Jeremia 10

Wor cal jogi ki woro Lubanga

1Wun jo Icrael wuwiny lok ma an Lubanga atye ka lokone botwu. 2An Rwot awaco kuman ni,

“Pe wulub kit me woro lubanga pa lurok,

dok cwinywu bene pe myero obale ka wuneno lanyut mo tye i polo,

kadi bed rok mukenegu cwinygi obale woko pire.

3Pien kit ma lurok woro ki lubangagi obedo gin me bwolo keken ma pe ada.

Gitongo yat gireto woko piny ki i bunga, ci lapac payo woko maber ki koyone nyo ki jami mukene me pac.

4Ci ludiro gideyo kome woko ki ryal nyo jabu;

gikwanyo nyonyo giguru ki cumari wek ocung matek liking ma pe poto woko piny.

5Cal lubangaginu obedo calo wir yat ma kicibo ocung i poto okwer pi ryemo winyo,

pe bene gitwero lok; kitingogi mege atinga, pien pe gitwero wot.

Pe ilworgi,

pe gitwero timo gin mo marac ikomi,

dok bene pe gitye ki twero mo me timo gin mo maber.”

6Pe tye lubanga mo macalo in, ai Rwot;

in idit, dok nyingi bene dit dok tek mada. 71

Anga mono ma pe myero olwori,

in i Rwot maloyo rok ducu?

In imyero me alwora.

Pe tye ngat mo macalo in

ikin luryeko ducu me rok mapatpat,

kadi ki ite kergi ducu.

8Danogi ducu ma gitamo ni luryeko gubedo calo jo ma luming dok wigi bene oding.

En bao ma giyubu pi cal lubangani tika pwonyogi ki gin mo?

9Cal lubangagi kidero kome woko ki ryal ma kidino woko ma gikelo ki i Tarcic,

ki jabu ma gikelo ki i Upaj.

Gin ducu gubedo tic pa lupac

ki dok bene tic ma latet jabu otiyo ki cinge:

ginarukagi obedo makwar ki dok lamarlamar;

gin ducu gubedo tic ma jo ma ludiro tic aye gutiyo.

10Ento in, Rwot, aye Lubanga ma ada, in Lubanga makwo,

dok bene in aye rwot mabedo nakanaka.

Ka ce akemo omaki, ci lobo ducu yenge,

rok ducu pe twero ciro kinigani.

11(Wun jo Icrael wubiwaco botgi ni lubanga mogogu ma pe ocweyo polo ki loboni kibijwerogi woko. Pe dong gibibedo tye i kabedo mo iwi lobo ki ite polo.)

Wer me pako Lubanga

12Rwot oketo lobo ki twerone,

dok ocibo lobo ocung matek pi ryekone,

ki pi niang matut ma en tye kwede omiyo oyaro polo woko.

13Ikare ma dwone omor,

pii otwage matek ki i polo,

omiyo lupuu duny kun a ki i agiki lobo.

En miyo lutkot wil ka kot cwer,

dok bene miyo yamo kodo kun a ki iot kano jamine.

14Ka dano guneno magi ducu ci gidoko luming dok bene wigi oding cut;

lewic omako lutet jabu pi cal jogigi ma gutiyo;

pien cal joginegu ducu pe gubedo lubanga ma ada,

dok bene pe gitye ki kit kwo mo i igi.

15Konygi peke, kitiyogi mere me acaya keken;

ikare ma Rwot bibino kaketo can ikomgi kibibalogi ci gitum woko.

16Ento Lubanga pa Yakobo pe obedo calo cal jogi magi;

pien en aye ma oketo jami ducu,

dok bene en oyero jo Icrael wek gubed jone kikome,

nyinge kilwongo ni Rwot me mony.

Kibitero dano i opii

17Wun jo Jerucalem, ma mony dong orumuwu wokoni, wuting yecwu woko ki i ngom. 18An Rwot awaco kuman ni, “Nen, kombedi dong abibayowu woko ki i lobo man calo lalingling; dok abimiyo kibinginyowu woko ma bene obibedo ki lwak arem madwong wang ma wuwinyo lite.”

19Jo me Jerucalem gikok ni,

“Kiketo ret woko ikomwa marac kuman!

Wang burwa tye marac mada ma pe bicang,

Yam watamoni man en aye gin ma onongo watwero ciro, kara pe!

20Kemawa dong kibalo woko,

ki tol ducu ma onongo kitweyo kwede dong kicodo woko;

lutinowa dong guwekowa woko,

gin ducu dong gipe.

Ngat mo pe ma odong ma myero ogur kemawa odoco kakare;

pe tye ngat mo ma myero otwe bongo kicikawa malo.”

21Ci an Jeremia agamo ni,

“Lutela dong gudoko luming woko;

pe gipenyo Rwot wek otelgi.

Meno aye gin ma omiyo yam pe gubedo maber;

lwakgi ducu dong guket woko ata.

22Wuwiny! Wo mo tye kabino!

Twon gin ma mor tye ka kati bino ki i lobo ma yo tung kumalo,

dul monye bino me jwero taun madito me Juda woko wek odong obur,

kama too aye bedo iye.”

23Ai Rwot, angeyoni pe tye dano mo maloyo kwone kene nio i agikine;

pe tye ngat mo matye ki twero me loyo kwone.

24Ai Rwot, pwony lwaki;

ento pe iwek pwonye obed magwar tutwal.

Pe ipwonywa ki kinigani;

miyo wato watum woko ducu.

25Myero kiniga omaki ikom rok ma pe gingeyi,

ki ikom lurok ma pe giworo in.

Dong gin gutyeko likwayo pa Yakobo woko liweng;

dok bene gubalo lobowa woko odong obur.