Jeremia 21

Kitito kit ma kibibalo kwede Jerucalem woko

1Man aye lok ma Rwot oloko bota ikare ma rwot Jedekia ooro Packur wod pa Malkia ki ajwaka Jepania wod pa Maceya kun waca ni, 21“Lok bot Rwot pirwa, pien Nebukadnejar rwot me Babilon tye ka ero lweny ikomwa. Gwok nyo Rwot bitiyo jami tangone mogo pirwa, ci bimiyo Nebukadnejar jer dok cen ki ngeye.”

3Ci atito ki jo ma onongo kicwalo botani, 4ni gucit gutit bot Jedekia ni Rwot, ma en Lubanga pa Icrael, dong otyeko waco ni, “Abicito ka ryemo acikari ma Jedekia tye katic kwedgi me lweny ikom rwot me Babilon ki dul monye, ma dong gitye karumu cel me taun madit woko ducu ni adwokogi cen. Abicoko jami lwenygi aduru woko i dye taun madit. 5An ki koma aye dong abilwenyo ikomwu ki teka ducu, ki kiniga, ki akeca madit. 6Abineko jo ducu ma gibedo i taun madit man, dano kacel ki lee, gin ducu two gemo marac adada bityekogi woko. 7Lacen abimiyo Jedekia rwot me Juda, ki lutice, ki jo ma gitye i taun madit man ma gubwot ma two gemo pe onekogi, ki jo ma pe kinekogi i lweny ki pala lucwan, ki ma kec madit pe onekogi, abimiyogi woko i cing Nebukadnejar rwot me Babilon, i cing lukworwu ma mito nekowuni woko. Nebukadnejar binekowu woko ducu ki pala lucwan; kadi wa kica bene pe bimako en ikomwu, kun bene pe abiparo pirwu, dok pe abiwekowu bedo kwo. Man an Rwot ma awaco.”

8Lacen Rwot dok ocika me tito ki lwak ni, “Wuwiny, an Rwot amiyo botwu twero me yero yo ma tero dano i kwo nyo yo ma tero dano i to. 9Ngat ma pud bedo i taun madit man kibineko woko ki pala lucwan i lweny, nyo kec aye bineko, nyo two gemo aye bibino neko woko. Ento ngat mo ma bia cito woko kun miine bot jo Babilon ma dong kombedi gurumu taun madit wokoni, en aye bibedo kwo. 10Dong amoko tama woko pe me bwoto taun madit man, ento dong ayube me balone woko. Kibimiyo i cing rwot me Babilon, ci en biwango woko ki mac nginyinginyi. Man an Rwot ma awaco.”

Ngolo kop ikom ot ker me Juda

11Rwot dok owaca ni awac bot jo me ot pa rwot me Juda ma gin likwayo pa Daudi ni, 12“Wungol kop atir rupiny ki rupiny, dok myero wular dano ki i cing ngat ma unugi kadi ki ngat ma dong kityeko yako jamine woko, wek pe akemona okati woko macalo mac ma lyel, ma wango piny ma ngat mo pe romo nekone, pi gin marac ma wubedo katimone. 13Nen, atye ki lok ikomwu, wun jo Jerucalem ma wubedo lamal ka wi nota, iwi got ma tye i dye bar; wun ma wuwaco ni, ‘Anga kono ma bibino ka lweny ikomwa?’ Dok bene wuwaco ni, ‘Anga ma bidonyo i kabedo kama wabedo iye?’ 14Abiketo can ikomwu kun lubu kit gin ma wutimo, man an Rwot ma awaco; abimoko mac i gang kerwu, ci abiwango gin ducu ma orumu ngete atyeko woko liweng.”