Jeremia 22

Lok ma Jeremia otito bot jo ot ker me Juda

1Rwot owaca ni acit bot jo me ot pa rwot me Juda 2ci awac bot rwot me Juda, ma bedo iwi komker pa Daudi, kacel ki lutice, ki lwake ma gidonyo ki i dogcel ducu me gang man ni, 3“wutim gin matye kakare dok ma atir, wular jo ma kiunugi ki i cing jo ma oyako jamigi. Pe wutim gin marac nyo tim aranyi ikom larok mo, ikom lutino kic ki mon to, dok bene pe wunek dano mo ma pe ki bal i kabedo man. 4Kace wulubu gin ma an dong acikowu ni wulub, ci likwayo pa Daudi gibimede ki bedo luker. Gin kacel ki luditogi ki lwak, gibimede ki donyo i dogcel ducu me gangkal man kun giringo ki gadigadi kacel ki aguragura. 51Ento kace pe wulubu loka, ci an dong akwonge ki nyinga kena botwu ni gangkal man bidoko wi obur. Man an Rwot ma awaco. 6Ki tung bota, ot ker me Juda nen ma munya calo lobo Gilead, calo wi got Lebanon mabiti, ento kadi bed kumeno abiloko kabedo man doko calo tim aroo, en kabedo kama dano pe bedo iye. 7Abiyubu lulweny ma gibilweny ikomwu, ngat acel acel bimako latonge icinge ci gibitongo yadi cedarwu mabecogu gireto woko piny, ci gicoko gibolo woko i mac.

8Lacen lurok mapol gibikato ki inget taun madit man, kun dano acel acel biwaco bot lawote ni, ‘Pingo Rwot otimo gin macalo man ikom taun man maditi?’ 9Ci gibidok iye kun giwaco ni, ‘Pien onongo gubwoto gicike pa Rwot Lubangagi woko, dok gubedo ka woro lwak lubanga mukenegu kun gitiyo botgi bene.’”

Lok pa Jeremia ma oloko ma okemo Yekoakaj

10Wun jo me Juda, pe wukok pi rwot Yocia ma dong oto wokoni,

dok bene cwinywu pe myero oton pire;

ento wukok matek pi wode Yekoakaj ma dong kitye ka tere ci cito woko matwal,

pien en dong pe bidwogo cen wa ki acel

me neno lobo mayam kinywale iye. 112

Pien Rwot owaco lok kuman mukemo Yekoakaj wod pa Yocia rwot me Juda, ma obedo kaloc ma ka wone Yocia, ma kombedi dong pe i kabedo man dok pe bene dong bidwogo cen kany matwal. 12Ento en bito mere i kabedo kama kitere iye i opii, pe dok bineno lobo man tyen me aryo.

Lok pa Jeremia ikom Yekoyakim

13Can iwi dano ma gero ode ki kit tim ma pe atir,

ma ogero kicika odine ma malogu ki kit tim ma pe atir,

ma miyo luwote tiyo tic bote nono labongo cul mo,

dok bene pe culu mucaragi.

14Can iwi ngat ma waco ni,

“Abigero oda madit pira kena

kun aweko kicikane ma malo bedo malac tutwal.”

Ci en biketo wang dirica me ode,

kun bipeto bao cedar i kicika me ote,

ka deyo kome woko ki rangi makwar.

15Itamo ni ibidoko rwot ce,

ka igero odi ki yadi cedar

kun bene ginen mabeco ma kato odi ma pa jo mukene wokogu?

Woru aye yam ocamo kuc me loboni mada.

En kare ducu onongo obedo dano ma gene dok ma ngolo kop atir,

omiyo gin ducu ma en obedo katiyone owoto maber.

16En obedo kangolo pido pa lucan ki pa jo ma piny obwoyo maromrom,

ci omiyo en obedo ki kwo maber.

Man aye tyen lok me ngeyo Rwot.

17Ento ibedo kaneno mitini kekeni keken;

wek inong lonyo pi unu dano;

ineko jo ma gipe ki bal mo,

dok bene itimo tim bwami me unu lwaki.

Man Rwot ma owaco. 183

Pimeno Rwot owaco lok bot Yekoyakim wod pa Yocia rwot me Juda ni,

“Ngat mo pe bikumu pi tone, kun waco ni,

omera do, nyo ni, lamera do!

Ngat mo pe ma bikok, kun waco ni,

Rwoda do! Rwota do! Lok man rac kuman!

19Kibiyiko ki kit yik ma kiyiko ki gwok,

kibipeyo kitero ci kibolo woko inge cel me Jerucalem.”

Lok pa Jeremia pi can ma okemo Jerucalem

20Wun jo Jerucalem, wucit iwi got Lebanon ci wudange kunu,

dok wucit i lobo Bacan ci wucikok kunu;

wulwong lwongo matek ki i Abarim,

pien jo ma nene wumarogini ducu dong kityekogi woko.

21Rwot oloko kwedwu ikare ma onongo wutye ki lonyo madwong,

ento wun giwu wukwero winyo loke woko.

Man aye kit gin ma wubedo katimone cake wa ka tinowu;

pe wulubu gin ma Rwot obedo kawaco botwu wa ki acel.

22Yamo bikodo ci tero lutelwu woko ducu,

jo ma wumarogini kibiterogi woko i opii,

lewic bimakowu dok alee bitwodowu pi gin maracu ducu ma dong wutyeko timone.

23Kombedi, Rwotwu dong tye ki kuc labongo lworo mo i ot ker,

ma kideyogi maber ki cedar me Lebanon;

ento ka arem me can bipoto ikome ci en bicur marac

calo dako matye ka rem ki nywal!

Ngolo kop ikom Yekoyakin

244

An Rwot awaco ni, “Akwonge ni, kadi ka in Yekoyakin wod pa Yekoyakim rwot me Juda, onongo ibedo agit me diyo cing matye i cinga tung lacuc, onongo pud abicori woko aye, 25ci onongo amiyi i cing jo ma gimito neki woko, i cing jo ma ibedo ki lworo ikomgini. Dok abimiyi bene i cing Nebukadnejar rwot me Babilon kacel ki jo Kaldaya. 26Abibolo in kacel ki meni ma onywali woko wa i lobo mukene, kama yam pe kinywali iye, ci wubito woko ki kunu, ento pe wubidwogo cen. 27Ibimito ni, kono kong ineno loboni anena keken ki wangi ento i ada pe dong ibidwogo cen i iye matwal.”

28Ci an Jeremia apenyo ni, “En Yekoyakin mono dong oloke odoko macalo agulu ma oto ma dong kikwanyo kibolo woko, ma ngat mo pe dong mito? Pingo kono kikwanyo en kacel ki lutinone ci kibologi woko wa i lobo ma gin pe gingeyo lok mo ikome?”

29In lobo, in lobo we, in lobo!

Winy lok ma Rwot dong owaco ni:

30“Kingolokop woko dong ikom laco man ni latine mo bibedo peke,

en dano ma pe obedo ki gumkom ikare me kwone ducu;

likwayone mo pe ma bibedo ki gumkom me bedo iwi komker pa Daudi.

Man lok pa Rwot kikome.”