Jeremia 17

Bal pa jo Juda ki pwod ma kiketo ikomgi

1Rwot owaco ni, “Wun jo Juda, balwu dong omoto woko ikomwu calo kicoyogi woko i cwinywu ki kidi dayaman ma lake bit, ki dok bene kicoyo kigoro ki kalam nyonyo ikom ten keno angwen matye ikom keno tyerwu. 2En ma omiyo jowu po ikom keno tyerwu ki ikom cal Acera ma jok ma dako ma wucibo inget yadi ducu ma potgi oluk, ki iwi cere mabocogu, 3ki iwi godi ducu matye i dye tim. Lonyowu kacel ki limwu mayam wukano abimiyo kiyako woko, pi balwu ducu ma dong wutyeko timo ma oromo i lobowuni woko liweng. 4Lobo maber mayam amiyowu dong kibimayo woko ki botwu, abimiyo wubedo opii pa lumerokwu kun wutiyo tic botgi i lobo ma pe wungeyo, pien kinigana dong olyel woko calo mac, ma dong bibedo ka wang nakanaka.”

Lok mogo mapatpat

5Rwot owaco kuman ni,

“Abiceno ngat ma keto gene ikom dano,

ngat ma loko cwinye woko ki ikoma,

ma keto gene ikom keru pa dano.

6En bedo calo yat ma i dye tim aroo,

ma pe bineno gin mo maber kabino.

En bibedo mere i kabedo ma otwo ma obedo kadokado

ma gin mo pe dongo iye,

i kabedo kama dano pe bedo iye.

7Ento dano ma keto gene ikoma tye ki gum,

ma gene ducu ocung ikoma. 81

En bedo calo yat ma kipito inget kulu,

ma cwalo lwite donyo woko piny wa i laora kulu.

Ka ikare me lyeto ma piny otwo en pe lworo gin mo,

pien pote bedo madyak kumeno;

dok bene i mwaka ma ceng ryeny teretere ma pii pe en pe paro gin mo,

dok pe giko nyako nyige.

9Cwiny dano en aye gin ma bwolo dano makato gin mukenegu ducu,

opong ki gin marac adada; anga matwero niang iye? 102

An Rwot angiyo tam pa dano dok bene atemo cwiny dano,

atiyo ki dano acel acel ma lubu kit kwone,

dok ma lubu kit gin ma en otiyo.”

11Macalo ayweri ma coko lutino ite

bwome ma en kikome pe otoko,

ngat ma nongo lonyo i yo ma pe atir bene tye kitmeno;

ka dong otegi inongo ni lonyone rwenyo woko,

i agikine en gire doko laming.

12Kabedowa maleng,

me woro Lubanga

obedo komker me deyo adada,

ma ocung malo iwi got nia i acakine.

13Ai Rwot, gen pa jo Icrael ducu tye ikomi,

jo ducu ma gibwoto in woko lewic bimakogi matek;

jo ma giloke giweki woko kibirwenyogi woko calo nying ma kicoyo i apwa,

pien gin dong gutyeko bwoto Rwot woko,

ma en aye wang it me pii me kwo.

Jeremia okok bot Rwot pi kony

14Canga, ai Rwot, ci abicang woko maber;

lara, ci bene abilare;

pien an apako in kare ducu.

15Nen, kitiko waco bota ni,

“Lok pa Rwot ma iwaconi bipoto ikomwani tye kwene ka?

Wek loke obin!”

16Ai Rwot, in iketo an me bedo lakwat pa joni,

dok pe abwoto tic ma in imiya.

An pe adiyo in ni myero icwal gin marac,

dok bene pe amito nino me can amita, meno in ingeyo;

gin ma oa ki idoga ducu ma aloko, aloko atyer ka wangi.

17Pe ibed gin makelo lworo bota;

in i kalarena ikare ma nongo piny rac.

18Wek lewic omak jo ma giketo ayela ikoma,

ento pe iwek lewic omaka; wek cwinygi aye obale woko,

ento in pe iwek mere cwinya obale;

mii kare ma gin marac myero opot kwede ikomgi;

tyekgi woko liweng!

Kwero nino me Cabit

19Rwot owaco bota kuman ni, “Cit icung i dogcel pa Benjamin, en aye kama luker me Juda gidonyo kwede i taun madit dok bene yoo ma gikato kwede woko; cit bene i dogcel ducu me Jerucalem. 20Ci iwac botgi ni, ‘Wuwiny lok pa Rwot, wun luker me Juda, ki wun jo Juda ducu ma bedo i Jerucalem, ma wudonyo ki i dogcel magi. 213Wac botgi ni, ka gimaro kwo myero pe guting ter i ceng Cabit; dok pe myero guting ter mo kun giwok ki i dogcel ducu me Jerucalem. 224Dok bene pe myero guting ter ki i odigi i ceng Cabit, dok pe gutii tic mo, ento myero gukwer nino me Cabit obed maleng kit macalo yam aciko ki kwarigi. 23Ento kwarigi yam pe guwinyo, gumiyo tokgi odoko tek, pe guciko itgi kawinyo loka, wek pe guwiny dok gugam pwony ma mera.

24Ento ka guwinyo loka, ma pe gukelo ter mo ki i dogcel ducu me taun madit man i ceng Cabit, ento kun gukwero ceng Cabit bedo nino maleng ma pe gutiyo tic mo inino meno, 25ci lukergi ki rwodigi bidonyo ki i dogcel me Jerucalem ma gibedo iwi komker pa Daudi. Gin ki rwodigi ducu kacel ki jo Juda ki jo Jerucalem, gibiringo ki gadigadi ki aguragura, dong meno bimiyo taun madit me Jerucalem bipong ki lwak dano mapol matwal. 26Dano gibia gibibino ki i taun ducu me Juda ki i gangi ducu ma orumu Jerucalem; gibibino ki i lobo pa Benjamin, ki i lobo me Cepela, ki i lobo ma obedo godigodi, dok bene gibia gibino ki i Negeb, kun gikelo gityer me gitum awanga, gityer me moko kwon, ki odok luban, dok gibikelo gityer me pwoc bene i Ot pa Rwot. 27Ento ka gin pe guwinyo loka me kwero ceng Cabit wek obed maleng, dok ka gutingo ter mo gudonyo kwede ki i dogcel me Jerucalem i ceng Cabit, ci abimiyo mac lyel i dog cele ducu ci biwango odi madongo me Jerucalem woko ducu ma mace pe dong kibiromo nekone matwal.”