Jeremia 8

1An Rwot awaco kuman ni, “Ikare meno kibikwanyo cogo pa luker me Juda, ki pa rwodine, ki pa ajwaki, ki pa lunebi, kacel ki pa jo ducu ma gibedo i Jerucalem ci kibiwotogi woko kamaleng ki i lyelgi. 2Ci kibimoyogi woko inyim ceng ki dwe ki inyim lakalatwe me polo, mayam gumarogi kun gitiyo botgini, mayam gubedo kalubu korgi, kun giyenyo tam ki botgi dok guworoni. Pe kibicokogi kacel kadi ki yikogi, gibibedo calo cet dyang ma guket ata i ngom. 3Jo ducu me rok man marac ma gubwot, ma gibedo i kabedo kama yam aryemogi gucito iye, gibimitoni twara kono gito woko loyo ma gibedo kwo.” Man lok ma an Rwot me mony aye awaco.

Bal ki pwode

4Rwot owaca ni atit bot dano ni, “Ka dano gupoto piny, ci pe dok gia malo? Kace ngat mo ongak woko ki i yoo ma en pe tye kawoto cito iye, ci en pe loke dwogo cen? 5Pingo jona kono ka gungak woko pi woro cal jogi ci gikwero dwogo cen bota nongo gimede ameda ki weko yona? Gumoko woko liking ilok me bwola, kun gikwero loke woko me dwogo cen bota. 6Abedo katero ita kawinyo lokgi, ento gin pe guloko lok ma atir; dok dano ma ngut pi gin maracu ma en otimo pe, giloko kun giwaco ni, ‘An abalo onongo atimo gin ango marac.’ Ngat acel acel gire woto i yone kit ma iye mito, calo aguragura matye kangwec laro lweny. 7Kadi winyo acebe bene ngeyo karene me dwogo cen; ki akuri, lakalagwec ki ogoro gigwoko karegi me binogi; ento jona gikwiya cik ducu ma yam amiyo. 8Wutwero waco ningning ni, ‘Wan waryek, cik pa Rwot bene tye botwa’? Nen dong Lupwonycik ma pe gigene gutyeko loko cik woko ki cocgi, guloko odoko lok goba. 9Lewic bimako luryeko, cwinygi bibale ci kimakogi woko. Nen, gutyeko kwero lok pa Rwot; ci kit ryeko ango ma dok gitye kwede? 101Pimeno abimiyo mon gi woko bot co mukene, ki potigi bot jo ma otayogi ki lweny, pien cake ki ikom jo matino o kwede wa ikom jo madito dano acel acel owor woko pi nongo lim me magoba i yo ma pe atir; cake ki ikom lunebi o kwede wa ikom ajwaki gin ducu gitiyo ki goba keken ma pe bene gigene. 112 Gibedo katuku ki wang bur pa jona atuka macalo delkom ma opwac apwaca ma pe gucang woko liweng. Gin gimote ki mot me kuc ma kun giwaco ni, ‘Kuc, kuc,’ ma nongo kun kuc mo peke. 12Tika yam lewic omako gin jona ikare ma gutiyo gin me kwer? Pe gire, lewic mo pe omakogi wa ki acel; dok pe gumiyo wanggi omyeno wa ki acel pi lewic. Pimeno gin bene kibipoto calo jo mukene ma gupoto; ikare ma abiketo can ikomgi pi pwodogi, ci gibitum woko ducu. Man an Rwot ma awaco. 13Onongo amito guru jona, macalo lapur guru cam ma okayo ki i potone; ento jona gubedo calo olok ma nyige peke, ki nyig oduru bene peke iwi yat oduru; potegu bene ducu otwo woko, pimeno an dong amiyo gipinygi woko odoko gire lobo ma lurok aye bileyo.”

14Jo pa Lubanga gupenyo ni, “Pingo pud dok wabedo mot? Wugure kacel wek wacitu i taun madito ma kirumu ki cel gogo wek wacitoyu wunu ki kunu pien Rwot Lubangawa dong oketo can ikomwa ni wato, en omiyowa bene pii matye iye kwir marac wamato, pien onongo dong wabalo ikome. 15Wabedo kayenyo kuc, ento gin mo maber ma wanongo peke, ikare ma onongo myero wacang iye, wanongo gin makelo lworo keken. 16Yweyo me kiniga pa aguragura pa lukworwa winye wa i Dan; ka twoni aguraguragi pa lukworwa okok ci lobo ducu yenge. Lukworwa gubino ka balo lobowa woko kacel ki jami ducu matye iye, pi jwero taunwa madito woko kacel ki jo ma gibedo iye.”

17An Rwot awaco kuman ni, “Nen atye kacwalo twol, twol uyu ma kwire rac ma pe kitwero bangone ki yat, ci gibikayowu malit.”

Cwercwiny pa Jeremia pi lutugi

18Can ma atye kwede dong dit ma pe romo cang,

atye ki two madit me cwercwiny mada i cwinya.

19Kong iwiny, koko pa jona

oromo i lobo woko ducu, kun gikok ni,

“Rwot mono pe i Cion?

Itamoni Rwot me taunwa me Cion mono dong pe iye?”

Rwot ma lalocgi ogamo ni,

“Pingo kono wungeto cwinya ki cal jogiwu?

Pingo wun wumiyo kiniga omaka pi wun me woro lubanga pa lurok mogo ma pe gikonyogu?”

20Dano gikok ni,

“Kare me kac dong okato woko, ki kare me oro bene dong ogik,

ento pud pe kilarowa.”

21Cwinya rem calo bur odet iye

pien jona dong kiketo bur woko ikomgi,

akumu pi can, ma cwercwiny dong obwoyo koma woko.

22Yat me cango dano dong pe tye i Gilead bo?

Daktar kono pe kunu?

Pingo kono pe gicango jona?