Jeremia 15

Can ma Rwot biketo ikom Juda

11

Lacen Rwot owaca ni, “Kadi bed Moses ki Camuel onongo kono kong gucung inyima kun gibako doggi ka gilega, kono onongo kica mo pe omaka ikom lwak man wa ki acel. Wek jo Juda gua woko ki inyima gucit cen! 22Kace inen gupenyo ka kwene ma myero gucit iye, ci wuwac botgi ni an Rwot awaco botgi ni,

‘Jo ma omyero guto ki two gemo gibito ki two gemo, meno en aye ka ma gibicito iye!

jo ma omyero guto i dog lweny gibito i dog lweny kun kinekogi woko ki pala lucwan, meno en aye ka ma gibicito iye!

jo ma omyero kec aye onekgi kec en aye binekogi! meno en aye ka ma gibicito iye!

Ki jo ma kibimakogi kibiterogi woko macalo opii,

meno en aye kama gibicito iye!’

3An Rwot, dong atyeko moko kit jami angwen maracu ma bityekogi: kibinekogi woko liweng ki pala lucwan, gwogi biywayo komgi mutoni bedo me acamagi, winyo bene gibicamo komgi; ki lee mager me tim dong gibimwodogi gityekogi woko liweng. 43Dok abimiyo gibedo gin ma miyo ker me lobo ducu gibedo ki lworo, pi gin ma Manace wod pa Kejekia rwot me Juda yam otimo i Jerucalem.”

5Rwot waco kuman ni,

“Anga ma kica bimako ikomwu, wun jo Jerucalem?

Nyo anga kono ma bikumu pirwu?

Anga ma kong biloke cung pi kare malac me penyo kit macalo wun wutye kwede?

6Wun dong wutyeko kwera woko,

wumede wubedo kaloko ngewu ikoma kare ducu.

Pimeno aye ma omiyo aryeyo cinga me pwod ikomwu

ci anekowu atyekowu woko;

dong aol woko ki timo kica botwu.

7I gangi ducu ma i lobowu,

abedo ka ketowu woko ata macalo dano kworo kal i laro.

Anekowu atyekowu woko, wun jona,

pien pe wumedo ki loke me weko

timo timwu maracuni.

8Anyayo wel mon togi dong odoko dwong

makato kweyo me dog nam woko.

Aneko awobewu woko ma komgi pud tek,

dok amiyo megigi gubedo ki can ki arem malit adada.

Amiyo bene remcwiny ki lworo madwong

opoto ikomgi oyotoyot labongo gale.

9Dako ma onongo onywalo lutinone abiro kulu cwinye odem woko;

otemo yweyo ci pe romo ywe kadi matidi mo.

Dyeceng ma en tye iye oloke odoko colpiny;

obedo ki lewic ma nongo cwinye opong woko ki can.

Dong jo mukene ma gudong,

abimiyo lukworgi nekogi woko ki pala lucwan,

man an Rwot ma awaco.”

Jeremia obedo kanguru bot Rwot

10Can iwiya! Pingo maa onywala? Oweko ada dok apyemo ki jo ducu ma i lobo. An ceng pe amiyo lim den bot ngat mo kun amito iye magoba mo nyo aburu kwone ni abitime marac kace pe ocula, dok bene pe adeno lim ki bot ngat mo ci akwero culune woko; ento inongo ni dano acel acel tye kaloko lok me cena woko acena. 11Ai Rwot, mii lok ma giloko kun gicena kwedeni obed kumeno kace nene pe atiyo gin matye atir inyimi, dok kace nene pe abako doga boti, pi kwo pa lukwora ikare ma onongo gitye i can dok ki cwercwiny mukato kare. 12(Pe tye dano mo matwero turu nyonyo, tutwale nyonyo ma kiribo ki mola ma a ki yo tung kumalo.)

13Rwot owaca ni, “Lonyowu kacel ki limwu mayam wukano abimiyo lukworwu yako woko. Man bibedo pwod botwu pi balwu ducu ma dong wutyeko timo ma oromo i lobowuni woko liweng. 14Abimiyo wubedo opii pa lumerokwu kun wutiyo tic botgi i lobo ma pe wungeyo, pien kinigana dong bilyel calo mac ma wang nakanaka.”

15Ci awaco ni, “Ai Rwot, in i niang dok ingeyo gin matye katime ikoma. Po pira dok ikonya, dok bene myero icul kwor ikom jo ma mito neka wokoni. Pe myero idii cwinyi ikom jo ma gimito neka woko; myero inge bene ni piri omiyo atye ka ciro lok me cac matek. 16Ka yam i loko kweda, ci ajolo ki cwinya ducu, loki oloke odoko gin me yomcwiny bota, dok obedo gin ma yomo cwinya adada; pien an dong kilwonga ki nyingi, ai Rwot Lubanga me mony. 17Yam pe abedo kacel ki jo ma gin nyero ata pi nongo yomcwiny me loboni, an kikoma gira cwinya pe obedo yom wa ki acel. Abedo gira kena, pien an atye i te tweroni, pien kinigani onongo oketo koma woko. 18Pingo mono arema pe gik? Pingo bura bene dong odoko gin ma pe cang? In imito iloke i bed bota calo kulu ma bwolo dano abwola, calo pii ma two wokoni?”

19Pimeno Rwot owaco kuman ni, “Ka i loke i dwogo bota, ci abigami doki, ci ibibedo latica pi kare ducu. Kace ibedo kaloko lok maber ma konye tye, ma pe i loko gin mo ma konye pe, ci abiloko in dong ibedo ma ka doga. Dano gibiloke gidwogo boti, ento in pe i biloke i dok botgi. 20Dong abiketo in ibedo bot lwak man macalo cel gogo me mola ma kirumu maber; gin jonu gibilweny ikomi, ento pe gibiloyo in ki lweny, pien an atye kwedi abigwoki dok abilari, man an Rwot ma awaco. 21Abilari woko ki i cing jo maracu, dok abigwoki woko ki i cing jo ma pe tye ki kica.”