Jeremia 20

Mone ikin Packur gin ki Jeremia

1Ikare meno ajwaka Packur wod pa Imer, ma onongo en aye ladit maloyo Ot pa Rwot, owinyo ka atito lok magi. 2Cutcut Packur ociko lok ni kigoya, ci dok omiyo lok ni kitweya woko ki okol i ot buc ma matye i dogcel mamalo pa Benjamin matye i Ot pa Rwot. 3Orwone Packur ogonya ki i okol, ci awace ni, “Rwot pe ocako nyingi ni Packur, ento dong omiyi nying manyen ni ‘Lworo tye i Kabedo ducu.’ 4Pien Rwot owaco kuman ni, ‘Nen, abimiyo ibedo gin makelo lworo ikomi kekeni ki ikom luremi ducu. Lukworgi binekogi woko ki pala lucwan kama in bene i nenogi. Abimiyo jo Juda woko ducu i cing rwot me Babilon; en biterogi woko i opii i Babilon, ci en binekogi woko ki pala lucwan. 5Dok bene abimiyo lonyo ducu me taun madit man kacel ki magobane, ki jami ducu ma pirgi tego botgi ducu, ki kit lonyo mapatpat pa rwot me Juda i cing lukworgi ma biyako jamigi, kun gimakogi, ci giterogi woko i Babilon. 6Dong in Packur, kacel ki jo ma gibedo i odi, kibiterowu woko i opii i Babilon; ci dong wubito ki kunu; ci kibiyikowu bene kunu, in kacel ki luremi mayam ibedo katito lok gobagoba botgini.’”

Jeremia onguru bot Rwot

7Ai Rwot, in dong i bwola, oweko bene kibwola.

In i tek i kata woko, dong ityeko loya woko.

Dong adoko ginanyera pa dano dyeceng jwi;

dano ducu gingala angala.

8Ka atye kaloko lok mo ci aloko ki dwon malongo

kun adange matek ni, “Tim bwami ki bale me lobo!”

Dano gicaya dok ginywara kare ducu pien ni atito lok pa Rwot.

9Kace awaco ni, “Pe dong abilwongo nying Rwot,

nyo ni pe dong abiloko lok mo ki nyinge matwal,”

ci i cwinya kuca nongo tye iye gin mo ma wang calo mac,

matye okane woko i cogona,

dong aol woko ki juku doga wek pe aloki, pe dong atwero.

10Awinyo lwak tye kalok lawewe ni, “Lworo tye i kabedo ducu.

Pimeno wubin wek wadote woko!”

Man lurema ma angiyo kwedgi aye giwaco;

gitye kaneno kace abipoto i bal mo.

Dok giwaco ni, “Gwok nyo kibibwole abwola,

ci wabimake woko,

wek wacul wang kworwa ikome.”

11Ento in, Rwot, i tye kweda, in oteka lweny ma kilworo,

pimeno jo ma giketo ayelayela

ikoma gibiyoke atata;

pe gibiloya kadi matidi mo.

Lewic bimakogi matek mada,

pien pe dong gitwero loyo.

Lewic ma bimakogini bibedo matwal,

wi dano pe biromo wil ikome wa ki acel.

12Ai Rwot me mony, in itemo dano me neno ka kitgi tye atir,

ingeyo gin matye i cwinygi ki gin ma gitamo.

Pimeno wek anen ka i culu kwor ikom lukwora,

pien an dong anyutu loka woko ducu boti.

13Wuwer wer bot Rwot! Wupak Rwot!

Pien otyeko laro kwo pa jo ma piny obwoyogi

ki i cing lutim maracu. 141

Kicen nino ma ceng kinywala iyeni!

En nino mayam maa onywala iye,

wek gum obed peke ikom nino meno!

15Kicen dano ma okelo lok maber bot wora ni,

“Kinywali latin laco,”

omiyo en obedo ki yomcwiny madwong.

16Wek danonu obed calo taun madito

ma Rwot ojwero woko labongo kica;

wek owiny koko i odiko

ki tum laot mony ma kikutu i dyeceng amac,

17pien en pe oneka ki i i maa;

kono ot nyodo pa maa dong oloke odoko macalo lyela,

kono ot nyodo pa maa obedo pek matwal.

18Pingo akati kono ki i ic

ka nongo tic matek ki cwercwiny,

dok ka nongo atyeko ninona ducu ki lewic keken?