ma ilokogu acaya, ai Rwot, kun pe giketo cwinygi iye. 11Pimeno akemo pa Rwot omaka woko; ma pe bene dong atwero juke.”

Ci Rwot ogamo loka kun waca ni, “To akemoni ikom lutino ma gitye i dye yoo, ki ikom awobe ma gucoke kacel bene. Co kacel ki mon kibikwanyogi ci kibiterogi woko, wa jo muteggi bene pe gibibwot. 121 Kibimiyo odigi woko bot jo mukene, potigi kacel ki mon gi bene; pien abiketo can ikom jo ma gibedo i loboni.” 13Cake ikom jo matino o kwede wa ikom jo madito dano acel acel owor woko pi lim ki nongo magoba i yo ma pe atir; cake ikom lunebi o kwede wa ikom ajwaki, gin ducu gitiyo ki goba keken ma pe gigene. 142Gibedo katuku ki wang bur pa jona atuka macalo delkom ma pwac apwaca. Gimote ki mot me kuc kun giwaco ni, “Kuc, kuc,” kun kuc mo peke. 15Tika yam lewic omakogi ikare ma gutiyo gin me kwer? Pe gire, lewic mo pe omakogi wa ki acel. Pimeno kibityekogi woko calo jo mukene ma kibityekogi ikare ma abiketo can ikomgi gibitum woko ducu man an Rwot aye ma awaco.

Jo Icrael gukwero lubu yo pa Rwot

16Rwot owaco bot jone kuman ni, “Wucung kama yoo ongole iye wek wunen, dok wupeny bene pi yoo me kare macon, kama yoo maber tye iye, wek wun bene wucak wot kun wulubu, wek bene wunong yweyo ki kuc i kwowu.” Ento gin giwaco ni, “Wan pe wabilubu yonu kadi ki acel.” 17Ci Rwot oketo lukurpiny me kuruwu kun waci, “Wuwiny koko tum!” Ento wun wuwaco ni, “Pe wabiwinyone kadi matidi mo.”

18Pimeno Rwot owaco ni, “Dong wuwiny wun lwak me rok ducu, dok wunge gin ma bipoto ikomgi, wun lurok ma wucoke kany. 19Winy, in lobo, nen, atye kakelo gin marac wek opot ikom lwak man, adwogi me gin maracu mayam gubedo katimone pien gin ducu pe gubedo kawinyo loka, dok bene gukwero lubu cika woko. 20Pingo gikelo odok luban bota ki i lobo Ceba, nyo lum malim ma ngwece kur ki i lobo matye kamabor? Gitum awangagi ducu pe abigamo kadi wa gityergigu ducu pe yomo cwinya. 21Pimeno an Rwot abicibo gin ma yoko dano i wangayo pa lwak man, ma ka gibiwot ci gibiyoke kwede matek; lunyodo kacel ki lutino, luwotgi kacel ki luremgi ducu gibito.”

Mony ma bia ki tung kumalo

22Rwot owaco kuman ni, “Nen, lwak me rok moni tye kabino kun gibia ki i lobo ma yo tung kumalo, rok matek matye kamabor mada tye kayube pi lweny. 23Dong gumako, atumgi ki tonggi woko liking, giger adada, pe gitye ki kica mo wa ki acel; woogi winye calo nam matye ka mor. Giringo ki aguragura, ma gurye woko, calo jo ma dong kuru lweny akura ikomwu wun jo Cion!”

24Dong watyeko winyo lok ma kikelo botwa pire, “Jo me Jerucalem giwaco ni, cingwa ducu okwe woko ma dong pe timo gin mo; remcwiny madwong oketo komwa woko ducu calo arem pa dako matye ka rem ki nywal. 25Pe watwero kato woko me cito i dye bar, pe bene watwero wot i yoo; pien lukworwa gitye ki pala lucwan, ikabedo ducu inongo tye gin ma kelo lworo ikom dano.”

26Rwot waco kuman ni, “Wun jona, wutwe bongo cola i pyerwu, dok bene wubed ka ngene i buru. Wukok kit macalo onongo wutwero kok kwede pi latin acel keken ka oto, wukok ki kec cwiny kun pig wangwu cwer adada; pien ngat ma bino katyekowuni bibino oyotoyot poto woko ikomwu. 27In Jeremia, nen dong atyeko keto in ikin jona me bedo ngat ma ngiyogi dok ma temogi; temgi wek inge, dok inong kit ma gibedo kwede. 28Gin ducu jo ma lujemo ma ngutgi nwang, ma giwoto ki lok me kwot keken i kabedo ducu; gubedo jo ma lujemo ma ngutgi tek calo mola ki nyonyo, gin ducu lutim bal keken. 29Lutet gubuku mac olyeti okur adada ma mwoc matek, mac dong olenyo cet nyonyo woko, ento dong ngat matye kaliyone yele nono, pieno jo maracu pe kikwanyogi kiterogi woko cen. 30Kibilwongogi ni cet ryal ma kikwero, pien an Rwot dong atyeko kwerogi woko.”