Jeremia 11

Jeremia ki gicike pa Lubanga

1Rwot oloko ki Jeremia kun waco ni, 2“Winy lok ma mako gicike man. Tit bot jo Juda ki jo ma gibedo i Jerucalem ni 3an a Rwot Lubanga pa Icrael, dong atyeko ceno dano ma pe winyo dok ma pe lubu lok ma mako gicike man. 4En gicike mayam aketo ki kwariwu ikare ma akwanyogi woko ki i lobo Ejipt, en lobo ma obedo calo rukmac ikomgi. Ikare meno awaco botgi ni guwiny loka dok gutii gin ducu mayam acikogi ni gutii. Atito botgi ni ka gulubu ci gibibedo jona ki an bene abibedo Lubangagi. 5Kun an bene abicobo kwong ma akwongo inyim kwarigi ni abimiyo botgi lobo man maber ma ceko cam mabup, kit macalo gitye iye wa onyo.”

Ci an Jeremia agamo ni, “Wek obed kumeno, Rwot.”

6Rwot dok owaco bota ni, “Tit lok magi ducu i taun madito me Juda, ki i dye yoo me Jerucalem. Tit loka kunu, kun iwaco bot lwak ni guwiny lok ma mako gicike man dok bene gulub kun gitiyo. 7Ikare ma akwanyo kwariwu woko ki i lobo Ejipt, acikogi matek, kun bene abedo ka cikogi teretere, nio wa onyo, kun awaco botgi ni gulub loka. 8Ento gin pe gulubu dok pe guciko itgi me winyo loka. Ma ka timo meno, gin ducu gumede ameda ki bedo jo ma tokgi tek marac. Ma omiyo acobo lok me gicike man woko ducu ikomgi, mayam acikogi ni gutii, ento pe gutiyoni.”

9Rwot dok owaco bota ni, “Jo Juda kacel ki jo ma gibedo i Jerucalem gitye kajemo woko ikoma. 10Guloke gudok cen katimo bal pa kwarigi ma gukwero winyo loka wokoni; gubedo kalubu lubanga mukene kun giworogi bene. Jo me ot pa Icrael ki jo me ot pa Juda dong guturu gicikena woko mayam acike kwede ki kwarigini. 11Pimeno an Rwot awaco kuman ni atye kakelo gin marac wek aket ikomgi ma pe gitwero loyo ki iye wa ki acel. Ka gibikok bota pi kony, an pe abiwinyo kokogi. 12Ci jo Juda kacel ki jo ma bedo i Jerucalem gibicito gibikok bot lubanga mayam gubedo ka wango gitum botgini, ento lubanga magi pe bitwero larogi ikare me can. 13Pien lubangagi dong gudoko pol ma guporo wel taun gi madito, gin jo Juda; ki jo ma gibedo i Jerucalem bene dong guyubu lwak keno tyer mapol ata kama giwango iye gitum me lewic bot jok Baal, marom ki wel yoo matye i dye taun gi me Jerucalem.

14Pimeno Jeremia, pe ibed ka lega, pe bene ipid kweda pi lwak man. Ka inen ce gitye i can ka gukok bota pi kony, an pe abiwinyo kokogi. 15Jona ma amaroni gitye katimo tim kipyeda. Dong gitye ki kit twero ango ma weko gibedo i oda? Gitamoni tyero lee me gitum ki kwongo kwong mogo ma gicike kwede atata twero gengo can woko me poto ikomgi? Gitamo ni gitwero bwot i yo ma kit man? 16Yam alwongogi ni yat jeituni ma pote oluk madwong, ma nyige bene nen mwonya adada; ento abiwango pote woko ki mac ma yamone mor mager, dok abituru jange woko ducu.

17An Rwot me mony mayam apito jo Icrael ki jo Juda, macalo yat jeitunini, kombedi dong awaco ni abiketo gin marac ikomgi. Gin gukelo gigi can man ikomgi pirgi ken gi pien gutimo gin marac. Gungeto cwinya omiyo kiniga omaka ikomgi pi wango gitum bot jok Baal.”

Kipiro lok pi neko Jeremia

18Rwot omiyo angeyo dok aniang lok ma lukwora gupiro, ki gin marac ma onongo gimito timo ikoma. 19Ento an onongo abedo calo latin romo mamwol ma kitero woko kanekone, onongo pe angeyoni gupiro lok me timo gin marac ikoma. Gubedo kawaco ni, “Watong wunu yat man waret woko piny wa ki nyige ducu; waneke woko wek ngat mo pe dong opo ikome matwal i loboni.” 20Lacen an Jeremia alego ni, “Ai Rwot me mony, in langolkop ma ngolo kop atir, dok itemo tam pa dano ki gin ma giparo ki i cwinygi. Wek anen ka iculu kwor ikom lwak man, pien an dong atyeko keto loka woko ducu i cingi.”

21Pimeno Rwot owaco kuman, ikom jo Anatot, ma onongo gimito neko an woko kun giwaca ni kace amede ki tito lok inying Rwot ci gibineka woko. 22Rwot me mony owaco lok ikomgi ni, “Nen, abiketo can ikomgi. Awobegi ducu kibinekogi woko i lweny ki pala lucwan; lutinogi ducu bito woko ki kec. 23Ngat mo ma bidong bibedo peke ka kare oromo, en kare ma dong amoko me keto iye can ikom jo Anatot.”