Jeremia 16

Miti pa Rwot pi kwo pa Jeremia

1Rwot dok oloko bota kun waco kuman ni, 2“In pe ibinyomo dako mo, dok pe bene ibinywalo lutino awobe nyo anyira i kabedo man. 3Pien an Rwot awaco kuman ikom awobe ki anyira ma kinywalogi i kabedo man, ki ikom mege ki wege ma i kabedo man. 4Two maracu atika binekogi woko, dok pe kibikok pirgi, dok bene pe kibiyikogi, ento gibibedo macalo cet dyang ma guket ata i ngom. Kibinekogi woko ki pala lucwan, ki kec bene binekogi woko, dong komgi mutoni bidoko cam pa winyo ki lee me tim.”

5Rwot dok owaco kuman ni, “Pe myero idony i ot kama dano tye iye ka kumu, pe myero icit ka koko nyo ka kumu pirgi; pien dong atyeko kwanyo kuca woko ki bot lwak man, kadi wa mar mera ma pe loke ki kicana bene man an Rwot ma awaco. 6Jo mulony kacel ki lucan gibito i lobo man, ento ngat mo pe ma biyikogi nyo ma bikok pirgi. Ngat mo bene pe bigwero kome kekene kun lyelo yer wiye woko pi nyutu can matye i cwinye. 7Pe tye ngat mo ma binywako cam kacel ki dano matye ki kumu, wek okwe cwinye pi dano ma oto ca. Dano mo bene pe bimiyo ginamata mo ma nyutu cwiny me kica bot ngat ma wone nyo mine oto. 8Pe myero i dony i ot kama dano tye kacamo iye karama. Pe ibedo kwedgi kunu kacam ki kamat. 91An Rwot me mony ma an Lubanga me Icrael awaco kuman ni: i kabedo man en aye abijuku iye wo me yomcwiny woko matwal ki i wangwu ma wun bene wuneno, ki ikarewu, dwon me oree ki me yomcwiny, dwon lanyom kacel ki dwon nyako ger.

10Ka dong itito lok magi ki lwak man, ce gupenyi ni, ‘Pingo Rwot kono otimo gin marac macalo man ikomwa? Wabalo ango? Kit bal ango ma wan watimo ikom Rwot Lubangawa?’ 11Ci in i bitito botgi ni, ‘Kwariwu yam gubwota woko, man lok ma Rwot owaco, dok gubedo kalubu lubanga mogo mukene, gutiyo botgi, gubedo kaworogi bene. Gubwota woko dok bene pe gugwoko cika. 12Ento wun aye dong wutiyo gin marac atika makato gin mayam kwariwu gutimo. Wun ducu wubedo jo ma ngutwu nwang ki ma kitwu rac, wukwero winyo loka woko. 13Pimeno abikwanyowu woko ki i lobo man ci abibolowu woko i lobo mukene mayam wun nyo kadi kwariwu pe gungeyo. Dong ka wutye kunu en aye wubibedo ka woro lubanga mukenegu dyeceng ki dyewor benebene, pe dong abinyutu botwu kicana wa ki acel.’”

Dwogo cen ki i opii

14Rwot owaco kuman ni, “Wunen, kare tye kabino, ma pe dok ngat mo bimoko loke kun kwonge ni, ‘Macalo Rwot ma en aye okwanyo wan jo Icrael woko ki i lobo Ejipt tye makwoni.’ 15Ento wubikwonge kun wuwaco ni, ‘Macalo Rwot tye kwoni, ma okelo jo Icrael woko ki i lobo ma yo tung kumaloni, dok ki i lobo ducu kama yam en oryemogi ci gucito iyeni.’ Pien abikwanyogi adwokogi cen i lobogi kikome mayam amiyo bot kwarigi.”

Pwod matye kabino

16Rwot owaco kuman ni, “Nen, atye kacwalo dano mapol, ma gibimakogi macalo gimako rec; lacen dok abicwalo jo ma gin ludwar mapol, ma gibidwarogi ki iwi godigu ducu kadi ki iwi ceregu, kadi wa ki ikin got ma obar. 17Pien aciko wanga atye kaneno kitgi ducu; gin pe gukane ki bota wa ki acel, dok balgi mo bene matye macalo mung ma kikano woko ki tung bota pe tye. 18Abimiyo giculu wang balgi ma gutimoni tyen kiryo, pien gupyedo lobona woko ki cal jogigi marom ki kom jo ma otogu, dong gupongo gipinya ki timo gin me kwer keken.”

Jeremia olego Rwot ki gen

19Ai Rwot, in aye i tek mera dok in aye cel gogo magwoka,

kama aringo alaro iye ikare me can.

Rok ducu gibia gibino boti,

kun gia ki i kabedo ducu ma iwi lobo, ci gibiwaco ni,

“Kwariwa yam gubedo ka woro gin ma tere peke, lubanga me goba keken,

gubedo ka woro jogi ma konygi peke ma pe twero larogi.

20Dano twero tiyo lwak lubangane pire kene?

Pe, pien gin ma dano gutiyo ki cinggi pe twero bedo lubanga wa ki acel.”

21Rwot waco kuman ni, “Pimeno, abimiyo rok ducu gingeyo twerona ki tekona kicel keken, ci dong gibingeyo ni an nyinga Rwot.”