Jeremia 13

Carolok ikom latebongo ma kiruku i pyer

1Rwot owaca kuman ni, “Cit iwil bongo camanini me aruka i pyer, ci itwe i pyeri, ento pe ilut i pii.” 2Ci acito awilo bongo me pyer kun alubu lok ma Rwot otitani, ci aruku i pyera. 3Rwot dok owaco bota tyen me aryone ni, 4“Kwany bongo me pyer ma nene iwilo ci iruku i pyerini, ci ia icit i dog kulu Euprate, ci icit ikan woko kunu ikin got ma obar.” 5Ci aa acito akano woko inget kulu Euprate kit macalo Rwot ocika kwede. 6Inge nino mapol Rwot dok owaco bota ni, “A malo icit i kulu Euprate ci ikwany bongo ca me aruka mayam aciki ni icit ikan kununi.” 7Cutcut aa acito i kulu Euprate ci akwinyo ngom, ci akwanyo bongo aruka me pyer ki i kabedo kama yam onongo akano iyeni. Ci nen, anongo ni bongo ca dong obale woko, pe dok ber pi gin mo.

8Ka lacen Rwot dok pud oloko bota aye kun waca ni, 9“Man aye kit ma abityeko kwede wake pa Juda ki wake madit ma Jerucalem tye kwede. 10Lwak magi marac ma gukwero winyo loka wokoni, ma gumiyo ngutgi obedo nwang kun gilubu gigi gin ma cwinygi mito, ma gubedo ki lubanga mukene kun giworogi, gibibedo calo bongo pyer man ma pe dong ber me aruka. 11Kit macalo bongo me atweya i pyer moko kwede ikom dano, kitmeno bene aketo jo me ot pa Icrael ki jo me ot pa Juda aridogi woko ikoma matek liking, wek gubed lwak ma gibikelo nying maber bota, ma bene gibimiyo dano gipaka dok gimiya deyo, ento gin onongo pe gitwero winyo loka wa ki acel. Man an Rwot ma awaco.”

Agulu kongo bwino

12Rwot owaco bota kuman ni, “Jeremia, in itit lok man bot jo Icrael ni agulu acel acel bipong woko ki kongo bwino. Ci gin bigamo ni, ‘Itamoni wan pe wangeyo ni agulu acel acel myero kipong iye woko ki kongo bwino.’ 13Ci lacen in ibiwaco botgi ni Rwot bimiyo jo ducu ma gibedo i lobo man gibimato kongo bwino ci gidoko lumero: luker ma gibedo iwi komker pa Daudi, ajwaki, lunebi kacel ki jo ducu ma gibedo i Jerucalem. 14Abicanyo ngat man ki lawote, wego ki lutinogi kacel, man an Rwot ma awaco. Pe abiparo pirgi, pe abiweko gibedo kwo, kadi wa kica bene pe bimaka ikomgi, wek atyekogi woko.”

Jeremia ociko jo Juda pi wake

15Wun jo Icrael, wuter itwu wuwiny;

pe myero wubed ki wake,

pien Rwot dong otyeko lok.

16Wumii deyo bot Rwot Lubangawu

ma pud peya okelo colpiny,

dok ma peya wucako cato iwi godi ikare ma piny ribiribi;

ma pud peya nongo oloke odoko mutu macol licuc.

En lengpiny ma nongo wutye ka genoneni.

17Kace pe wubiwinyo,

ci abikok lalingling i mung pi wakewu:

abikok matek nongo pig wanga mol cito piny lipya,

pien jo pa Rwot dong kiterogi woko macalo opii.

18Rwot owaco bot Jeremia ni, “Tit bot rwot gin ki mine ni gua woko ki i komkergi gubin i kabedo mapiny, pien lalukanagi maber tutwali dong opoto woko piny ki iwigi. 19Taun gi me Negeb ducu dong kimonyo kirumugi woko dyere, pe tye ngat mo matwero kato ki kunu. Jo Juda ducu dong kiterogi woko i lobo ma pe meggi, gin ducu dong kiterogi woko i opii.”

20“Wun jo Jerucalem wunen! Lukworwu tye kabino kun gia ki i lobo ma yo tung kumalo! Ka man bitime, ci gin ango ma bitime ikom jowu ma gibeco calo lwak romi ki dyegi ma onongo kimiyogi i cingwu ni wugwokgini? 21Ibiwaco gin ango ka jo mayam in kikomi aye ipwonyogi ni wek gubed luremi, aye kiketogi me loyi? Arem matek pe biketo komi woko, calo arem pa dako matye ka nywal? 22Dong kace ipenye ni, ‘Pingo gin ma kit man obino ikoma, ma omiyo bongo ma i pyera bene kiyeco woko, ka dok ginywara kwedegu?’” Man otime pien onongo bali dong rac ma okato kare. 23Laetiopia mo tika twero loko rangi me del kome, nyo kwac bene twero loko rangi ma ikomeni ma okwicokwiconi woko? Ka onongo tye kitmeno, kono onongo wun jo ma wungiyo ki timo gin marac kekeni dong wupwonye me tiyo gin matye atir. 24Rwot bikeyowu woko calo cuci ma yamo kolo ki i tim aroo ci bayo woko cen. 25Man aye gin ma kibipoko ki wun, dul ma dong kityeko pimone woko pirwu, man aye gin ma Rwot dong otyeko yubu, pien wiwu dong otyeko wil woko ikome kun wubedo ka woro lubanga mukene ki geno lok goba keken. 26Rwot kikome aye ma biwalo bongiwu woko ki i pyerwu ci umu ki wangwu, miyo munerowu nen woko kamaleng. 27En dong otyeko neno gin me kwer ma wutimo, tim me abor ki tim me woro lubanga mukenegu, ma wubedo katimone iwi cere i dye tim. Can iwiwu, wun jo Jerucalem! Wubilonye wudoko leng awene ka?