Jeremia 19

Agulu ma oto

1Rwot owaca ni, “Cit i wil abino ma lacwe agulu ocweyo, kwany ludongo pa lwak ki ajwaki ma gutegi ma dong gurii i dog tic icit kwedgi, 21ci wucit wukat woko wa i Nota me Kinom, kun wudonyo ki i Dogcel me Labalatek, ci i cit itit lok ma an awaco botini ducu ki kunu. 3I biwaco botgi ni, ‘Wuwiny lok pa Rwot, wun luker me Juda ki jo ma bedo i Jerucalem. Rwot me mony ma en Lubanga pa Icrael owaca ni: nen atye ka kelo gin marac tutwal ikom kabedo man, mamiyo dano ducu ma gibiwinyo pire itgi bibedo ka wo awoya liwang wang. 4Abitimo gin ma kit man pien dano gutyeko bwota woko, dok bene gubalo kabedo man woko, kun giwango iye odok eceta bot lwak lubanga mukene ma gin ki komgi nyo kwarigi kadi wa luker me Juda onongo yam pe gungeyo. Gupongo kabedo man woko ki remo pa jo ma gipeke ki bal, 52dok bene gugero wang jogi pi jok Baal kama giwango iye awobegi ki mac macalo gitum awanga bot jok Baal. Meno gin mayam pe awaco ni gutim, pe acikogi pire, dok bene pe atamo pire wa ki acel ni gutim. 6Pimeno, nen kare tye kabino, ma an Rwot dong awaco gire, ma kabedo man dong pe kibilwongo ni Topet nyo Nota me Kinom, ento dong kibilwongo ni nota me Nek. 7I kabedo man en aye abibalo iye yub pa jo Juda ki jo Jerucalem woko. Abimiyo lukworgi biloyogi woko, ci ginekogi woko ki pala lucwan i lweny. Abimiyo komgi ma oto bedo cam pa winyo ki pa lee me tim. 8Abibalo taun man woko marac tutwal wek dano ducu ma gikato ki ka ngete gubed ki jwat ki ur madit pi gin marac ma dong otyeko timeni. 9Abimiyo jo ma gibedo kunu gibicamo kom lutino awobegi ki lutino anyiragi, ma ngat acel acel bicamo ringo kom lawote, ikare ma nongo mony dong orumugi woko, ma dong gitye ka mading pi can ma jo ma mito nekogi woko gukelo ikomgi.’

10Ci Rwot owaca ni anek agulu woko ki inyim jo meno ma guwoto kwedani, 11ci awac botgi ni Rwot me mony owaco kuman ni, ‘Abituru jo magi woko kitmeno wa ki taun madit man, calo ngat ma neko agulu, miyo pe dok kitwero yubune wek odwog kakare. Kibiyiko dano i Topet ci bipong woko miyo kabedo mo mukene me yik dong bibedo peke. 12Meno aye gin ma abitiyo i kabedo man, man Rwot ma owaco, man bene gin ma abitimo ikom jo ma bedo iye, dok abimiyo taun madit man loke nen calo Topet. 13Lwak odi ducu ma i Jerucalem ki odi pa luker me Juda, ma gin odi mayam gibedo ka wango odok eceta i wigi bot mony me polo, ki onyo gityer amatagu bot lubanga mukene, kibimiyo bale woko macalo kabedo me Topet.’”

14Lacen aa ki i Topet kama onongo Rwot ocwala iye katito loke, abino ci acung i dyekal me Ot pa Rwot, ci awaco bot lwak ducu ma gitye kenyo ni 15Rwot me mony, ma en Lubanga pa Icrael, owaco kuman ni, “Nen, atye kakelo gin marac mayam aloko pire ikom taun madit man, ci abiketo ikome ki ikom taun ducu ma gurumu ka ngete, pien gumiyo ngutgi odoko nwang, kun bene gikwero kwede winyo loka woko.”