Jeremia 9

1Ka twere onongo myero wiya obed wang it me pii,

ki wanga nongo myero obed

wang it ma gunye ki pig wang,

wek omiya abed ka kok dyeceng ki dyewor benebene

pi jona ma dong kinekogi wokoni.

2Onongo amito ni kono nene kabedo mo obed tye ma abedo iye

macalo ka gony pa luwot i tim aroo,

kono aweko jona ci acito woko kamabor kwedegi!

Gin ducu pe lugen ikom Lubanga,

gin ducu lutim tim me gobagoba.

3Gin kare ducu gitye ma guyube woko me loko lok goba;

bedo labongo gen aye dong oloyo lobo woko ma kaka tim me ada.

An Rwot awaco ni,

“Jona gitimo gin marac teretere, dok bene pe gingeya macalo Lubangagi.”

4Dano acel acel myero ogwoke ikom lawote,

ki bene pe myero ogen omine!

Pien omego acel acel dong obedo labwola calo Yakobo,

dok dano acel acel bene kwoto lawote.

5Ngat acel acel bwolo lawote, dok dano mo ma loko lok ada pe;

dong gutyeko pwonyo lebgi woko me loko lok goba,

gimede ameda kitimo bal dok bene pe giromo ngut pi timo bal.

6Timgi me unu dano tye kamede ameda,

ki timgi me loko lok goba bene mede ameda,

dok bene gikwera woko ni pe gingeya, ni an Lubanga.

7Ma omiyo an Rwot me mony awaco kuman ni,

“Nen, abitemogi macalo nyonyo ma kiliyo.

Jona dong gutimo gin marac,

gin ango kono dong ma dok atwero tiyo kwedgi?

8Lebgi obedo calo atero ma lake ki kwir marac;

gin giloko lok me bwola keken.

Dano acel acel loko lok mamit bot lawote,

ento ki i cwinye nongo tye ki yub ma okano wek eneke woko.

9Itamoni pe abiketo can ikomgi pi tim magi?

Pe abiculu kwor ikom rok macalo man?”

Man an Rwot ma awaco.

10An Jeremia dok awaco ni, “Wek dong akok pi godi,

dok abikok kun cwinya cwer pi oletgu,

pien dong gutwo woko,

ngat mo ma woto kun ngolo ki iye dong peke.

Koko pa dyangi bene pe dong winye kunu;

winyo ki lee tim ducu dong guringo gurwenyo woko, dong gipeke matwal.”

11Ci Rwot dok owaci, “Abiloko Jerucalem doko wi obur,

kabedo ma too aye bedo iye:

taun madito me Juda ducu dong bidoko tim aroo,

kama ngat mo pe bedo iye.”

12Ci apenye ni, “Rwot gin ango ma omiyo lobo bibale woko dong obur ma ngat mo pe twero wok ki iye? Dong dano mene maryek ma iwaco ni etwero niang lok man? Rwot in mono oloko lok magi bot anga wek otit loke bot jo mukene?”

13Ci Rwot ogamo ni, “Man ducu otime pien jona gubwoto cika ma nene amiyo botgini, dok bene pe guwinyo loka, dok bene pe gubedo kun gilubu cika. 14Ma ka timo meno, gin gumiyo ngutgi obedo nwang, ci gubedo ka woro jogi Baal mapatpat, kit macalo kwarigi opwonyogi kwede. 15Pimeno an Rwot me mony, ma an Lubanga pa Icrael, awaco kuman ni, ‘Nen, abimiyo jo magi gibicamo pot dek makec macalo yat roka, dok bene gimato pii ma iye ki kwir. 16Abikeyogi woko ikin lurok ma gin kikomgi pe gingeyo, kadi wa kwarigi bene yam pe gungeyo; ci abicwalo dul mony lubu korgi ki pala lucwan nio wang ma atyekogi woko liweng.’”

Jo Jerucalem gukok pi kony

17An Rwot me mony awaco kuman ni,

“Kong wutam loki, ci wulwong mon ma gingeyo wer kokogu wek gubin;

wucwal loke wek wulwong mon makwiri gubin.”

18Ci dano gugamo ni,

“Wek gurune gubin oyotoyot ci guwoo ki koko ikomwa,

wek pig wangwa omol piny ma cito lipya,

ma del wangwa bene odyak woko ki pig wang.”

19Kong wuwiny dwon me koko ma a ki i Cion,

“Dong watum woko do!

Lewic dong omakowa woko marac,

pien dong wa a woko ki i lobowa,

gangiwa bene dong kijwero woko liweng do!”

20Ci an Jeremia awaco ni,

“Wun mon, dong wuwiny lok ma Rwot aye owaco,

wucik itwu wek wuwiny lok ma oa ki idoge.

Wupwony anyirawu ki koko,

dok ngat acel acel opwony lawote ki wer lyel.

21To dong obino woko ikomwa ki iwang dirica,

ci odonyo woko i gang kerwa ducu,

oneko lutino woko ducu ki i dye yoo ki awobegu ki i dye bar.”

22Ci Rwot owaca ni atit kit man ni,

“Kom jo ma oto kibikeyo woko ata,

kibikeyogi woko calo odur cet dyang ma guket ata i olet,

calo wit ngano ma lukac gukayo guweko odong i poto,

ma ngat mo dong pe ma bicoko tero paco.

Man en aye gin ma Rwot owaca ni atitiwu.”

23An Rwot awaco ni,

“Dano maryek myero pe onyate ki ryekone,

kadi ki dano matek bene pe myero onyate ki tekone,

dano ma olony bene pe myero onyate ki lonyone. 241

Ento ka ngat ma mito nyate,

myero onyate ni eniang dok engeyo an,

ni an a Rwot ma atye katiyo gin ma nyutu mar ma pe loke,

anyutu bene ngolo kop atir ki bedo ki kit ma atir i lobo.

Magi gin aye jami ma cwinya mito.

Man an Rwot ma awaco.”

25An Rwot awaco ni, “Nen nino tye kabino, en aye kare ma abiketo iye can ikom jo ma kilirogi ki i del komgi ki woko ento pe ki i cwinygi. 26Abiketo can ikom jo Ejipt, jo Juda, jo Edom, jo Ammon, jo Moab ki jo ducu ma gibedo i tim aroo ma gilyelo yer wigi woko dong macego; Jo magi ducu gin gulire ikomgi ento pe gigwoko gicike ma lanyute obedo lire me komgi kitmeno; rok magi ducu pe gulire ki i cwinygi, kadi ki jo me ot pa Icrael bene pe gulire ki i cwinygi.”