Jeremia 14

Two pa pii ki i lobo pi kare malac

1Rwot owaco bot Jeremia pi two pa pii ni,

2“Jo Juda gitye ka kumu

taune madito ducu bene tye kabale woko.

Jo ducu ma iye gubutu piny i ngom ki twon cwercwiny mo ma pe wace;

jo ma i Jerucalem gitye ka kok matek adada kun gikwayo kony.

3Luditogi me awora gicwalo luticgi ka twomo pii;

gicito iwang piigi, ento pe ginongo, pien wang pii ducu gutwo woko,

gidwogo ki gin latwom piigi ma nongo iye nono.

Lewic makogi dok bene alee twodogi matek

omiyo giumu wigi woko auma.

4Pien lobo dong obale woko,

kit macalo kot dong pe obedo ka cwer i loboni,

lewic omako lupur mada ma nongo cwinygi cwer ma giumu wigi auma.

5Kadi wa megi til matye i tim bene gibwoto lutinogi ma gunywalo woko

pien lum mo ma myero gucam peke.

6Kana me timgu gicung iwi cere ma otwo ligwek,

kun gingamo doggi malac me yweyo calo too;

wanggi olwal woko

pien lum mo ma omyero gucam bene peke.

7Jona gikok bota ni,

‘Kadi bed balwa dotowa,

ai Rwot konywa kit macalo yam iciko.

Wabedo ka loke wabwoti woko tyen mapol;

watyeko bene timo balgu ikomi.

8In keken aye ngat ma jo Icrael gigeno,

in aye ma ilarowa ikare ma nongo watye i can.

Pingo ibedo macalo larok i lobowa,

dok macalo lawot ma yenyo kabutu?

9Pingo ibedo macalo dano ma wiye onyobe woko ma pe ngeyo gin ma myero etim,

calo ngat mo ma en oteka ma pe twero laro dano ki i mony?

Ento adada in Rwot itye kwedwa,

dok wan bene kilwongowa ki nyingi;

pimeno pe ibwotwa woko.’”

10Rwot owaco kuman ikom jone ni, “Yam wun wumaro wot atata kitmeno, ma pe wujuku tyenwu ma wutenya woko kun wulak wucito ka woro cal mogo ata gu; pimeno omiyo pe dong abijolowu. Kombedi dong abipo ikom balwu ci abiketo can ikomwu pi balwu.”

11Rwot owaco bota ni, “Pe myero ilega ni an akony lwak man. 12Kadi bed girii kec, pe abiwinyo koko ma gikok kwede bota pi kony, dok kadi bed gutyer gitum awanga ki gityer me moko kwon, pe abigamogi; ento abinekogi atyekogi woko liweng ki pala lucwan, ki kec malit ma poto i lobo, wa ki two gemogu.”

13Ci awaco ni, “Ai Rwot Lubanga, nen lunebi onongo dong gutyeko tito bot lwak man woko ni, ‘Pe kibinekowu ki pala lucwan, dok bene kec mo pe bipoto i lobowu, ento Rwot bimiyo botwu kuc me ada mabedo nakanaka i kabedo man.’”

14Ento Rwot odoka iye kun waca ni, “Lunebi gitye katito lok goba keken ki nyinga; an pe acwalogi, pe acikogi, dok bene pe aloko kwedgi. Gitye katito botwu ginanyuta me goba ki tyeto tyet ma konye peke, kun gibwolo dano abwola ki tam ma gutamo pirgi ken gi. 15Pimeno an Rwot awaco lok ikom lunebi ma gitito lok inyinga kadi bed an aye pe acwalogi, ma giwaco ni, ‘Mony mo peke ki kec madit bene pe bibino ikom lobo man wa ki acel.’ Ento an awaco ni lunebi magi kibinekogi woko ki pala lucwan kacel ki kec bene. 16Jo ma gin gubedo katito lok botgi bene kibibologi woko i dye yoo me Jerucalem, ma nongo kinekogi ki pala lucwan kacel ki kec, pien ngat mo pe ma biyikogi. Man bitime ikomgi ducu, ikom mon gi, lutino awobegi, ki anyiragi, pien abimiyo gineno can pi timgi maracuni.”

17Ci Rwot ocika ni atit cwercwiny ma mera bot dano kun awaco botgi ni,

“Wek pig wanga omol oony i kora dyeceng ki dyewor benebene;

wek pig wanga pe ocok woko,

pien jona kityeko goyogi woko ki twon bur madit adada,

ma kiketo ret woko ikomgi marac atika.

18Ka acito woko i tim,

ci anongo jo ma kinekogi ki pala lucwan dwong ata!

Dok ka adonyo i taun madit,

ci aneno lwak dano mapatpat ma kec obwoyogi matek!

Pien lunebi kacel ki ajwaki giwoto kun gitiyo ticgi i lobo,

kun pe gitye ki ngec mo.”

Lwak gubako doggi bot Rwot

19Rwot, in dong mono i kwero Juda woko matwal ce?

Cwinyi bene dong ocido woko ikom Cion bo?

Pingo dong i pwodowa kuman ma pe dong waromo cang?

Wabedo kayenyo kuc,

ento gin mo maber ma wanongo peke;

ikare ma myero wacang iye wanongo gin makelo lworo keken.

20Ai Rwot, wan dong wangeyo gin maracu ma wabedo katimone,

kadi wa bal pa kwariwa ducu bene wangeyo,

pien ada, wan wabalo ikomi.

21Pi dit me nyingi, ai Rwot,

pe iwek cwinyi ocid woko ikomwa;

dok bene pe ikel lewic ikom Jerucalem ma en aye taun madit ma komkeri me deyoni tye iye.

Po pirwa, pe i tur gicikeni woko kwedwa.

22Tika tye kit lubanga mo ikin lubanga me gobagoba me rok ducu matwero miyo kot cwer?

Nyo polo kono twero miyo kot mo ngido i lobo?

Pe in aye ma itiyo magi ducu, ai Rwot Lubangawa?

Wan ducu wageno in,

pien in aye ma itiyo jami magi ducu.