Jeremia 12

Lapeny ma Jeremia openyo ki Rwot

1Ai Rwot, ka apido kwedi,

ci anongoni in giri loki tye atir.

Ento myero olo twal apenyi ikom lok ma mako ngolo kop atir.

Pingo jo maracu gibedo maber dok gilony?

Pingo lutim aranyi kono gicobo tiyo gin ma cwinygi mito?

2In iye gin gibedo maber

macalo yat ma kipitogi,

ci giroyo lwitgi donyo i ngom gidongo dok ginyako nyiggi bene.

Kare ducu gin giloko lok maber ikomi ki dogi keken,

ento ki i cwinygi nongo gitye kamabor ma pe giparo piri.

3Ento in Rwot, ingeya,

dok in ineno gin ma atiyo,

dok itemo tama pi neno kit ma amari kwede.

Ywa jo maracuni woko ki tek

macalo romi me aneka.

Kogi woko iketgi pat nio ka nino me nekogi oromo.

4Rwot, lobowa mono bibedo ma otwo pi kare marom mene?

dok lum ducu ma i tim bibedo ma oner pi kare marom mene?

Lee ki winyo gitye ka to woko bene,

pi tim maracu pa jo ma gibedo i lobo man.

Magi ducu tye katime pien dano gitye ka waco ni,

“Rwot pe neno kit ma watye kabedo kwede.”

5Ci Rwot owaca ni,

“Jeremia, kace iol woko ki ngwec ma kun ipyem ki dano,

ci ibingwec i pyem ki aguragura ningning?

Kace iyoke i poto piny ki kamaleng,

ci dong ibikwo ningning ka itye i tim ikin yadi mukade i dog kulu Jordan?

6Kadi wa omegini, ma gin jo me ot pa woru kikome,

gin bene gutimo tim aranyi ikomi,

gin guribe ka lweny ikomi bene.

Pe igen gi, kadi bed giloko lok maber me larem boti.”

Cwiny Rwot ocwe pi jone

7Rwot waca ni,

“An dong aweko jona woko,

dong akwero rok mayam ayerogini woko;

dong atyeko miyo jona ma amaroni woko i cing lukworgi.

8Jona ma ayerogini dong guloko an adoko lakworgi;

gumor ikoma ki koko matek calo labwor matye i bunga,

pimeno omiyo dong adaggi.

9Jona ma ayerogini dong gudoko calo winyo ma okwateng orumugi woko me aneka.

Wulwong lee tim;

wek gubin guribe kacam kacel.

10Luker pa lurok dong gutyeko balo poto oloka woko,

gunyono dul lobo ma kipoka woko piny ki tyen gi,

guloko dul lobona ma yomo cwinyani

odoko tim ma iye odong nono.

11Gumiyo dong odoko tim ma konye peke;

odoko tim ma iye odong nono inyima.

Lobone ducu dong kibalo woko odong nono,

ento ngat mo ma paro pire peke.

12Jo ma luyak madong gubino ka yakowa gupongo wi cere ducu matye i tim aroo.

Dong an Rwot atyeko cwalo lweny me tyeko lobowu woko ducu;

ngat mo pe ma bitwero bedo ki kuc.

13Jona yam gucoyo ngano, ento gukayo okutu,

gubedo katiyo tic matek guolo komgi woko,

ento pe gulimo iye gin mo.

Lewic bimakogi pien gin ma gucoyo ducu pe ocek

pi kinigana magwar.”

Cike pa Rwot pi jo ma gibedo kanget jo Icrael

14Rwot owaco kuman ni, “Atye ki lok mo ma myero awac bot jo ma gibedo kanget jo Icrael ma dong gubalo lobo ma amiyo bot jona jo Icrael woko. Nen, abikwanyo rok man woko ki i lobogi, dok bene abilaro jo Juda akwanyogi ki ikin gi. 15Ento ka dong akwanyogi woko, ci kica bimaka ikomgi. Abikelo rok acel acel adwoko cen i lobone dok i kabedone kikome. 16Dok ka kare biromo ma rok magi gibipwonyo kit niye me dini pa jona ki cwinygi ducu, dok kun gibikwongo ki nyinga ni, ‘Macalo Rwot tye makwoni,’ kit macalo yam gupwonyo jona me kwong ki nying jok Baal, ci miyo gin ducu dong gibirube gibidoko dano acel ki jona ci gibibedo maber. 17Ento kace tye rok mo pe biwinyo loka, ci abiputugi woko ki lwite ducu ci abalo woko licwic, man an Rwot ma awaco.”