Jeremia 18

Jeremia obedo i ot pa lacwe agulu

1Rwot owaca ni, 2“A malo i cit i ot pa lacwe agulu, ci abimiyo iwinyo loka ki kunu.” 3Ci aa acito i ot pa lacwe agulu, ci anongo en tye ka cweyo agulune ikom lawala. 4Ci kare ducu kace lobo agulu ma nongo lacwe agulu tye ka cweyoneni obale woko ki i cinge, ci en loko woko tiyo kwede ki gin mukene mapat kit macalo en lacwe agulu neno ni ber bote me atima.

5Ka Rwot dok owaca ni, 6“Wun jo me ot pa Icrael, pe wutamoni atye ki twero me tiyo ikomwu gin ma lacwe agulu otiyoni? Nen, wun jo Icrael bene wutye i cinga macalo lobo matye i cing lacwe agulu. 7Kace ikare mo awaco pi rok mo ni abiputu dok abiturugi woko ci abityeko woko, 8kace dong rok meno ma aloko pireni oloke oweko timo gin marac, ci abiloko tama woko pi gin marac ma onongo awaco ni abitimo ikome ca. 9Dok bene kace onongo awaco ni abipito nyo agero rok nyo ker moni, 10ce rok meno okwero winyo doga ci oloke katimo gin marac, ci abiloko tama ikom gin maber ma onongo awaco ni abitimo botgini. 11Kombedi dong itit bot jo Juda ki jo ma bedo i Jerucalem ni, ‘Rwot owaco kuman ni, Nen, atye ki yub marac pirwu dok ayube me keto can ikomwu. Wuloke wudwog cen bota, ngat acel acel owek kit marac woko, dok oyub kite kun tiyo gin matye atir.’ 12Ento gin gibigamo ni, ‘Loke pe konyo! Wabilubu yub ma wan ki komwa aye wayubu, ki ngat acel acel bene bitiyo gin ducu ma oporo rac cwinye ki tame.’”

Jo Icrael gukwero Rwot woko

13Rwot waco kuman ni,

“Kong i peny ikin lurok,

anga mayam owinyo lok mo ma cal ki man?

Jo Icrael ma amaro

dong gutimo gin marac adada.

14Itamoni pee me Lebanon

twero bedo peke iwi got me Cirion?

Itamoni kulune ma piine ngic ma mol a ki iwi godini

twero two woko liweng?

15Ento jona dong wigi otyeko wil woko ikoma;

gibedo ka wango odok eceta bot cal lubangagu;

omiyo gubedo ka yoke atata ikit me wotgi,

pe gulubu yo mayam gingeyo con,

ento dong guwoto ki i yo mogo ma pe terogi kamo.

16Guloko lobogi odoko gin mamiyo lworo bot dano,

ma bibedo gin ma kijwat pire kun kicayo nakanaka.

Jo ducu ma gibikato ki i ka ngete gibibedo ki ur madit tutwal kun giyengo wigi.

17Abikeyo jona woko inyim lukworgi,

calo apwa ma yamo ma a ki tung kunyango bayo.

Abiloko ngeya woko botgi;

pe abikonyogi ka can opoto komgi.”

Kipiro lok ikom Jeremia

18Lacen lwak guwaco ni, “Wubin wapiru lok ikom Jeremia! Kare ducu wabibedo ki ajwaki ma giromo pwonyowa, ki luryeko bene ma gibibedo kamiyo botwa tam, dok wabibedo ki lunebi ma gimede anyim ki tito lok pa Lubanga. Wubin, wek wakelu lok me pido ikome, dong bene wagiku keto cwinywa i lok ducu ma en wacogu.”

19Pimeno alego Lubanga, kun awaco ni, “Rwot, winy lok ma atye ka waconeni, ki dok bene iwiny lok ma lukwora gitye ka lokone ikoma. 20Itamoni gin marac mono aye kiculu ki ngat ma timo gin maber? Ento gin dong gutyeko kwinyo bur woko ni myero apot iye. Kong ipo kit macalo abino kwede inyimi kun apido pirgi ma aloko lok maber, wek i kwany akemoni woko ki ikomgi. 21Pimeno dong i mi kec onek lutinogi otyekgi woko; dok bene wek kinekgi woko i lweny ki pala lucwan. Wek mon gi gudong labongo lutino dok bene gudok mon to. Wek two gemo aye onek coggi otyekgi woko, ki awobegi bene myero kinekgi woko i mony ki pala lucwan. 22Cwal dul mony atura me yako gangigi woko, wek guwoo ki koko makelo lworo. Dong gutyeko kwinyo bur woko wek a pot iye, dok guciko owic woko wek amok iye. 23Ento in, ai Rwot, ingeyo kit macalo gipiro kwede lok ikoma wek gineka woko. Pe itimgi kica pi gin marac ma gitimo, pe bene i jwa balgi woko matwal ki inyimi. Wek kibed ka loyogi kumeno inyimi; pwodgi ikare me kinigani.”