Jeremia 7

Jeremia otucu lok i Ot pa Lubanga

1Rwot oloko kweda kun waca ni, 2“Cit icung i dogola me Ot pa Rwot, ci itit lok man ni: wun jo Juda ducu ma wudonyo ki i dogola man kun wucito ka woro Rwot wuwiny lok man. 3Rwot me mony, ma Lubanga pa Icrael, owaco kuman ni, wuyub kitwu kacel ki tim mewu ducu, ci abiweko wubedo i kabedo man. 4Pe wubed kageno lwak lok magi me bwolagu ni, ‘Man Ot pa Rwot, man Ot pa Rwot, man Ot pa Rwot.’

5Pien kace wuyubu kitwu ki timwu ducu adada, kace wutiyo gin ma atir ikinwu kekenwu, 6kace pe wuunu labedo mo, lutino kic nyo mon to, dok bene pe wuneko dano ma pe ki bal i kabedo man, ma pe wuworo lubanga mukenegu mamiyo wupoto i can, 7ci abimiyo wubedo i kabedo man, i lobo mayam amiyo bot kwariwu ikare macon me bedo meggi matwal.

8Nen, wuketo genwu i lok me bwola ma pe konyogu. 9Pud wukwalo kwo, pud wuneko dano, wutimo abor, wukwongo kwong gobagoba, pud wuwango odok eceta bot Baal, dok bene wuworo lubanga mogo mayam pe onongo kong wungeyo con. 10Wubedo katimo gin ma iya dagi, dok bene wubino wucung kwede inyima i Ot man, ma kilwongo ki nyinga, kun wuwaco ni, ‘Dong kilarowa woko!’ Ento pud dok wumede ki timo gin magi me kwer ikoma! 111Wutamo ni oda ma kilwongo ki nyingani odoko boro pa luyak ki botwu? Nen, an kikoma aye dong atyeko neno gin ducu ma wutye katiyone. 122Kombedi dong wucit i Cilo i kabedona macon ca, kama yam aketo oda obedo iye mukwongo, wek wunen gin ma atiyo i iye pi gin maracu ma jona jo Icrael gutimo. 13Wun dong wutimo gin magi ducu ma akwanogini, kadi bed abedo kawaco lok man botwu teretere, ento wun wukwero winyone woko, dok bene ikare ma alwongwu, wun pe wugamo doga, man an Rwot ma awaco. 14Pimeno abitimo gin ma atimo i Cilo ikom oda ma kilwongo ki nyinga ma wuketo iye genwuni. Abitiyo gin marom kitmeno i kabedo man mayam amiyo botwu ki bot kwariwu, kit macalo nene atiyo i Cilo. 15Abiryemowu woko ducu ki inyima, kit macalo aryemo kwede lutuwu ma likwayo pa Epraim.”

Dano gumede ki jemo ikom Lubanga

16Rwot dok owaca ni, “Dong in Jeremia, pe myero ileg pi lwak man, pe iting dwoni nyo ikok ka lega pirgi; pe ibak dogi bota pirgi bene, pien pe abiwinyo loki kadi ki acel. 17In pe ineno gin ma gitye katiyone i taun madito me Juda ducu ki i dye yoo me Jerucalem ce? 183Lutino gicoko yen, wegigi gimoko mac, ki mon ginywango moko me tedo mugati pi Daker me Polo; dok bene gionyo gityer amatagu bot lwak lubanga, pi ngeto cwinya wek kiniga omaka. 19Gin mono gitamoni an aye ma gitye ka ngeto cwinyeni? Pe gire, gin gitye ka kelo can ikomgi ken gi, dok bene gitye kakelo lewic ikomgi ken gi. 20Ma omiyo an Rwot Lubanga awaco kuman ni, nen, abitoyo kinigana ki akemona woko ikom kabedo man, ikom dano ki ikom lee, ikom yadi ma i timgu ki ikom ginapita ducu ma ocek i poto; akemona biwang adada calo mac ma pe kitwero nekone.

21Jona, gitum ma wukelo bota me gityer mogo ki ikin gi nongo myero kiwango woko ducu bota, ci mukene mudonge wuromo camone ki inyima. Ento an Rwot me mony ma an Lubanga me Icrael awaco dong botwu kuman ni, wurib gitum awangawu ikom gitum mukenegu wek wucam woko ducu! 22Ikare mayam akwanyo kwariwu woko ki i lobo Ejipt, pe onongo acikogi pi lok ikom gitum awanga ki gitum mukenegu. 23Ento acikogi ni myero guwiny loka, wek abed Lubangagi, dok wek gin gubed jona. Dok acikogi kit ma myero gukwo kwede wek gubed ma jami ducu woto maber botgi. 24Ento gin pe gulubu cika, dok bene pe guciko itgi kawinyo loka, ento gubedo kalubu tamgi ken gi ki jemo me cwinygi ma opong ki gin marac, ci gumede gudoko lutim marac ma ka doko jo maber. 25Cake ikare ma kwariwu gua kwede woko ki i lobo Ejipt o kwede wa onyo, abedo kacwalo botwu lutica ma gin lunebi teretere, nino ki nino; 26ento wun pe wuwinyo loka, dok pe wuciko itwu bene me winyone, ento wujingo ngutwu odoko tek. Wudoko ludingo ki lujemo adada ma okato kwariwu woko.

27Kitmeno, Jeremia, ibiloko lok magi ducu botgi, ento gin pe gibiwinyo loki. Ibilwongogi bene, ento pe gibigamo dogi. 28Ci ibiwaco botgi ni, ‘Man aye rok ma nene jone pe gulubu lok pa Rwot Lubangagi, dok pe bene guye lok me pwony; lok ada dong otyeko rwenyo woko liweng, dok pe bene giloko pire matwal.’”

Tim me bal i nota me Kinom

29An Rwot awaco kuman ni,

“Wun jo Jerucalem, wulyel yer wiwu ci wubol woko cen;

wucak wo ki koko i kabedo ma odong nono ma iwi godi,

pien an Rwot dong atyeko kwero dok abwoto

jo me yalwak man ma akemo omake ikomgini.

30Pien jo Juda dong gutimo gin marac inyima. Guketo cal jogigi ma en gin me kwer ki tung botani i ot ma kilwongo ki nyingani, me balone woko. Man an Rwot aye ma awaco. 314 Guyubu wang jok i nota me Kinom ma kilwongo ni Topet, kama gin twero wango iye awobegi ki anyiragi ki mac. Yam acikogi ni pe gutim kitmeno, dok bene pe gubedo katamo lok macalo meno wa ki acel. 32Pimeno, nen, kare tye kabino ma pe dok kibilwongo ni Topet, nyo nota me Kinom. Ento kibilwongo ni nota me Nek, pien kibiyiko dano i Topet, pien kabedo me yiko dano mukene dong nongo bibedo peke kadi ki acel. 33Ci dong kom jo magi ma gutoni bidoko cam pa winyo ki pa lee me tim; ma ngat mo pe ma biryemogi woko. 345Lobo bidoko tim aroo, dong i gangi me Juda ki i dye gudu me Jerucalem abijuku wo me yomcwiny ma dano gitye kwedeni woko, kadi wa wo me dwon lanyom ki dwon nyako ger bene.”